Татарстанысь удмуртъёслэн автономизы: Ужпум пуктэмын, сое быдэстоно

Удмурт Дунне
By Удмурт Дунне Май 16, 2018 10:02

Татарстанысь удмуртъёслэн автономиенызы быгатыса кивалтэ Андрей Герасимов. Россиысь фин-угор калыкъёслэн ассоциациязы но Татарстанын улӥсь удмуртъёслэсь сюлмаськонъёссэс шараяны юрттэ.

Татарстанысь удмуртъёслэн
автономиенызы кивалтӥсь
А. Герасимов.

Андрей Герасимов вордскемын Кез ёросысь Мысы гуртын, отӥяз улэмын Балезино ёросысь Андрейшур гуртын, нош 14 аресаз солэн семьяез улыны выжем Татарстанысь Бавлы ёросэ. Анаез — шаерысьтымы уйпал ёросысь, нош атаез — бигер шаерысь. Со дырысен 30 арлэсь трос ортчиз ни ке но, Андрей Сергеевич Балезино ёросысь школазэ туннэ но тодаз вае. Ӵапак со школаын дышетскыкуз, Атыкай музъемез яратон мылкыд пыӵатӥллям дышетӥсьёсыз.

Бугурусланысь лётной училищеын дышетскыса, 3 ар лётчикын ужаз, отӥяз тодон-валанъёссэ эшшо будэтӥз. Ужбергатон но калыкен кивалтон удысъёсын ужан вылысь нимысьтыз тодон-валан басьтӥз. Сэзь луэмзэ шӧдыса, Татарстанысь удмуртъёс сое асьсэлы азьветлӥсе бырйизы. Ужан амалъёсыз туж огшоры кадь, но туж азинлыко. Та вакытэ Татарстанын улӥсь удмуртъёслэн лыдзы 23 сюрс 400 котыр. Данъяськымон, 13 нылпи садын но 27 школаын удмурт кылэз дышето.

— Калыкен ӟеч кусыпъёс ӧд возьы ке, кыдёке уд вуы, — шуэ Андрей Сергеевич. — Удмуртлыкез азинтонъя 2025-тӥ арозь чаклам план гожтӥмы. Табере сое уж вылын быдэстон сярысь сюлмаськиськомы. Татарстанысь 11 муниципал кылдытэтъёсын данак удмуртъёс уло. Араз 2 пол гуртъёсы потаськомы. Со ужрадъёсы, удмуртлыкез азинтӥсьёсты сяна, кивалтон удысын ужасьёсты, муниципал кылдытэтъёсын кивалтӥсьёсты ӧтчалляськомы. Сюлмаськытӥсь ужпумъёссы вань ке, пумиськон дыръя ик ваньзэ сэрттыны-пертчыны тыршиськомы.

Кылем сӥзьыл Андрей Герасимов вормонэн бертӥз Пермь городын ортчем Россиысь калык огазеяськонъёслэн форумысьтызы. Отчы со «Кызьы утёно но азинтоно ас калыкедлэсь культуразэ» проектэныз пыриськиз. Басьтэм вормонэныз Андрей Герасимов уг буйгатскы, быдэстоно ужъёс трос на, шуэ. Туэ гужемлы но малпанъёссы бадӟымесь. Кылсярысь, Балтач ёросын Гыронбыдтон элькун шулдыръяськон ортчытыны дасясько. Ӵапак со вакытэ Татарстанын мыноз футболэн шудонъя дуннелэн чемпионатэз. Уно калык лыктоз, соос вуылозы удмурт празднике но пичи ке но тодматскозы асьме культураенымы.

Валентина Емельянова
Туспуктэм: udm.abbnt.ru

Удмурт Дунне
By Удмурт Дунне Май 16, 2018 10:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*