Шаркан ёросысь возёсъёс 50 миллион манетсэс ыштӥзы

Удмурт Дунне
By Удмурт Дунне Май 7, 2018 11:50

Ческыт сюдод — трос йӧл басьтод.

Кылем арен ӵошатыса, туэ нырысетӥ квартал понна Шаркан ёросысь хозяйствоос 800 тонналы уногес йӧл кыскизы. Но йӧл дун усемен, 50 миллион манетсэс ыштӥзы.

— Ёросамы 1 литр йӧллэн шоро-куспо дуныз 18 манетозь вуэмын, — вера Шаркан ёрос йырлэн воштӥсез Пётр Князев. — Кылем арын та вакытэ заводъёс 27 манетэн йӧл басьязы. «Восход», «Ошмес», «Исток», «Кипун» хозяйствоос, Собин фермер зол ужало. Соин ик йӧл но люкаськиз, скал уллё но ог 200 йырлы йылӥз. Но таослы но берганы капчи ӧвӧл. Ёросысьтымы хозяйствоослэн вань поттэм барышсы пӧлысь 80 процентэз йӧллэсь луэ угось. Нырысетӥ квартал ӵоже 270 миллион манет тыр йӧл вузамы — кылем арын сярысь, со 90 процент гинэ. Бадӟым хозяйствоос возисько ик. «Ошмес», «Восход» хозяйство, Собин фермер Пермь улосысь Нытва палась йӧл заводэн кусып тупатӥзы. Пермьёс угось 1 литр йӧлэз шорлыдын 22 манетэн басьто. Пичи хозяйствоос Воткаысь заводэ сяна мыныны уг быгато. Нош таиз йӧл понна уксё тырыны уг быгаты. Кылсярысь, «Исток» хозяйстволы ик ог 5 миллион манет тыр пунэмез люкаськемын.

Пётр Князев верамъя, туннэ тужгес секыт югдур «Зарни шеп» но «Мир» хозяйствоосын. Берлоез воксё но куашкан калэ вуэмын, банкротэн ялэмын. Гурт удысъя но сиён-юонъя министерство ляб хозяйствоосты юнъёсыныз огазеяны медэ. Но та 2 хозяйствоос огпалан ужало бере, кудзылы кин юрттоз? Огазеяса но толыкез уз луы.

— Кудзэ ке али пытсад ке, сопалась гуртъёсын улон воксё секытомоз, — шуэ Пётр Евгеньевич. — Хозяйствоослы кызьы ке ӝутӥськыны юрттыны кулэ. Соос угось нылпи садъёсты но возьыны юртто, сюресъёсты но сузяло, калыклы уж но сёто.

Туннэ ёросын 14 хозяйство. 52 фермеръёс. Ваньзы али кыштыр дасясько бусые потыны. Зэм, кизён ужъёсты быдэстыны 40 процент топливозы уг окмы ай. Но таиз пумысен сокем ик уг куректо. Вуттом, шуэ Пётр Князев. Чакламын ог 51 сюрс гектар бусыосты утялтыны, ӝыныяз трос аръем турынъёс будо. 16 сюрс гектар вылэ ю-нянь кизёзы, ог 4 сюрс гектар вылэ — кукуруза. Кылемзэ одӥг аръем турынъёс улэ висъялозы.

Елена Сараматова

Удмурт Дунне
By Удмурт Дунне Май 7, 2018 11:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*