Ува ёросын Гуждор сямез ортчытӥзы

Удмурт Дунне
By Удмурт Дунне Май 15, 2018 11:42

Гуждор — вашкала удмуртъёслэн одӥгез бадӟымез вӧсяськонзы. Та сямез ортчыто вал тулыс, гондыр сайкам бере. Туэ Гуждорез ортчытӥмы 6-тӥ куартолэзе Тукля воршудлэн вӧсяськон интыяз, Ува ёросысь Чабишур гурт котырын.

С. Антонов

Ува ёросысь удмуртъёс тулыс вӧсяськон орчытъяло, Мудор пужымзэс сӥлы карыса.

Вазь ӵукна ик, ува калык люкаськытозь, йылолэз ортчытыны ваньмыз дась вал ини: тылскемын, ӝӧкъёс пуктылэмын, 3 пуртыосын сиён пӧзьтэмын. Вылӥ Инмарлы — тари кеньырен, вӧйын ӝук, Куазьлы — суро кеньырен ӝук, Кылдысинлы — чорыг лым.

Ваньмыныз кивалтӥз Пекшурысь воргорон Василий Михайлович Тратканов. Со кадь вашкала сям-йылолъёсты тодӥсьёс шаерамы чиньыен лыдъямон.

Вӧсяськон кутскемлэсь азьло калык курбонлы ваем сиён-юонзэ музъем вылэ вӧлдэм ӵушкон вылэ тыриз. Нырысь ик Вылӥ Инмарлы вӧсяськон ортчиз. Вӧсяськисьёс тари ӝукез, курбон нянез, шунтэм вӧез тылскем вылын возизы. Инмарлы вазиськыкузы, сиёнэз тылскеме пичиен куязы. Мед, пе, солэн ческыт зыныз вылӥе ӝутскоз, мед Инмар шӧдоз, шумпотоз, сое уг вунэто, гажало шуыса. Инмарлы йыбыртъяса, вӧсясьёс 3 пол котырскизы тылскем котыртӥ. Ваньзы куронъёссэс веразы.

Та бере азинтӥзы Куазьлы куриськон йылолэз. Ӝукен, нянен, вӧйын вылӥ мычон ортчытӥзы: инкуазьлы тау кылъёс вераса, одӥгез вӧсясь пагӟаетӥ тубиз, 400 аръем Мудор пужымлэн зӧк ваяз кузьым — нянь — понӥз. Та бӧрсьы куронъёсын вазиськизы Куазьлы. Вашкалаосмы сямен ик, вӧсясьёс куризы киземъёссэс утьыны, дыраз шунытсэ, зорзэ сётыны, лудъёсын кизем юос мед удалтозы, Куазь калыкмес сильтӧлъёслэсь, йӧзоръёслэсь мед утёз шуыса.

Собере черод вуиз пеймыт дуннеысь Инмарлы, Кылдысинлы, вазиськыны. Тазэ йылолэз ортчытон понна басьтӥзы чорыг лым, нянь но шунтэм вӧй. Пу куен (лопата) гоп лэсьтыса, отчы чипей йырез согизы. Удмуртъёс одно ик та чорыгез куто вылэм. Котькудӥз вӧсясь ас валамезъя, ас тодэмезъя, ас кылъёсыныз вазиськылӥз Кылдысинлы. Кин ке куриз, пудо-животсы мед удалтоз, скалзы йӧло-вӧё мед луоз шуыса. Мукетъёсыз — нылпиоссы мед вордӥськозы-будозы, паръёссэс шедьтозы, шудо-буро улозы. Куинетӥосыз куризы ванё-буро улон, ваньбурзы семьязылы, выт тырыны, калыкез куноятыны мед тырмоз шуыса.

Йылоллэсь ортчемзэ адӟыса, эшшо но золгес данъяськыны кутскиськод вашкала ӵыжы-выжыосынымы. Кыӵе соос нодлыкоесь, визьмоесь вылӥллям, кызьы соос дуннеез валаса, инкуазез чакласа улӥллям. Жаляса верано, туала удмуртъёс таӵе бадӟым сям-йылолъёслэсь палэнско ни. Тани туэ но Мудор пужым доры трос ик калык ӧз люкаськы. Оло кезьытлэсь кышказы, оло анай кылмылэн ӵуказе нуналыз асьмеды уг сюлмаськыты ни…

Куриськон-вӧсяськон йылпумъяськем бере вӧсясь тӧро ӧтиз вань калыкез ӝук сиыны. Луоз шат Гуждор геры поттонтэк! Калык геры бере кылдэм бороздае йыды, курегпуз куяз. Собере нылпиос курегпузъёсты питыръяса шудӥзы, круген ветлӥзы. Йылпумъяськиз Гуждор Мудор пужымлы чукъёсын, лентаосын курбон сётонэн, тау каронэн, йыбырттонэн.

Нырысь ик бадӟым тау Надежда Родионовна но Геннадий Евгеньевич Сидоровъёслы. Кузпалъёс вылэ котьку но вань секытэз усе: калыкез люкан, тӥрлык, техника сярысь сюлмаськон, октӥськон-калтӥськон. Удмурт сям-йылолъёсты радъянэ котьку мылкыд карыса пыриське Василий Тратканов. «Удмурт Кенешлэн» ёрос ёзэзлэн тӧроез Геннадий Сидоров, юн гажамзэ возьматыса, Василий Михайловичлы та ужрад дыръя чебер куэм дэрем кузьмаз.

Арлы быдэ калыклэсь мылкыдзэ ӝуто «Купанча» ансамбльысь артистъёс но. Гуждоре пыриськытэк уг кыльы тодосчи Альберт Разин. Вашкала ӵыжы-выжыосмылэн улэм-вылэмзы сярысь со трос выльзэ, тунсыкозэ маде.

Сергей Антонов

Удмурт Дунне
By Удмурт Дунне Май 15, 2018 11:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*