Футбол, куймак но зырет. Кызьы Ува ёросысь песянайёс футболэн шудо

Удмурт Дунне
By Удмурт Дунне Июнь 22, 2018 13:10

Толэзь ӵожелы асьме кунмы футбол дуннелы пӧрмиз. Ува ёросысь песянайёс гинэ но, чемпионатлы сӥзьыса, туп ӵыжазы.

Андрей Поздеев

Ува ёросысь Тугырысь но Пет-ровскойысь песянайёс футболъя чемпионатэз асьсэ сямен пумитазы.

Ува ёросысь Тугырысь но Петровскойысь песянайёс футболъя чемпионатэз асьсэ сямен пумитазы.

Котькуд ар южтолэзе Ува ёросысь Тугыр (Кизварь) гуртын лымы вылын футболэн шудонъя турниръёс ортчытъяло. Таяз арын футболэз яратӥсь нылкышноос, гужем ужъёссы шоры учкытэк, 2-тӥзэ люкаськоно кариськизы. Дуннеысь чемпионатлы туж шумпотӥськом. Соин дыр но шедьтӥм, шуэ ветеранъёслэн советсылэн тӧроез Юлия Маркова. Кенешизы — люкаськизы. Петровскойысь кышномуртъёс, зэмос футболистъёс кадь ик, автобусысь радэн потыса, Тугырысь шудон бусые вамыштӥзы. Табере 2-езлы ик командалы кӧня ке дасяськоно. Шудӥсьёс ёзвиоссэс шунтӥзы-дасязы — зарядка лэсьтӥзы. Со куспын вуизы командаослэн фан-клубъёссы. Школаын дышетскисьёс песянайёссы понна висён вылысь речёвкаос но малпаллям.

Судья — школаысь физкультураен дышетӥсь — шултэм бӧрсьы ӟырдыт шудон кутскиз. Туп огпал капка дорысь мукет палаз дугдылытэк лобаз. Но огезлы но командалы вормон ӧз вайы. Песянайёс ӧз буйгалэ: ваньмыз зэмос футболын кадь ук. Кутскиз пенальти. Татын устогес луизы петровскойёс. Гол пыртӥз колхозлэн азьвыл тӧроез Галина Сабирзянова.

Андрей Поздеев

Школаын дышетскисьёс песянайёссы понна висён вылысь речёвкаос но малпаллям.

Петровскойысь «Авангард» колхозлэн кивалтӥсез Фарит Халитов верамъя, песянайёс вань гуртоослы адӟем карымон луо. Шудонъёссэс ог 17 ар талэсь азьло радъяны кутскизы. Юыны ӧдъям егитъёсты футболэн шудыны ӧтисько, нош соос, возьдаськиськом шуыса, палэнскыны выро вал, тодаз вае Фарит Халитов. Соку, пе, индылытэк ӧй чида. Песянайёслэсь адӟем карыны ӵектэм. Озьы каллен футболэн, спортэн эшъяськисьёссы йылӥзы.

Андрей Поздеев

Голлы шумпотон.

Петровской гурт администрацилэн йырыз Татьяна Ермакова верамъя, поселениысьтызы кышномуртъёс котькыӵе ужрадъёсы мыло-кыдо пырисько. Футболэн шудэм сяна, дугдылытэк репетициосы ветло, концертъёс возьматъяло. Удмуртъёс, бигеръёс, ӟучъёс уртче уло. Ваньмыз бигеръёс пичиысен ик удмурт кылын верасько. Футболэн шудон дыръя мусульманъёслэн Ураза Байрам праздниксы тупаз. Альфия Чайникова шудон бусы дуре ик питран вылэ пуктэм гурзэ вайытӥз но калыкез куймакен (бигер табанен) но удмурт зыретэн куноятӥз.

Эдуард Степанов
Туспуктӥз Андрей Поздеев

Удмурт Дунне
By Удмурт Дунне Июнь 22, 2018 13:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*