Пугачёвоысь югдурез чаклало 3 беспилотникъёс

Удмурт Дунне
By Удмурт Дунне Май 17, 2018 09:51

Пугачёвоын тылпу кысонэн выро 500 пала адямиос, 28 пумо спецтехника, Бе-200 самолёт-амфибия но Ми-8 вертолёт.

Пожар 270 гектар вылэ вӧлмемын. Тылпулы бадӟыманы уг сёто. Пуштылэм куараос шергес кылӥсько ни.

Пугачёвоын али ужа кышкыт югдуръёсъя комиссия, со кылдытэмын Удмуртиысь Правительство бордын. Снярядъёс пуштылыны кутскем бере ик, Пугачёвое вуизы Удмуртиысь Правительстволэн Тӧроез Ярослав Семёнов но Россиысь МЧС-лэн Удмурт Элькунъя валтӥсь управлениезлэн кивалтӥсез Пётр Фомин.

Али югдурез чакла пилоттэк лобась 3 техника. Пожар 270 гектар вылэ вӧлмемын. Тылпулы бадӟыманы уг сёто. Пуштылэм куараос шергес кылӥсько ни.

Вераны кулэ, Пугачёво военной частьын улӥсьёс — со ог 2 сюрс адями — кышкыт интыысь нуэмын. Соос интыямын Баграш-Бигра, Уром, Бобья-Уча, Уча, Гожня гуртъёсы. «Юськи» санаторийын шутэтскись 100 пала нылпиос но ужасьёс Ижысь «Ласточка» лагере выжтэмын. Сӧсырмемъёс ӧвӧл.

— Югдур капчи ӧвӧл. Озьы ке но кышканы номырлэсь: военной частьысь 430 квартираосысь улӥсьёс кышкыт интылэсь палэнэ нуэмын. Соосты дась возьыны 3 интыосын, но адямиос ӵыжы-выжыоссы но эшъёссы дорыгес курисько, оскыса, тылпу нунал ӵоже кысэмын луоз шуыса, — пусйиз Ярослав Семёнов.

Сергей Захаров
Туспуктэм: Удмуртиысь МЧС

Удмурт Дунне
By Удмурт Дунне Май 17, 2018 09:51