Дэри ёросысь Юсь черкогурт сярысь книга потӥз

Удмурт Дунне
By Удмурт Дунне Июнь 19, 2018 13:45

Дэри ёросысь Юсь черкогуртлэн ортчем сюресэз но туннэ нуналэз, отын улэм но али ужась адямиос сярысь «Удмуртия» издательствоын потӥз П. Давыдовлэн «Село Юськи. Водовороты жизни» синмаськымон книгаез. Уно аръёс ӵоже люкам материалъёс табере одӥг липет улэ пыртэмын.

Ымысь ыме верамъя но пельысь пеле кылэмъя, вашкала дыръёсы Юсь черкогурт интыын бадӟым ты вылэм. Ты дуре сюзэс юзматон понна котыр вӧлдӥськем сьӧд нюлэсъёсысь пӧйшуръёс вуылӥллям. Кузь сюрес вылазы шутэтскон понна пӧртэм тылобурдоос — ӵӧжъёс, ӟазегъёс, юсьёс — васькаллям. Уката но трос люкаськылӥллям юсьёс; соослы луыса ву выл тӧдьы буёлэн кадь пиштылэм. Жаль, азьланяз ты куасьмыны ӧдъям, турын-куарен шобырскем но, татчы пичильтык шур гинэ кылем на. Озьы ке но та интыос туж чебересь вылӥллям. Соин ик одӥг воргорон, мар ке муген ортчыкуз, татысь инкуазьлы чылкак синмаськем но та сярысь ӵыжы-выжыосызлы но матысь тодмоосызлы мадем. Выль кылдэм гуртлы ним сётон пумысен укыр ик шуг-секытъёс кылдӥллямтэ: юсьёс уга, ты куасьмыса но, яратоно интызэс куштӥллямтэ — одно ик котькуд ар та пичильтык шур вылэ пуксьылӥллям… Кин тодэ на али, зэмлыко-а та мадёс яке узыр кылбурето адямилэн малпамез-а, но чебер ним гурт борды дауръёслы лякиськиз.

Юсь гурт, странаысьтымы но шаерысьтымы мукет гуртъёс сямен ик, историлэн пӧртэм тулкымъёсаз но тылӝуосаз месылоно луиз.

1774-тӥ арын Юсь черкогуртэ, гуртысь куд-ог адямиос вазиськемъя, тямыс кузя казакъёсыныз ӵош Емельян Пугачёв вуылӥз. Сое калык сылалэн-нянен пумитаз, гуртэ пырон урам пумын тӧдьы ӝӧккышетэн но сиён-юонэн ӝӧк дасямын вал. Гумыен пеллямъёс но кырӟам куараос кылӥськизы, калык шулдыръяськиз. Пугачёв вуиз, сизьым кузя черкын ужасьёсты одӥг сюрые ошыса кельтӥз но аслэсьтыз виро ужъёссэ лэсьтыны азьлане шонтӥз.

1807-тӥ арын Юсь волостьысь крестьянъёс Ижкарысь пыӵал тӥрлык поттӥсь завод борды гожтэмын вал. Соос заводлы эстӥськон пу но эгыр дасянъя ужын курадӟоно луизы. Нюлэсэз жалятэк кораны косо вал, соин ик тросэз пӧйшуръёс ышизы-быризы, инкуазь вуос куасьмизы.

1806-тӥ арын гуртын земской школа усьтӥськиз, отын крестьян нылпиос дышетскизы. 1820-тӥ аръёсы Ижкарысь завод татын училище усьтӥз: заводлы визьмо ужасьёс кулэ вал. 1849-тӥ арын училищелэн юртэз выльдэмын вал, татын дышетскизы 43 пиос но 1 ныл. Училищеен кивалтӥз черкын ужась А. Дьяконов, нош одӥгез дышетӥсь вал Иоанн Васильевич Васильев — Кузонысь дышетӥсьёсты дасянъя семинариез йылпумъям нырысетӥез удмурт. Азьланяз со удмурт этнография но фольклор удысын тодмо усточи луиз, «Обозрение языческих обрядов, суеверий и верований вотяков в Казанской и Вятской губерниях» ужез (1906) кунгожсьӧр кылэ берыктэмын вал.

1937-тӥ арын колхозын покчи пиналъёсты дышетонъя одӥг этажъем пу школа пуктэмын вал. Школалэн нырысетӥ кивалтӥсез Фёдор Дмитриевич Балашов улонысьтыз 40 арзэ пиналъёсты дышетонлы сётӥз. 1939-тӥ арын школа 7 классъем луиз, 1960-тӥ арын — 8 классъем. 2008-тӥ арын усьтэмын дышетонъя но лулчеберетъя кык этажъем туала юрт-центр, отчы интыяськизы шор ёзо школа, нылпи сад, клуб, сиськон инты, библиотека, эмъяськон висъет, компьютер класс, спортэн вырон зал.

Граждан ож вакытэ Юсь черкогурт, Ижкарлы матын бере, я гордъёс, я тӧдьыос ки улэ шедьылӥз но, гурт калыклы соосызлэсь но, таосызлэсь но ческыт ик ӧз йӧтылы. 1918-тӥ арын шуркынмон толэзе гуртын Азинлэн дивизиезлэн штабез но политотделэз интыяськылӥзы. Граждан ож сярысь верало гурт урамъёсысь но бакчаосысь, гурезь бамалъёсысь но карьерысь шедьтылэм патронъёс но Мосинлэн винтовкаезлэн куд-ог люкетъёсыз.

1926-тӥ арын Юсь черкогуртын крестьян комитет кылдытэмын. Ар ортчыса, татчы «Фордзон» нимо питрано трактор вуиз. 1929-тӥ арын гужем, 15 юртъерысь адямиос люкаськыса, «Свобода» нимо колхозэ огазеяськизы. Собере кулаке поттон кутскиз, тросэз юнме янгыше уськытэмын вал; со дыре ик облисполкомлэн президиумезлэн комиссиез, ӝожтӥськонъёсты эскерыса, куд-ог семьяослэсь талам ваньбурзэс берен берыктыны косӥз. Калык пумен но каллен огъя уже кыстӥськиз но, колхоз улон радъяськыны ӧдъяз.

Быдӟым ож кутскыса, Юсь черкогуртысь 146 адями шаермес утьыны кошкиз, гуртысь вань секыт уж кышномуртъёслэн, пересьёслэн но пиналъёслэн пельпумъёссы вылэ ныпъяськиз. Ож сюресъёс вылын 93 гуртоос бырыны шедизы.

Война бере, секыт но сютэм аръёс пыр потыса, «Свобода» колхоз пыд йылаз йыг-йыг султӥз но 1959-тӥ арын миллион манет табыш поттӥсь хозяйствоос пӧлы пыриз.

Собере пӧртэм колхозъёсты огазеян но нимазъяськон вакытъёс вал. Туала «Юськи» колхоз, «Правда» совхозлэсь люкиськыса, 1990-тӥ арлэн пумаз вордӥськиз, азьланяз нош ик отчы-татчы кыстаськон но нимъёссэ вошъян понна…

Сергей Матвеев

Удмурт Дунне
By Удмурт Дунне Июнь 19, 2018 13:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*