Удмуртъёслэн нырысетӥ ӧтчамазы пыриськиз егит дышетӥсь Анисия Николаевна Урасинова

Удмурт Дунне
By Удмурт Дунне Май 21, 2018 14:56

Т. Урасинова анаезлэн Анисия Николаевналэн портретэз азьын.

Россиысь удмуртъёслэн нырысетӥ съездазы пыриськисьёс пӧлын нылкышноос трос ӧй вал. Соос пӧлысь огез — егит дышетӥсь Анисия Николаевна Урасинова.

Анисия Николаевна вордскемын 1894-тӥ арын Кестым волостьысь Пичи Юнда починкаын. Урасиновъёслэн семьяязы 5 нылпи вал.

1903-тӥ арын Урасиновъёслэн бубызы кулӥз ке но, пиналъёсты дышетыны тыршизы. Анисия вамыштӥз Ягошурысь (али Балезино ёросысь Юнда черкогурт) церковно-приходской школае. Татын со 2 ар ӵоже тодон-валан люкаса вуттӥз. Леонтий агаез но солэн Августа кышноез дышетӥсьёс вал. Соос валазы, Онисьлэн ӟуч кылын тодон-валанэз лябгес шуыса. Озьы нылашез Ягошурысь ик земской училищее выжтӥзы — татын пӧртэм предметъёсъя мургес тодон-валан сётылӥзы. 4 классэз йылпумъямез бере келязы Глазовысь нылкышно гимназие. Татын Анисия 7 ар дышетскиз. Аслаз мылкыд каремезъя ветлӥз педагогикая курсъёсы — озьы покчи классъёсты дышетыны луонлыкез кылдӥз.

Собере дышетӥз пӧртэм школаосын, 1917-тӥ арын Извиле ужаны келямын вал. Татын дышетӥсь егитъёс пӧлын валэктон уж нуылӥз. Со сярысь тодаз вайылӥз солэн племянникез, Михаил агаезлэн пиез Варсанофий Урасинов: «Анисия, Извильысь Юнда починкае бертыкуз, калыклэсь ватскыса, азьветлӥсь егитъёсты люкалляз. Бускель гуртъёсысь но вуылӥзы. Милям коркаямы люкаськылӥзы, монэ пӧлазы ӧз пыртылэ, мар сярысь вераськемзэс но уг тодӥськы».

1918-тӥ арын Анисия Николаевнаез вордскем палъёсаз Ягошурысь земской училищее ужаны ыстӥзы. Котькытын но егит дышетӥсь туж чупрес басьтӥськылӥз уж борды. Озьы 1917-тӥ арын со делегат луыса ветлӥз Казане Поволжьеысь ӧжыт лыдъем калыкъёслэн съездазы. 1918-тӥ арын Пичи Юнда починкаын Анисия Николаевна нылпи сад но усьтӥз — гожъязы, Удмуртиын та нырысетӥ сад вал шуыса.

1918-тӥ арын Урасиноваез Алабгое удмуртъёслэн нырысетӥ съездазы бырйизы.

«Казане но Алабгое ветлыса, мон валай, ми табере инородецъёс ӧвӧл ни. Сыӵе ик правоен гражданъёс луимы. Азьло ми анай кылынымы вераськыны но возьдаськимы, нош табере йырам малпан вуиз удмурт кылын спектакль пуктон сярысь. Огкадь право басьтӥмы, но тросэз ӧз но тодэ, ӧз но валалэ, мар соин карыны», — гожтӥз Анисия Николаевна тодэ ваёнъёсаз.

Малпанзэ дышетӥсь быдэстоно кариськиз — удмурт кылэ берыктӥз Лев Толстойлэсь «От ней все качества» пьесазэ. Спектаклез нырысьсэ возьматӥзы Юндаын 1918-тӥ арын 2-тӥ августэ.

1919-тӥ арын Вотка областьысь политпросвет Анисия Николаевнаез Вяткае ыстыны чаклаз — губерниысь дошкольной курсъёсы, но талы люкетӥз Колчакен ожмаськон. Собере Анисия бызиз Иван Петрович Волковлы. Картэз военной комиссар луыса ужаз Ягошурысь волостной исполкомын. Кӧня ке дыр ортчыса, волисполкомъёсты быдтӥзы — Волковез юнматӥзы Алтай улосысь Бийскысь военкомат борды. Но семья отчы ӧз кошкы.

«1921-тӥ арын шаерамы сютэм аръёс тупазы. Дышетӥсьёслы нырысь 8 кило сезьы пызь сётъязы. Нош 1922-тӥ арын воксё ӧз ни сётэ. Уждун тыризы 1 миллион манет — солы пуд картофка гинэ басьтыны луылӥз. Собере пиналъёс школае ветлэмысь дугдӥзы, дышетскон ар мартэ ик быриз.

Туж секыт вал сютэм аръёсты чиданы. Турын-куар сиыса улӥмы, няньмы пул пызен суро вал. Картэлэн бубыезлэн хозяйствоез туж пичи. Соин малпамы Сибирь пала кошкыны. Сётӥзы поездэ льготной билет. Товарной вагонын 2 арня мынӥмы. Секыт вал вордскем палъёсын, ӵыжы-выжыосын люкиськыны. Мон али но вань сюлмыным Удмурт шаереным ӵош», — гожтӥз Анисия Николаевна тодэ ваёнъёсын тетрадяз 1967-тӥ арын.

Алтае вуизы 1922-тӥ арын сӥзьыл. Татын егит семьяез умой пумитазы, ог 10 школае инты ӵектӥзы. Нош бырйизы тужгес матысьсэ — Анисия Николаевналэн сьӧраз вал 2 аресъем Юра пиез но картэзлэн мумиз.

Озьы удмурт дышетӥсь Алтай улосысь школаосын 42 арлэсь ятыр ужаз, со пӧлысь 15 арзэ — кивалтон удысын. 1949-тӥ арын Анисия Николаевналэн ужамез дунъямын Ленин орденэн.1956-тӥ арын дано дышетӥсь пенсие потӥз. Улоназ ваньмыз туж ик капчи ӧз радъяськы. 1943-тӥ арын Быдӟым ожын ивортэк ышиз Юра пиез. 1953-тӥ арын кулӥз кузпалыз. Ярам, вӧзаз котьку вал Тамара нылыз. Со но мумизлэсь удыссэ бырйиз — дышетӥсь луиз.

Анисия Урасинова вордскем палъёсаз 2 пол вуылӥз на. Нырысьсэ — кошкемез бере 40 ар ортчыса — 1962-тӥ арын. Балезино станциын сое пумитаз Миша агаезлэн пиез Варсанофий. Азбаре пыриз лапеггес мугоро мӧйы кышномурт. Вылаз пурысь костюмен, йырсиез вакчи вандэмын.

«Ӟечбур, энчей!» — бесерман сямен вазиськиз Анисия Николаевна кенакезлы Акулина Васильевналы. Анисия Николаевна туж огшоры, капчи мылкыдо вал. Тыршиз удмурт кылынгес кенешыны. Ӵыжы-выжыосыз сое коркась корка куно карыса нуллӥзы. Мон соку туж егит вал на. Таӵе дано адямиен пумиськонлэсь значенизэ ӧй вала. Вераськонъёсы пыриськыны ӧй туртты, но ваньзэ туж сак кылзӥ.

2 ар ортчыса, Анисия Николаевна вуиз Тамара нылыныз ӵош. Нош 1969-тӥ арын улонысь кошкиз ни. Ватэмын Алтай улосысь Старая Ажинка черкогуртын.

Тамара Ивановна Удмуртие вуылӥз на 1994-тӥ арын — соку мумизлэсь 100 арессэ пусйимы. Юндаысь шаертодонъя музейлы Тамара котьку но юрттылӥз — бандерольёсын туспуктэмъёс, документъёс, тодэ ваёнъёс ысъялляз.

Табере Тамара Ивановна но ӧвӧл ни — улонысь кошкиз 2004-тӥ арын. Урасиновъёслэн-Волковъёслэн Алтай крайын выжызы азинске. Татын Тамара Ивановналэн 2 пиосыз но внукъёсыз уло.

Ангелина Урасинова.
Балезино ёросысь Юнда черкогурт

Удмурт Дунне
By Удмурт Дунне Май 21, 2018 14:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*