Алабгоын удмуртъёслэн 1-тӥ ӧтчамазы пыриськем делегатъёс

Удмурт Дунне
By Удмурт Дунне Июнь 20, 2018 13:30

Алабгоын удмуртъёслэн 1-тӥ ӧтчамазы пыриськем делегатъёс

Азьланьтӥськом тодматонмес.

Иосиф Андреевич Волков — вордскемын Глазов ёросын, йылпумъямын Глазовысь пиосмурт гимназиез. 1919-тӥ арын июне юнматэмын Алабгоысь Вотской педагогической курсъёслы заведующие. 1919-тӥ арын июле Трокай Борисовен ӵош «Гудыри» газетэз дасяз. 1921-тӥ арын Казаньысь университетэ дышетскыны пыре, азьланяз татын аспирантураын дышетске. Нимыз пыртэмын 1929-тӥ арын потэм «Адресная книга ботаников СССР» нырысетӥ бичетэ. Бӧрысь дышетсконзэ азьланьтӥз Ленинградын — Растениеводствоя всесоюзной институтын. Быдӟым ож вакытэ куриськиз фронтэ, но тазалыкез лябен отчы ӧз басьтэ. Улонысь кошкиз 1952-тӥ арын.

Гаврил Николаевич Гусев.

Гаврил Николаевич Гусев — Киров улосысь удмурт, вордскемын 1896-тӥ арын. 2-тӥ армилэн штабаз удмурт солдатъёс пӧлын политрук выллем вал. 1918-тӥ арын октябре Максим Прокопьев (со вакытэ Пермь губерниысь Оса уездысь депутатъёслэн Советазы быръемын вал) вераськиз 2-тӥ армилэн штабеныз Гаврил Николаевичез нимысьтыз должносте юнматыны — Сарапул уездын политика ужез нуись эмиссар карыны.

Гаврил Гусев удмуртъёслэсь 3-тӥ ӧтчамзэс дасянъя оргкомитетын но, делегат но вал. Ӧтчам ортчиз 1919-тӥ арын 25-тӥ-29-тӥ октябре. Гусевез бырйизы Удмурт комиссариатэ. Ӧтчамлэсь ужкагазъёссэ Москвае нуыны делегатъёс оскизы Т. Борисовлы но Г. Гусевлы. Отын исторической пумиськон ортчиз. Соос тодӥзы Иосиф Наговицын сярысь. Со Москваын профсоюзъёсын ужа вылэм.

Удмуртъёслэн ӧтчамазы комиссаре быръем Т. Борисов аслаз должностяз дэмла И. Наговицынэз. ВКП(б)-лэн ЦК-ез Борисовлэсь ӵектэмзэ лыдэ басьтӥз. Озьы витьымтэ шорысь И. Наговицын Удмуртиен кивалтонэ вуэ.

Нош Гаврил Николаевич ужаз облисполкомын, куке Т. Борисов кивалтӥсь вал (1925-тӥ-1926-тӥ аръёсы).

Берлогес, Т. Борисов Удмуртиысь кошкем бере, Г. Гусев дышетскиз Удмуртиысь Вылӥ коммунистической сельхозшколаын. Отын дасязы колхозъёслы тӧроосыз. Ужаз вордскем палъёсаз.1941-тӥ арын Быдӟым оже куриськиз. Дораз кылизы Анисия Михайловна кузпалыз но нылпиосыз — Гаврил, Владимир, Лидия.

Г. Гусев ивортэк ышиз Быдӟым ожын 1942-тӥ арын.

Елизавета Игнатьевна Ефимова.

Елизавета Игнатьевна Ефимова вордскиз 1890-тӥ арын Кукмор ёросысь Нырья черкогуртын. Йылпумъяз Казаньысь учительской семинариез.

1909-тӥ арын вуиз Можга ёросысь Кватчи школае. Дышетӥз покчи классъёсты.1922-тӥ-1926-тӥ аръёсы шутэтскон нуналъёсы ветлылӥз Можга черкогуртэ. Татын пумиськылӥз Можга педтехникумын дышетскисьёсын М. Коноваловен, Г. Медведевен, М. Тимашевен. Та пумиськонъёсы вуылӥз Вера Толстая.

1929-тӥ арын Е. Ефимова Можгаын НКВД-ын ужасьлы Б. Вавиловлы бызиз. 1938-тӥ арын картсэ Алнаш ёросэ ужаны келязы. Отын Ефимова Варзи-Ятчи школаын ужаз. Елизавета Игнатьевна Николай Байтеряков поэтлэн нырысетӥ дышетӥсез вылэм, кылбурчилэсь нырысетӥ чуръёссэ но эскерылэм.

1939-тӥ арын Кремльын Елизавета Ефимовалы Ленин орден сётӥзы — удмурт кыллы дышетӥсьёс пӧлысь нырысетӥез адями, кин дунъямын вал таӵе данъетэн.

Быдӟым ож вакытэ ужаз Можгаысь 3 номеро школаын. Кулӥз 1980-тӥ арын Можгаын.

Николай Кузнецов

 

Удмурт Дунне
By Удмурт Дунне Июнь 20, 2018 13:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*