Удмуртия пыриськоз Санкт-Петербургысь калыккуспо экономической форуме

Удмурт Дунне
By Удмурт Дунне Май 17, 2018 10:50

Сочиын ортчем форумын кадь ик, Удмурт сэрег 3-лы люкиськоз: «Сделано в Удмуртии», «Инвестируй в Удмуртию», «Удмуртия заряжает».

Со ортчоз 24-тӥ-26-тӥ куартолэзе. Асьме делегациез валтоз Удмуртилэн Тӧроез Александр Бречалов.

— Та форумысен ми малпаськомы 10-лэсь уно огкылъёс кутыны, — пусйиз Александр Владимирович. — Та выллем форумъёслэн пайдазы бадӟым, сое возьмато кылемаз форуме ветлэммылэн емышъёсыз. Соку Удмуртия но ВТБ банк валче ужаны кенешизы, озьы банк 100-лэсь уно ужбергатӥсьёсмылы пичи дунын кредитъёс сётъяз.

Форумысен адямиос тодматскыны быгатозы шаермылэн вань кужмо палъёсыныз, тужгес но яркыт адӟытэмын луозы промышленность но IT удыс. Сочиын ортчем форумын кадь ик, Удмурт сэрег 3-лы люкиськоз: «Сделано в Удмуртии», «Инвестируй в Удмуртию», «Удмуртия заряжает».

«Калашников концерн», Ижысь механической завод, мотозавод, «Купол», радиозавод нырысьсэ возьматозы огшоры калыклы потӥсь вузъёссэс.

Шаерамы уно проектъёс, кудъёсыз палэнысь уксё кыскыны быгато. Соосын туала сямен тодматскыны луоз: адямиос юромо дасям изьы дӥсялозы но «ватсам дунне» амалэн — син азязы улӟозы видеосуредъёс — тодматскозы.

Озьы ик возьматэмын луозы спортэн, туризмен герӟаськем ужрадъёсмы. Татын ужалозы шаерысьтымы спортсменъёс Вероника Сафина но Иван Черезов.

Удмуртилэн делегациезлэн бадӟым малпанъёсыз: форумысен со чакла инвесторъёсын но заказчикъёсын 100-лэсь уно пумиськонъёсы вуылыны.

Сергей Захаров
Туспуктэм: udmurt.ru

Удмурт Дунне
By Удмурт Дунне Май 17, 2018 10:50