Нина Ермолаева. «Натӥ, Пави но мон» книгаысь веросъёс

Удмурт Дунне
By Удмурт Дунне Май 4, 2018 17:31

Нина Ермолаева.

Натӥлэн утисьёсыз

Ми Павиен ӵош Натӥез утиськомы.

Атай шуиз: «Пиосмуртъёс котьку но нылъёсты утьыны кулэ!» Ма, озьы ик медло. Mи мусо Натӥмес утьыны кутским. Ванькалы шуим: «Эн йӧтылы Натӥез!» Огпол йыраз тэшкыльтӥм. Сергеез но донгыса лэзим — Натӥмес медаз йӧтылы. Олегез но визьмалом шуиськом вал но, со пегӟиз.

Табере Натӥен малы ке нокин уг шуды. Огназ бӧрдыса пуке.

Кызьы табере сое утёно меда?

Эмъюм

Натӥ висьыны усиз. Ялан уйбыртӥз. Сое одно кызьы ке эмъяно. Огпол самолёт курыны кутскиз: «Атай, мыным лобась самолёт кулэ». Атай шуэ: «Нылы, изь, изь, нош сайкад ке, кроватед вӧзын лобась самолёт луоз!» Соку Натӥ умме усиз.

Атай кошкиз. Анай милемыз куашетыны ӧз лэзьы. Ма, ми асьмеос но чалмыт пукысалмы. Атаймы самолёт уз шедьты, дыр. Урамын пеймыт, оло нош, лавкаос но ворсамын ини. Оло нош, соос лавкаосын чик ӧвӧл. Павилы шуисько:

— Ойдо асьмеос самолёт лэсьтом!

— Ойдо! Тон — пулэсь, нош мон — суредало, — вазиз со.

Мынам малы ке номыр ӧз пӧрмы. Но мон тырши. Я, мырдэм но кызьы пӧрмиз ведь! Пу самолётме Павилэн кагаз самолётэныз лякылӥм. Вож, горд кизилиен шудонмы туж чебер адӟиськиз. Со борды кал думылӥм. Сое кыскаськод ке, самолёт лобӟе. Шудонмес Натӥлэн валес вылаз понӥмы.

Атаймы ӝоген вуиз. Кияз коробкаез вань. Сое усьтэмез бере отысь быдэс аэропортэз адӟим! Асфальт сюрес вылтӥ вож писпуос кузя аэропортэ машинаос, автобусъёс ширтӥзы, адямиос вамышъязы. Атай мае ке бергатэм бере аэропортысен горд самолёт лобӟиз.
Со жиетыса бергаз, собере котыртӥськыса аэродроме пуксьылӥз но выльысь ӝутскылӥз… Аэродром вышкаысен самолётлы пипкетылӥзы, нош Натӥ кнопкаез зӥбылӥз но — лампочка ӝуатскылӥз. Со серекъяз.

Собере Натӥ милесьтым шудонмес синйылтӥз. Пави сое бергатӥз но, самолёт лобиз. Натӥ эшшо но золгес серекъяны кутскиз. Солы шудонмы кельшиз.

Табере Натӥмы йӧназ ини.

Тӧдьы гондыръёс

Пави урамысьтымы тӧдьы гондырез адӟем. «Тӥни со, — сипыртэ, — сыӵе бадӟым, лымыен шобыртӥськем но писпу улэ пегӟем». «Нош малы тон сипыртыса вераськиськод?» — юа атай. «Гондыр медаз сайка шуыса. Соос толалтэ изё ук». Мон но мукет писпу улысь бадӟым тӧдьы гон-
дырез синйылтӥ. Нош Натӥ урамысь пичи гондырпиосты утчаны кутскиз. Кӧня соос — бадӟым но пичи гондыръёс, котькуд писпу улын ук! Соос нокинэ уг йӧтыло: нуназе изё, нош уйин каретӥ ветло но асьсэлэсь гондыр гурзэс кырӟало: «Му-у-у! У-у-у!» Лымыяку соослы шулдыр. Карамы лымы трос ке, соослы кельше. Тӧдьы гондыръёс уйпалан вордскизы. Отын лымы эшшо но тросгес.

Нош тулыс, лымы шуназ ке, вань тӧдьы гондыръёс асьсэлэн уйпалазы кошкозы. Соосты ми ум адӟе ни. Макем жаль!

«Ойдолэ гондыръёстэс туспуктом, — ӵектӥз атай, — соку соос пыраклы асьмемын ӵош кылёзы. Ку мылды потӥз, соку ик шоразы учкоды. Туспуктэммес газетэ сётом. Тӥляд муспотон гондыръёсты шоры учкыса, ваньмыз мед шумпотозы».

Часъёслы беромыны уг яра

Часъёс бере кылизы ке, атаен анай уж доразы бере кылёзы. Ми но садике беромомы. Вуз карисьёс шудонъёсты вузаны бере кылёзы, нош анайёс соосты нылпиоссылы басьяны беромозы.

Часъёс — со ми, садикысь нылпиос. Милям группаямы кык часъёсмы вань. Ваньзы шонер, крезьгуръя кадь ветло: тик-так, тик-так, одӥг-кык, одӥг-кык…

Ми Выль арлы часъёслэсь эктонзэс дасяськом. Усто эктӥмы ке, Выль ар дыраз вуоз. Соку атаен анай Выль арлы кузьымъёс сётъяса вуттозы.

Эктыны но дышетсконо, янгышъёстэк ужаны но дышетсконо. Нош янгышъёс лэсьтӥд ке, соосты тупатъяны кулэ.

Дорысьтымы часъёсмы дырез шонер возьмато. Борддорысез но, атайлэн, анайлэн киосысьтызы но. Малы ке шуоно атай соосты ачиз тупатъяны дышиз.

Ваньмыз бӧрдо

Ми гуртын кемалась улӥськом ни. Табере котькуд нуналэ Ижкармес, садикмес но вань эшъёсмес тодамы вайиськом.

Песянай шуиз: «Инбам ӝоген бӧрдыны кутскоз, дыр. Тӥни кыӵе пилемъёс бугыръясько». Пави песянай доры мынӥз но юа: «Песянай, учкы ай, коркалэн липетэз но, борддоръёсыз но, укноосыз но, корказез но бӧрдо». Песянай паймиз: «Малы меда корка бӧрдэ?»

Натӥ шуэ: «Песянай, ойдо корка пыром. Уд адӟиськы-а, мар-а, милям дэремъёсмы но, катаосмы но, панамкаосмы но бӧрдо». «Малы меда тӥляд дӥсьты-кутты бӧрдыны кутскиз?» — песянай эшшо но золгес паймиз.

«Шудонъёс но бӧрдо, — ватсай мон. — Лопаткаос но, ведраос но — ваньмыз синкылиослэсь котмизы ини, малы ке шуоно соослэн Иже бертэмзы потэ. Отын милемыз атай, анай, садикмы но эшъёсмы
возьмало».

«Мар бен, мусоосы, иське, тӥледлы зэмзэ но Иже шонтоно ини. Ӵуказе анаен атайды тӥледыз нуыны лыктозы». — «Ура! — шумпотӥмы ми. — Ойдолэ дасяськоме». — «Эн дыртэ, нунокъёсы. Атаен анайды вуизы ке, нырысь ик скалмылы турын турналозы,
бакчаын бергалозы, нош тӥ со куспын дыртытэк гинэ Ижады дасяськоды».

— Ми но анаен атайлы юрттӥськом. Соос сомында ужез митэк уз ворме.

— Бен, — соглаш кариське песянай, — тӥ ӟеч юрттӥсьёс.

Ми анай-атаен ӵош вань кулэ ужъёсты быдэстӥм. Учкиськом: табере песянаймы бӧрдэ. Солэн Иже мынэмез потэ. Со милемын ӵош отын мед улысал. «Бускельёсы скалме кыскыны, ыжъёсме, ӟазег-курегъёсме сюдыны соглаш луизы ке, толалтэ тӥ доры одно ик лыкто», — кылзэ сётӥз песянай.

Ми песянаймес возьмалом. Соку со бӧрдэмысь дугдоз. Тонэ возьмась вань ке, малы бӧрдод на?

Удмурт кылэ берыктӥз Лидия НЯНЬКИНА
Суредаз Т. Немцева

Удмурт Дунне
By Удмурт Дунне Май 4, 2018 17:31