Футбол: Лулӟылон но шумпотон

Удмурт Дунне
By Удмурт Дунне Июнь 29, 2018 14:45

Футболэн шудонъя дуннелэсь чемпионатсэ учкыны луэ Ижысь Киров нимо паркысь нимысьтыз кылдытэм фан-зонаын, отысь пуктэм бадӟым экранлэн югытэз Иж тыметлэн мукет палаз но пиштэ кадь.

Ижысь фан-зонае футбол учкыны трос калык люкаськылэ. / Туспуктӥз Илья Вихарев

Учкисьёс висё дэмен

19-тӥ июне Россиысь команда пумиськылӥз Египетысь командаен. Бер ӝыт шоры учкытэк, оло, быдэс город Киров нимо парке вамыштӥз. Центре вуыса пайми, Киров нимо парк пала мынӥсь трамвайёс ваньмыз калыкен тырмемын, нош Киров ульча машинаосын тымиськемын.

Трамвайысь васькыса, мон но калык сьӧры фан-зонае вамыштӥ. Пырон ӧсъёс дорын корт капкаос пуктэмын. Вань калык металлоискатель пыр ортче, нош отчыозь кузь черод кылдэмын.

— 10 часын пиналъёсмес кӧлтыны выдтӥськомы ни вал, нош туннэ быдэс семьяенымы футбол учкыны лыктӥмы, — черодын артэ сылӥськомы Никифоровъёслэн семьяенызы. — Папамы боксъя секциен кивалтэ, спортысь мукет амалъёсты но учкыны яратэ. Татчы ми бадӟым экранысь чебер футболэз учкыны лыктӥм. Оскиськомы, Россия вормоз.

Та семьялы но, мыным сямен ик, пукон интыос ӧз шеде ни. Ӟус вылын пукон понна, пе, 5 часлы азьло лыктоно. Соин ик амалоосыз асьсэлы коврикъёс кутӥллям, асфальт вылэ пуксьыса, учкизы. Футбол кутскемлэсь азьло ик бадӟым экран азьысь пуксён интыос быризы, улмолы усён инты ик ӧй вал ни.

Фан-зонаын омыр ӟырдыт вал, адямиос стадионын пуко кожалод. Шудонлэн нырысетӥ люкетаз нокин гол ӧз пырты. Шудонлэн вис дыръяз ваньмыз футбол сярысь верасько: эх, кӧня учыр вал, нош гол ӧз пыртэ. Город транспортэн лыктэмъёс бертон пала учкыло, оло, токма сылӥськомы.

Но шудонлэн 2-тӥ люкетаз Россиысь футболистъёс бӧрсьысь бӧрсе 3 гол пыртӥзы. Калык ӟыгыръяське, кесяськем куаразы кӧлӥсь городэз сайкатоз кожасько ни вал. 3:1 лыдын ми вормимы! Солэсь азьвыл шудонын Саудовской Аравиез 5:0 каримы вал. Ми кадь кужмоез ӧвӧл!

Келяны но быгатоно

Вормонлы ӝог дышоно вылэм. 25-тӥ июне Уругваен шудонэз учкыны калык нош ик фан-зонае люкаськиз. Пыжись шунды шорын адямиос 2 час пала витизы. Шудоосыз пукизы, бере кылемъёсыз сылӥзы, нош тужгес кескичъёсыз спорт площадка вӧзысь турын вылэ гань-гань выдӥзы. Таяз учыре пиналъёс эшшо но тросгес вал. Шудон кутскиз гимн бордысен, тросэз сое сылыса кылзӥзы.

Жаляса верано, таяз учыре шудон туж чурыт вал: ваче шуккиськонъёс, усьылонъёс… Судья кисыысьтыз ӵуж карточкаоссэ потта, гордзэ но возьматӥз. Озьы Игорь Смольников 8 минут куспын 2 карточка басьтӥз но, шудонлэн 36-тӥ минутысеныз Россилэн сборной командаез 1 футболистлы ичигес кылиз. Ижысь фан-зонаын пукисьёс кесясько, судьяос кылозы кожало, лэся. Эх! яке ох! шуыса лулӟо, шуласьёсыз но лачак. Таяз учыре учкисьёслэн мылкыдзы кунэрес. Пумиськонлэн 1-тӥ люкетэз 2:0 лыдын йылпумъяськиз — уругвайёс вормо. Вис дыръя тросэз вамыштӥзы спортплощадкае, татын баскетболэн шудонъя чемпионат мынэ кожалод. Удмуртиысь воргоронъёс шудо Африкаын вордскемъёслы пумит.

— Ачим мон Сенегалысь, валамон, футболъя чемпионатын командамы понна висисько, озьы ик шумпотӥсько Россия понна. Футболистъёс умой шудо, оло, туннэ но гол пыртозы ай. Умоезлы осконо, — шуэ егит пияш Салиф.

Фан-зонаын соос ог 10 кузя вал, Салиф дышетске ИжГТУ-ын, пӧлазы вань медициная академиын дышетскисьёс но.

Россилэн командаез таяз учыре Уругвайысь командалы келяз. Калык лулӟылыса ӧс пала вамыштӥз. Эх, озьы ке луысал, нош штрафнойысь ке пыртысалмы… Одӥгъёсыз буйгато, келяны но быгатоно, пе, азьпалан зэмос ожмаськон. Солы дасяськоно, «Вперёд, Россия!» кесясько. Мышкамы мынӥсьёс бордазы итӥсько. Озьы умоезлы оскисьёс тросгес вылӥллям, кесяськеменызы мылкыдэз ӝуто.

Табере 1-тӥ июлез возьмаломы, Россилэн командаез пумиськоз Испаниысь футболистъёсын. Туж потэ вылэм, осконъёсмы зэмалозы шуыса.

Валентина Емельянова

Удмурт Дунне
By Удмурт Дунне Июнь 29, 2018 14:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*