Алнашысь «Ошмес син» кружок «Усьтӥськись пучыос» бичетэныз тодматскон ӝыт ортчытӥз

Удмурт Дунне
By Удмурт Дунне Июнь 19, 2018 16:28

Дышетскон ар йылпумъяськемен валче берпуметӥ ужрадзэ ортчытӥз ёросысь егит гожъяськисьёслэн «Ошмес син» кружоксы. Таяз учыре люкаськизы ёросысь школаосын дышетскисьёс но азьвыл аръёсы та кружоке ветлэмъёс.

Ужрад кутскиз Туймыйыл школаысь удмурт кылъя но литературая дышетӥсен Татьяна Пчельниковаен тодматскон бордысен. Егит дыръяз со но «Ошмес син» огазеяськонэ ветлэм, соку дышетӥсьёссы вылӥллям тодмо кылбурчиос Иосиф Иванов но Иосиф Бобров. Кружокын басьтэм тодон-валанъёсыз Татьяна Анатольевналы улоназ туж кулэ луизы. Ёрос газетын, культура удысын ужаз, берло аръёссэ пиналъёсты дышетэ, ачиз но кылбуръёс гожъя (тросэз кырӟанлы пӧрме), пиналъёслы гожъяськон мылкыд пыӵатэ.

«Ошмес син» кружоке ветлӥсьёс тодматскизы на «Усьтӥськись пучыос» бичетэн. Отчы пыртэмын кружоке ветлӥсь пиналъёслэн усто ужъёссы: кылбуръёс, веросъёс, выжыкылъёс. Сое радъян бордын тыршизы Алнашысь А. Оки нимо музейын ужась Мария Петрова но кылбурчи Лидия Нянькина, нош книгаез поттыны юрттӥз Кун Кенешлэн депутатэз, «Удмурт Кенеш» огазеяськонлэн кивалтӥсез Татьяна Ишматова. Алнашъёс сборникенызы гинэ буйгатскыны уг малпало, мытэм ужзэс азинтыны медо.

Людмила Сурчакова, Алнаш ёрос

Удмурт Дунне
By Удмурт Дунне Июнь 19, 2018 16:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*