Гогольлэн бульвараз «Кырӟась азбар» ужрад ортчиз

Удмурт Дунне
By Удмурт Дунне Июнь 10, 2018 18:49

Гогольлэн бульвараз «Кырӟась азбар» ужрад ортчиз

Улэп крезьгурез кылзыны котыр азбаръёсысь сяна, огшоры поръясьёс но дугдылӥзы.  Час но ӝыны пала калыкез шулдыртӥзы «Восточный» лулчеберетъя юртысь коллективъёс.

Люкаськем калык понна татын сюлэмлы тодмо гуръёс чузъяськизы. Ужрад ретро стилья ортчиз — артистъёс тодэ вайытӥзы азьвыл даурысь кырӟанъёсты. Но соос огкадь матын вал, бульваре лыктэм егитэзлы но, арлыдоезлы но – ваньзы кырӟасьёс борды итӥськылӥзы. Ӧй вал адями, кинлэн пыдъёсыз асьсэос эктыны ӧз куриське.  Кырӟам улсын – кин ке вальс бергаз, кин ке круген эктӥз. Пӧсь кичабонъёс чузъяськизы саксофононэн, арганэн, гитараен шудӥсь коллективлы. «Встреча»  но «Ретро» ансамбльёсын нылкышноосын но воргоронъёсын ӵош вань люкаськем калык кырӟаз.

Город калыкез праздникен — туннэ Ижын азбаръёслэсь нуналзэс пусъё — вуылӥз Индустриальной ёрослэн йырыз Любовь Зайцева.

— Котькудмылэн вань яратоно азбаръёсмы, урамъёсмы, кытӥ нуналмысь уже мынӥськом, дорамы бертӥськом, нылпиосын поръяськом. Соосты улэп, шулдыр кариськоды асьтэос ик, нош тӥ ваньды – со бадӟым но кужмо Россиялэн оглюкетэз. Праздникен тӥледыз, — шуиз Любовь Евлампиевна.

Шулдыр кырӟанъёс гочатӥзы газетмылэсь эшсэ Надежда Бочкарёваез но.

—  Крезьгурез кылӥ но, пыдъёсы асьсэос ураме нуизы, — варез та азбарын улӥсь Н. Бочкарёва. — Сыӵе чебер крезьгуро кузьым малпам калык понна город администрация.

Татын со пумитаз но эшъяськиз удмурт кышномуртэн Алевтина Кучеренкоен. Со но котыр чузъяськись крезьгурез кылзыны юромо лыктэм. А. Кучеренко алигес гинэ татчы улыны выжем ай. Озьы та кык кышномуртъёсты, шуыны луоз, азбарысь крезьгур эшъяськытӥз.

 

Ангелина Снигирева

Туспуктӥз А. Снигирёва

 

Удмурт Дунне
By Удмурт Дунне Июнь 10, 2018 18:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*