Шаерысьтымы нюлэсэн вырисьёс огазеяськозы. Кызьы?

Удмурт Дунне
By Удмурт Дунне Май 7, 2018 12:20

Удмуртиын нюлэс поттӥсь, солэсь вузъёс лэсьтӥсь предприятиосты огъя кластере огазеяны чакламын. Со юрттоз предприятиослы золгес азинскыны. Та сярысь, Ува ёросэ вуылыкуз, вераз Правительстволэн Тӧроезлэн воштӥсез Александр Свинин.

Ува ёросын тэлен выре 4 предприятие.

Ува ёросын гинэ нюлэсэн вырись 4 предприятие вань. Ваньмаз вуылӥз, ужамзэс, азинскемзэс эскериз, сюлмаськонъёссэс кылзӥз Александр Свинин.

«Восток-ресурс» пул вандэ, кор вӧлэ, соосты басьто корка, мунчо, коттедж ӝутыны. Предприятие 2012-тӥ арын гинэ ужаны кутскиз ай, но тодмо луиз ини палэнын но — вузъёссэс трос басьто Латвия, Литва, Эстония, Иран, Ирак но мукетъёсыз. Предприятилэн кивалтӥсез Роман Асадуллаев верамъя, соос дорын тырше 370 пала адями, берло дыре соос зол азинскизы — коръёсты нимаз люкылонъя линиязы, нюлэскын ужаны 9 туала комплексъёссы кылдӥзы. Эшшо но ӟечгес ужаны луонлыкъёссы вань. Но азинскыны люкетӥсь муг сюре — нюлэсъёс уг тырмо.

«Увадрев-холдинг» — Удмуртиысь одӥгез бадӟымез предприятие. Уваын со 1935-тӥ арын усьтӥськиз, со бордысь ик каргуртын улон потылӥз. Али заводын 1 сюрс 500 пала мурт тырше. Отын ваньмыз ужъёс быдэсъясько ини туала техникаен. Валтӥсь удыссы — ДСП лэсьтон, татын ик вылзэ ламинировать каро, со понна меланиновой плёнка асьсэос ик лэсьто.

Предприятилэн ужаменыз тодматскыны вуылӥз Удмуртилэн Тӧроез Александр Бречалов но. «Увадрев-холдингын» солы веразы выль инвестиционной проектсы сярысь. Татын лэсьтыны чаклало Европаысь куронъёслы тупась бадӟым форматэн фанера. Сое пуктӥськыны но, мебель лэсьтыны но кутыны луысал, пе. Малпанэз зэматыны 5 миллиард манет кулэ, озьы арскын 100 кубометр фанера лэсьтӥськысал, 300 пала выль ужан интыос кылдысалзы. Но проектэз быдэстон понна нош ик уг тырмы тэль. Али нюлэс кулэяськонзылэсь 30 процент висъямын. Соин ик заводчиос дэмлазы: нырысь ик лыдъяно, кӧня шаерамы нюлэсмы вань. Та удысэ котькуд сётэм манет государстволы пайдаен берыктӥськоз. Кылсярысь, лыдъям нюлэсэз переработкатэк вузад ке, котькуд висъям манет барыш сётоз 8 манет, нош пӧртэм пу вузъёс поттыса, 1 манет ваёз 20 манет барыш, пе. Озьы 1 кубометр тэль, солэсь вузъёс поттӥд ке, 940 манет вайысал, та коньдон пӧлысь 230 манетэз элькун кисые вуысал.

«Увадрев-холдинг» предприятилэн ужаменыз тодматскыны вуылӥз Удмуртилэн Тӧроез Александр Бречалов но.

Та проект умой луысал на соин но: фанера лэсьтыку кылдӥсь кылем-мылемъёсты заводазы ик ДСП лэсьтонэ кутысалзы. Озьы кылем-мылемъёстэк производство кылдысал.

«Ростдрев» предприятиез 2014-тӥ арын усьтӥзы Мурашкин кузпалъёс. Уж-бергатӥсьёс та удысын кемалась ик ужаны ӧз кутске ай, но предприятиязы 19 миллион манет тыр инвестициос кыскыны пӧрмытӥзы. Мурашкинъёс паськыт но векчи пул вандылонэн выро. Ёросысьтызы мукет предприятиос сярысь, таосыз асьсэос нюлэс уг корало, дасьсэ басьто.

Узей-Тукля гуртысь «Орион» предприятизэ 2012-тӥ арын Александр Штумф бусы шорын усьтӥз, пыд йылаз султытӥз. Табере бордаз Уваысь но котыр ёросъёсысь 700 пала гуртоос тыршо. Предприятиын фанера потто, туала амалъёсты, техникаез кутон сярысь сюлмасько. Татын лэсьтэм вузъёссэс быдэс Россие но кунгож сьӧры басьто. Али «Орионын» инвестиционной проект быдэсъяське. Сое улонэ пыӵатыны луонлык кылдӥз пичиятэм дунын басьтэм кредитъёслы луыса. Кылсярысь, 2016-тӥ арын предприятие Пичи но шоро-куспо ужбергатонэз азинтонъя федеральной корпорациысь (МСП) 106 миллион манет басьтӥз, нош Промышленностез азинтонъя фондысь — 56 миллион манет. Александр Свининлэн верамезъя, та фондъёсын кусып тупатыны дэмламын ёросысь мукет предприятиослы но.

Озьы ик А. Свинин пусйиз: Удмуртиын туэ ар пумозь нюлэсэн вырись предприятиос нимысьтыз кластере огазеямын луозы.

— Нюлэсэз корась, поттӥсь, солэсь вузъёс лэсьтӥсь предприятиос ваньзы огкылысь ужаны кулэ. Асьме шаерысьтымы мебель лэсьтӥсьёс палэнысь материал медаз басьтэ, — шуиз со.

Предприятиосты эскеремзы бере нюлэс хозяйствоын ужасьёс пуксизы котырес ӝӧк сьӧры. Кенешизы арендае сётӥськись тэльёс пумысен. Нырысь ик соосты люкылозы мур переработкаен вырись предприятиослы. Удмуртиысь палэнэ корен вузаськись нюлэс ичигес луоз. Озьы ик чакламын нюлэсэн вырись предприятиослэсь ужзэс эскеронэз Инкуазез утёнъя но инкуазь узырлыкъя министерстволы сётыны (али та удысэз чакла Промышленностья но вуз каронъя министерство). Озьы ик та министерство син азяз возёз, кызьы арендаторъёс корам нюлэс бервылэ выль писпуос мертто. Али Удмуртиын нюлэс удысэз азинтонъя проект дасяське.

Ангелина Снигирёва
Туспуктэм: udmurt.ru

Удмурт Дунне
By Удмурт Дунне Май 7, 2018 12:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*