Дарали Лели. «Флоу» верос

Удмурт Дунне
By Удмурт Дунне Июнь 21, 2018 17:16

Огшоры пӧсь гужем нуналэ, Ижысь электричкаен дорам бертыкум, вал со. Ӝокыт но пыкмемгес зыно вагонын укно дуре пуксьыны быгатӥ. Вӧзам — арлыдогес кышноос, киязы кудыос, бездэм но векчи пужыё басма кесэгъёсын шобыртэмын, ымныръёссы но сыӵе ик бездытэсь но векчи кисыриёесь. Азям егит нылъёс, городэ зоопарке яке цирке ветлӥллям, лэся: лӧптыса пӧйшуръёс сярысь лабырто. Сьӧрам шыпыт пуко пиос: сема зынэн паке.

Книгаме поттӥ но лыдӟиськисько. Фин веросъёс (мон филолог, кельше кылъёсты дышетыны) вылэ омырски. Котырысьтым дуннелэсь пегӟыса, быдэсак выйи Лийса но Янни нимо геройёслэн улоназы. Огдырлы юрттӥз. Собере кытысь ке ӧвӧл пыжкем-пирожки зын вӧлдӥськиз. Книгаме палэнтӥ: амалтэк сием потоз! Акыльтӥсько. Ӝоггес станциям мед вуысалмы.

Та пурысялэс корт коробкаын ворттыса, нокыӵе шуак чебер яке йӧно макелы паймыны уг луы. Ӧвӧл уго татын номыр сыӵеез.

Огаз дугдонниын вадьсысьтым нылашъёс потӥзы но, интыязы кемдӥз татчы тупасьтэм пассажир.

Ог кызь вить аресъем пияш, ачиз кадь ик векчи рюкзаксэ укно вылысь ӝажые сэрпалтыса, ӝикытак лачаз ассэ мон азям ик. Шорам ӧз но учкы — поттӥз кисыысьтыз пелепонзэ но, куара шудонзэ пеляз конгыртыса, гаджетлэн катанчияз синзэ мертчытӥз. Нош мон соку ик шораз жальмай — малы ке шуоно бордысьтыз синме ишкалтыны ӧй быгаты.

Ай озьы но ӧй вал. Нырысь ик сое ныры шӧдӥз. Укное долкан сяменым азьло ик нырпелесъёсы дорозь выль ческыт зын лӧсъяськиз. Со бичатӥз монэ но, чилектэм кадь, пушкысьтым мае ке вырӟытӥз. Соку йырме берыктӥ — пияш ӵапак, ӟусъёс вискытӥ ортчыса, вадьсам дугдӥз.

Та зын пирожки зынлэсь трослы ческытгес вал. Сием потонэ соку ик тӧлӟиз.

Конечно, зыныз но, ачиз но пияш татчы чик ӧз тупалэ. Паймонме лапкатыны валатэк, вылтуссэ эскери. Тӧдь-тӧдь, кӧня ке посӥськем вакчи саесо, бирдыё дэремен, джинса шортыен но супер-тузӥ кроссовкиен. Рюкзак-сарбаез яркыт буёло, чибориё но чильпырась. Йыраз кепка, отын ма но со гожтэмын, но лыдӟыса ӧй вутты — вылӥе сализ. Бордаз кыӵе ке тузӥ пуны уг тырмы на. Но катар велосипед. Но чильк-вальк туган. Но туганэз ӧй вал — соин ик пияш вал идеальной.

Собере, шораз долкамме чик шӧдытэк, смартфонзэ утялтӥз но поттӥз «Обряды и поверья удмуртского народа» (!) книгаез. Кутскиз лыдӟиськыны.

Мон интыям ик шунай — мороженой кадь. Ух, кыӵе пияш! Кыӵе пияш — шуям электричкаын-то…

Ӝыны час ӵоже «этнограф-хипстер», котырысьтыз дуннеез чаклатэк, ворттӥз. Со учкиз книгаяз, мон — со шоры. Куддыр гинэ, малпаськыса кадь, ӝутылӥз синзэ укное, шундыен пыжем вож турынэз, сюрес дурысь куакъёслэсь оазисъёссэс синйылтылӥз. Одӥг-кык пол чебер, сӥлё-виро киыныз баблес мертчан-ӵужо йырсизэ тупатъяз (вагонын, кызьы верай ни, пӧсь но ӝокыт вал). Ымныраз пичи гинэ нюламез потӥз — ымнырыз ӵыжыт груша кадь пиштыны кутскиз.

Со куспын тыбыр сьӧрам одӥг-ог сачкетъязы жоб кылъёсты — соослэсь пель гинэ уз шуя, быдэс мугорыд ик купырскоз. Нош мар меда шудэ вадьсысьтым пукисьлэн пеляз? Шат быгатэ отын кыӵе ке урод крезьгур луыны? Уг. Сыӵе юг-юг дэрем нуллӥсь муртлэн йыраз чебер гуръёс гинэ тулкымъясько, ха-ха.

Нош собере огаз бадӟымгес станциын «этнограф» шуак сарбазэ васькытӥз но ури-бери потӥз. Кызьы! Малы? Сыӵе ӝог!.. Ыштонме валаса но ӧй вутты — состав, азьлань ворттыса, дыректӥз ни. Вагонын огнам кыли кадь. Азям но, берам но пукисьёсты ӧй ни шӧды. И марлы мон со чебер пилэсь номыр юаны ӧй дӥсьты? Ӧй тодматскы соин… Ведь удмурт калыклэн сямыныз тунсыкъяське вал, нош тани мон, улэп удмурт, тон азьын ик пукисько! Оло, солы вашкала удмуртъёс гинэ тунсыко… Табере уд тоды ни.

Вуоно станция — мынамез. Учкисько но — ӝажы вылын пияшлэн кепкаез вуныса кылем. Ой! Киме сузьтӥ но кырми сое. Аслым каро. Мар меда гожтэмын? FLOW festival, пе. Ну, всё… Поезд улэ гинэ куштӥськыны кылиз на! Финляндиысь огез тужгес но мотор крезьгур фест ук та.

Вагонысь потӥ. Кепкаен шонаса, гуртэ пала васькисько. Электричкаын фин пияшен тодматски но, кепказэ кузьмаз, шуо.

Так ке, со Санкт-Петербургысь но луыны быгатэ, огшоры ӟуч пи.

Ярам ни. Коть удмурт!

Поезд кошкиз-кельтӥз.

Нош кепкаез ачиз зыно…

Эх!..

Вот ведь кыӵе флоу*: зын лӧсъяське, крезьгур чузъяське, адями кошкем бӧрсьы но малпанъёс ӧръясько, мылкыд ӝутскемын!

Обряды и поверья удмуртского народа, пе. Осто, мае но уд адӟы вылэм.

Азяз фин книгаме коть поттоно вал. Уськытоно вал выж вылэ, мед адӟоз. Тодматскыны муг луысал!

Мар меда каре со асьме палъёсын? Неужто выжыез татысь?

Ярам ни. Флоу но флоу. Ортчиз. Быриз.

Нош FLOW фестивале ветлоно луоз. Юнме-а, мар-а таӵе кузьым?

Кепкаез йырам поныса, йӧно вамыштӥ урам кузя.

*Флоу — тулкым, ӧр; рэп сленгын — подача, астэ возьматон

Удмурт Дунне
By Удмурт Дунне Июнь 21, 2018 17:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*