Ижкар Гербер: Кызьпу арамаын эктӥзы-кырӟазы но, визьзэс но сыназы, кылбур но лыдӟизы

Удмурт Дунне
By Удмурт Дунне Июнь 13, 2018 16:00

Ижкарысь Герберлэн туэ аспӧртэмлыко шӧмыз вал: дышем сямъя эктэм-кырӟам сяна, адямиос тодматскизы фин-угор калыкъёсын, зымылӥзы удмурт литературае но визьзэс сыназы. 12-тӥ инвожое Кызьпу арамаын ог 20 азбаръёс вал.

Куно пумитан.

Туэ шулдыръяськонэз Индустриальной ёрос администрацилы но «Удмурт Кенеш» огазеяськонлы радъяны юрттӥськиз Удмурт филармония. Озьы валтӥсь сцена вылын, Ижысь пӧртэм ансамбльёслэн — «Инвожо», «Тюрагай», «Чильтэр» но мукет — куараоссы сяна, чузъяськизы филармониысь «Шулдыр ӝыт», «Италмас» ансамбльёслэн кырӟанъёссы.

Гербер люказ пӧртэм калыкъёсты. Кылсярысь, Герберен, Россилэн, Ижкарлэн нуналъёсынызы ӟечкыланы шаерамы юромо вуизы Кун Думаысь депутатъёс, озьы ӟечкылан кылъёс чузъяськизы удмурт, коми, бурят, ӟуч но мукет кылъёсын.
— Гербер — шулдыр праздник, со огазея пӧртэм калыкъёсты, пӧртэм арлыдъем адямиосты, — бадӟым сцена вылысен пусйиз «Удмурт Кенеш» огазеяськонлэн тӧроез Татьяна Ишматова. — Сюлмамы но, луламы но котьку но ӟеч мылкыд, юн тазалык мед луоз. Мед чузъяськоз удмурт кылмы, удмурт кырӟанъёсмы, пиналъёсмы мед данъяськозы удмурт луэменызы.

Тунсыко азбарез вал «Удмурт Кенеш» огазеяськонлэн. Таяз радэ «кенешчиос» бурд улазы люканы малпазы пӧртэм фин-угор калыкъёсты. Чузъяськизы пор, мордва, удмурт но мукет кылын кырӟанъёс. Котькуд адями аслыз сюлэмызъя шутэтскон сэрег шедьтӥз. Нылпиос шудӥзы «Билингва» азбарын, кырӟаны но эктыны яратӥсьёс люкаськизы бадӟым сцена азе, кылбурлы синмаськисьёс — пичи сцена доры. Асьсэ чуръёссэс лыдӟизы удмурт кылбурчиос — калык татын но ӧжыт ӧй вал.

— Гербере потоно шуыса, азьвыл аръёсы вераськылӥмы, таяз радэ азбармес радъяны пӧрмиз, — шуэ Йӧскалык библиотекалэн шаертодонъя ёзэтэныз кивалтӥсь Татьяна Николаева. — Тау филармонилэн кивалтӥсезлы Алексей Фоминлы, со шуиз: калык дышемын ни удмурт кырӟанъёс улсын шулдыръяськыны, Гербере выжыятоно мур пуштросо, малпаськытӥсь ужрадъёсты но. Гожъяськисьёслэн но калык азе потыны мылкыдзы вань.

Йӧскалык библиотекалэн азбараз кылбуръёссэс лыдӟизы 10 мында кылбурчиос. Со сяна, бордазы итӥськизы вотэсысь «Инстаудмурточки» марафонэ пыриськем удмурт нылъёс. Соос но асьсэ сярысь веразы, кылбуръёс лыдӟизы.

Ӝукез вӧсян.

— Сцена вылысен мон лыдӟи К. Гердлэсь «Мон кизисько гинэ» кылбурзэ. Та кылбур пӧртэм арлыдъем адямиосты герӟа, соин ик кӧня ке чурзэ лыдӟиз нылы но. Чебер пӧрме! — вера «инстаудмурточка» Елена Ильина.

Зэм, таӵе ужрадъёс бере ик кылбурчиос асьсэзыс кылбурчиен золгес шӧдыны кутско, литературалэн ӧраз мургес пыро.

— Туэ гожъяськыны мылкыды ӧй вал. Малпай: туннэ ужрадын выль кылбурме воксё уг лыдӟы. Асме киям кутӥ но, выль чуръёсы кылдытозь, умме усьыны ӧй быгаты, — пусъе Татьяна Чернова кылбурчи.

Ижкар Гербере тросэз калык дышем сямен ветлэ: удмурт омырен шоканы, шулдыръяськыны, ӝук сиыны… Шуо, арысь аре, пе, шулдыръяськонын весь марке вылез кылдэ. Ваньмыз кельше шуыса ветло Гербере нырысьсэ кожемъёс но. Тани Пичи Пурга ёросысь Бобья-Уча гуртысь «Бубби гуръёс» ансамбльысь кенакъёс, пе, «первойзэ» лыктӥм, юромо нимысьтыз автобус курыса.

«Валамон-Паримон» команда «Удмурт дунне» газетлэн шудоназ вормиз.

— Адӟом ай, кыӵе мар шулдыръяськон ортче, — шуо кенакъёс. — Ми, пенсионеръёс, выступать карыса ветлӥськомы. Вуоно арын милемыз но ӧтизы ке, синмаськизы ке, лыктомы.

Калык ӧз бырылы «Удмурт дунне» газетлэн, Мунё театрлэн, К. Герд нимо йӧскалык музейлэн, «Лудорвайлэн» азбаръёсазы, тодосчиослэн куаазы, киужъёсын выронъя сэрегъёсын… Бер ӝытозь Кызьпу арамаын эктӥзы, кырӟазы. Егитъёс позыръяськизы Александр Митюхин крезьгур суралтӥсьлэн (диджей) ужъёсыз улсын.

 Мария Векшина

 

Ижкар Гербер: «Удмурт дуннелэн» шудоназ вормиз «Валамон-Паримон» команда

Удмурт Дунне
By Удмурт Дунне Июнь 13, 2018 16:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*