Кыӵе мылкыдын уло футболэн висисьёс?

Удмурт Дунне
By Удмурт Дунне Июнь 28, 2018 15:33

Чемпионат дыръя вань калык футболэн шуак тунсыкъяськыны кутскиз. Кыӵе, меда,  малпанъёссы командамы понна висисьёслэн?

Андрей Загребин, УдГУ-ысь футболъя 2-тӥ «СиВ» командаез кылдытӥсь:

— Туэ ортчись чемпионат — бадӟым праздник. Уката командамы 2 пол вормиз ни. Озьы ке но мылкыды сокем ӝутӥськемын ӧвӧл — одӥг шудонэз но улэпкын ӧй адӟы. Мон шумпотыса вань матчъёсы ветлысал, но, жаляса верано, одӥгаз гинэ вуылыны быгато. Казаньын Швейцарилэсь Коста-Рикаен шудэмзэ учкыны малпасько. Чемпионат тросэныз паймытыны вуиз ни. Шуом, Германия Мексикалы келяз. Кылем чемпионатын Германия вормиз, соин ик нокин уг малпа вал, Мексика сое вормоз шуыса. Кин ке но паймиз Бразилиен Швейцариен «вничью» шудэмзылы. Нош мон малпасько, швейцарецъёс валаса шудӥсь команда, нош бразилецъёс мылкыдзэс кортнаса возьыны уг быгато.  Мыным туж яраз, Киров нимо паркын фан-зона лэсьтӥзы шуыса. Ӵош футбол учкыса, астэ бадӟым дуннелэн люкетэныз шӧдӥськод.

Алексей Кириллов, футболъя «СиВ» командаын шудӥсь:

— Мылкыды лӧптэмын. Вань матчъёсты меӵак эфирын учкисько. Бразилиын яке ЮАР-ын ортчем чемпионатъёсын ӵошатоно ке, туэ чемпионат мыным трослы тунсыкогес потэ. Учкымон шудонъёс. ЮАР-ын, шуом, тросаз шудонъёсын одӥг-кык туп гинэ пыртылӥзы, нош туэ ми адӟиськомы ялан азьлане мынӥсь футболистъёсты. Паймыто перуанецъёслэн но мексиканецъёслэн тупез котькуд пала бергатыны быгатэмзы но ӝог луэмзы. Висисько Россия но Хорватия понна. Но зэмзэ верано ке, мон сакгес нимысьтыз шудӥсьёсты учкисько. Мынам яратоно футболистъёсы — Германиысь Марко Ройс но Хорватиысь Иван Перишич.  Мон оскисько, али ортчись чемпионат юрттоз Россиысь футболэз азинтыны.

 

Владислав Кабанов, футболэн висись:

— Мон, валамон, Россия понна висисько, но со сяна, Германия, Швейцария, Нигерия, Колумбия, Испания кельшо на. Сыӵе пӧртэм командаос ярало, малы ке шуоно соослэн сборнойёсазы Англиысь «Арсенал» клубысь футболистъёс шудо. Тужгес но сак учкисько Испанилэсь но Германилэсь матчъёссэс. Туж потэ, мед та командаос ог-огенызы шудозы. Германия Мексикалы келяз ке но, мон немецъёсты ӧй на палэнтысал. Соос быгатозы ик, дыр, полуфиналэ шедьыны. Испания сярысь верано ке, мынам учкеме потэ, кызьы команда выль тренерен шудоз. Угось тренерзэс чемпионат кутскон азьын гинэ воштӥзы. Португалиен шудэмзы мыным кельшиз, ӧз ке но ворме. Та 2 сборнойёс вань кужымзэс  ӧз на возьматэ. Малпасько, котькуд матчсы туж тунсыко ортчоз.  Россилэн командаез сярысь верано ке, вунэтоно ӧвӧл, азьланяз секыт матчъёс на. Жаляса верано, Ижкарын футболлэн праздникез уг шӧдӥськы, Киров нимо паркын фан-зона усьтэмын ке но.

Мария Бочкарёва, Казаньын Чемпионатлэн усьтӥськоназ кырӟам артист:

— Мон Казаньысь консерваториын этномузыкологияя кафедраын дышетскисько. Казаньын чемпионатлэн усьтӥськоназ ансамблен ӵош кырӟай. Сомында адямиез вал! Туж бадӟым сцена, вадьсаз ик бадӟым экран. Отын вань матчъёсты возьмато, кырӟаммес но возьматӥзы. Али татын кунгож сьӧрысь лыктэм адямиос туж трос. Одӥг нуналэ туж кезьыт куазь вал. Кык иностранецъёс мон доры лыкто но мар ке но англи кылын верало. Кык кылзэс гинэ валай «i’m» но «clothes». Нырысь туж кема малпаськи, собере валай, таос кынмиллям, дыр, шуыса. Соос шуныт дӥськутэн лавка утчало вылэм. Соин ик дышетэ кунгожсьӧр кылъёсты. Мынам льӧль малпанэ вань, куке но Месси яке  Роналду футболистъёсын пумиськыны. Жаляса верано,  соос охранаен ветло. Чемпионат Казаньын туж шӧдиське. Калык флагъёсын ветлэ, йыразы олокыӵе но изьыос понылэмын, бамъёсазы флагъёс суредаллямын. Чемпионатэн сэрен ик туж трос полицейскойёс ветло.

Евгения Корепанова

Удмурт Дунне
By Удмурт Дунне Июнь 28, 2018 15:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*