Видеоблог лэсьтыны могтӥськон

Удмурт Дунне
By Удмурт Дунне Май 17, 2018 17:21

Ветло вераськонъёс, удмурт кылын видеоблог усьтӥськоз шуыса. Ойдолэ азьло кенешомы, мар со видеоблог но малы со кулэ.

Кӧня ке ар талэсь азьло видеоблогеръёс шоры шузи-мазиос шоры кадь учкылӥмы. Сылэ камера, вадьсаз пуке егит нылаш яке пияш но малпанъёссэ вера, эшшо, кулэ-а, ӧвӧл-а, олокыӵе но сленговой кылъёсты пыртылэ. Али со карикатурной тусэз вунэтӥськомы ини. «Ютубетӥ» калгыса, валаськомы, та вотэс бам аспӧртэм платформа луиз шуыса. Отын котькуд адями быгатэ кыӵе ке проект кылдытыны. «Видеоблогер» валатон но паськытаз, али со «тележурналистэн» ваче вамышъя. Кылсярысь, тросэз журналистъёс телевизорысь вотэсэ пегӟо. Отын, пе, коньдон тросгес поттыны луэ, «озьы я тазьы кар» шуисьёсыз но ӧвӧл.

Тани ар талэсь азьло вотэсэз бугыртӥз Юрий Дудь. Абдрано кадь, вотэсын ӵемысь вакчи гожтосъёсты, вакчи видеоосты гинэ учкиськомы, нош татын час пала кыстӥськись интервьюос 7 миллионлэсь трос просмотр люкало. Бен, дышем интервьюослэсь но телепередачаослэсь «вДудь» каналлэн выпускъёсыз висъясько: татын пӧртэм темаосты ӝутыны уг возьдасько. Лэсьтэмын рос-прос, быдэс командаен. Шуыны луоз, Дудь тележурналистикаез вотэсэ поттэ, интервью жанрен калыкез мургес тодматэ. Тросэз ютуберъёс видео кылдытон борды умой-умой кутско. Со выль индустрия, кудӥз, нуналысь нуналэ аслэсьтыз аудиторизэ будэтыса, тӧлпери кадь пыре учкисьлэн улоназ.

Солэн аслаз жанръёсыз но кылдо. Со сярысь, дыр, студентъёс быдэс дипломной уж но пӧрмытыны быгатысалзы. Кылсярысь, влог — улонысь видеосуредъёс, «мон адӟисько, малпаськисько» шуыса лэсьтӥсько; вайн — вакчи серемес видео; пранк — розыгрыш, тодӥськоды на-а, азьло телевизоретӥ возьмато вал «Вас снимает скрытая камера» выллем передачаосты, туж соослы кельше; эшшо паськыт вӧлмиз на бьютиблог, отын нылашъёс (бен, пияшъёс но) буяськыны, йырси кутыны дышето. Пӧртэм челленджъёс, коллаборациос сярысь, дырдэс быдтыса, ум вералэ ни.

Нош удмурт учкисьлэн улоназ анай кылыныз видеоблог пыроз-а? Малпаськоно ке, видеоблог нергеосты кылдытыны могтӥськонъёс вал ни, кылсярысь:

— «MTV-Udmurtia» огин. Солэн пуштросэз кылдӥз пӧртэм аръёсысь но интыосысь шедьтэм видеоосын, нош выль, юри блоглы дасям материал ӧз вордскы.

Та бамъёсын видеоос пото туж шер. Валамон ини, видео лэсьтыны трос дыр но усто техника кулэ. Со ик шугъяськытэ, дыр. Со гинэ-а?

Мар веранэз видеоблог сярысь, куке асьмелэн огшоры блог гинэ но ыше ни ке. Азьло ваньзы мыло-кыдо верасько вал «Удмурт блогиня» вожвылъяськон сярысь, куспазы кенешо, кинлэн блогез тунсыкогес, кин мае лыдӟе. Озьы «Шунды» огазеяськонлэн «Вамыш» лагеряз но журналистикалы сӥзем сменаын егит блогеръёсты будэтыны тыршизы. Зор бере губи кадь потӥзы выль бамъёс, нимъёс. Кызьы потӥзы, озьы ик быризы. 1-2 гожтос бере ваньмыз кысӥз.

Но тае, дыр, валэктыны луэ социальной сетьёслэн азинскеменызы но. Али капчигес гожтыны малпанъёстэ «ВКонтактеын» я «Инстаграмын», соку тонэ тросгес адями но адӟоз, лайкъёсъя но вераны луоз, яра-а калыклы. Тани «Дартлэн» кылем номераз но удмурт инстанылъёс сярысь гожтӥмы вал.

Оглом учкыса, али удмурт Интернет мӧзмыт луэмын. Тросгес кыӵе ке официальной информация, иворъёс, нош малпанъёс, споръяськонъёс, тунсыко пабликъёс мырдэм вордӥсько. Шер адӟод постъёсты, кудъёсыз улын 2-3 ке но комментарий гожтэмын.

Мар шуоно? Ваньмыз асьме киын. Ӧвӧл витёно кушаса сётэмез, аслыд лэсьтоно туала улонэз. Оло, ӵапак вуоно видеоблогер али, та кылъёсты лыдӟыса, кутоз камеразэ но усьтоз «Ютуб» каналзэ.

Мария Емельянова

Удмурт Дунне
By Удмурт Дунне Май 17, 2018 17:21