Национальной библиотекалэн кивалтӥсезлэн воштӥсез Анна Семенова библиотекаослэн ужпумзы, азьлань сюресъёссы но вордӥськем музъемлэн кужымез сярысь

Удмурт Дунне
By Удмурт Дунне Май 30, 2018 17:00

Анна Леонидовна Семенова/

Анна Леонидовна Семенова библиотекае шӧдтэк шорысь вуиз, лингвистика сюрес вылысь кожыса. Егит ныллы нырысетӥ ужан нуналъёсаз ик Интернет проектъёсын вырыны оскизы, со нимысьтыз группаен кивалтыны кутскиз. Али со Национальной библиотекалэн кивалтӥсезлэн нырысетӥ воштӥсез луэ. Йӧскалык библиотекалы 100 ар тырмон нуналъёсы вераськиськом библиотекаослэн ужпумзы, азьлань сюресъёссы но вордӥськем музъемлэн кужымез сярысь.

Быръён: библиотека яке наука?

— Тросэз бигер удмуртъёс дышетскыны лыкто Иже Удмурт кун университетысь удмурт факультетэ. Тӥляд но бадӟым улонэ сюресты озьы ик кутскиз.

— Мон Татарстанысь удмурт гуртысь. Вордӥськемын Вуж Каньсарын, собере улыны потӥмы Сутэрпочинкае. Тунсыко: покчи классъёсын дышетӥсьмы вал бигер, но со милемлы удмурт кылын валэктылӥз: математикаез но, природоведениез но. Туж тунсыко дышетӥмы умножениея таблицаез: бигер пиос бигер дышетӥсьлы сое удмурт кылын верало вал. Уг тодӥськы, кызьы мукетъёсыз, но ми бигеръёсын туж тупаса улӥмы. Бигеръёс ваньзы тодо вал удмурт кылэз, удмуртъёс — бигерзэ.

Мынам котьку но дышетӥсь луэме потэ вал. Вераны кулэ: ӵужанае но ӵужатае, Удмурт пединститутэз йылпумъяса, быдэс улонзэс дышетӥсьын ужазы. Ӵужанай — химик-биолог, ӵужатай дышетӥз ӟуч кылэн но литератураен. Мамае — фельдшер, атае — агроном, но трос аръёссэ председатель луыса ужамын. Школае дасяськыкум, мон сыӵе тетрадь но лэсьтӥськем: вылаз гожтэмын «Журнал», пушказ — бускель нылъёс-пиослэн списоксы, предметъёс. Кин мыным золгес яра, соослы «5»-ёс пуктылӥськем, кудъёсызлы воже потэ — «3»-ёс. Дышетӥсьмылэн журналаз кадь ик, мынамаз но уголок (закладка) лэсьтэмын вал, календарез но солэн кадь ик понэмын.

Удмурт кылъя но литературая туж зол дышетӥсьмы вал — Любовь Николаевна Осипова. Со сокем яратӥз аслэсьтыз предметсэ — яратонзэ милемлы но пыӵатӥз. Кыӵе сочинениос гожъяськомы вал! Удмурт факультетэ но мыныны со ик дэмлаз. Но трудовой книжкаям одӥг нунал но педагогической стаже ӧвӧл. Но, мыным потэ, дышетӥсьлэн ужез библиотекаын но ӧрак усьтӥське.

Вань басьтэм тодон-валанъёсы библиотекаын кутӥсько. Ужрадъёс нуиськод ке, сценарий лэсьтоно, со сценарий тон понна — уроклы лэсьтэм конспект.

— Удмурт кылосбуръя факультетэз йылпумъяса, тӥ лингвистлэн сюрес вылаз султӥды вал ни, но вуиды библиотекае. Кызьы?

— Шӧдтэк шорысь гуртэ бертонъям библиотекае резюмеме кельтӥ. Университетэз соку быдтӥ ни вал, кутски Валей Кельмакович Кельмаков дорын диссертация ужме гожъяны. Библиотекалэн азьвыл директорез Галина Гавриловна Калинина жингыртӥз, али милям интымы ӧвӧл ке но, лыкты, пе, собеседование, вераськом. Но мон университетэз бырйи, фин-угор кафедрае ужаны интыяськи. Но Галина Гавриловна бордам лякиськиз, нош но нош жингыртэ, ойдо лыкты, шуэ, мылкыдыд луиз ке, ӝыны ставка вань, оло, одӥг ар ужаса утчалод но тыныд кельшоз. Малпай, малы меда уд эскеры: диссертациелы материалъёс но дасяно, занятиослы но дасяськоно, нош лыдӟиськисьёссы соослэн ӧжыт, дыр. Син азям пуктӥ: книга сётъян ӝужыт кафедра сьӧрын пукисько, ӝыны нунал ас поннам гожъяськисько, лыдӟиськисько. Туж умой! Сентябре библиотекае ужаны вуи.

Анай-атаеныз но выныныз.

Но татын воксё мукет улон пӧзе вылэм! Ӵапак соку Интернет проектъёс борды кутскемын вал: «Воршуд» (удмурт культурая энциклопедия — авт.), электрон библиотека. Монэ нимысьтыз группаен кивалтыны пуктӥзы. Со умой, егит муртлы оско ке таӵе ужез. Зэм ик, со астэ но кӧня ке лӧпкытэ, вылӥегес ӝутскемед, умойгес луэмед потэ. 2009-тӥ аръёс, Интернет дуннее лэсьтӥсько нырысетӥ вамышъёс. Кызьы со луыны кулэ? Кыӵе программа кутӥськоз? Конечно, команда люкано, технологиез кылдытоно. Трос малпаськимы, пӧртэм адямиосын вераськимы. Авторъёсын но нырысь секыт йӧтӥз, соос дышымтэ: кызьы мынэсьтым книгаме Интернетэ поттозы, кин лыдӟоз? Собере гинэ ужаны капчигес луиз, куке адямиос адӟизы, Интернет зэм ик книгаосты вӧлмытэ шуыса. Та аръёс мон понна тужгес узыръёсыз, яркытъёсыз вал. Туннэ нуналлы вераны луэ, команда, технологической цепочка кылдытэмын, юридической юанъёс тупатэмын ни, али ваньзэ тае азинтоно, воштӥськонъёс луыны кулэ, технологиос интыязы уг сыло ук.

Ижын туж шуг шедьтыны юристъёсты, кин авторской правоосын выре. Но городмы туж ик бадӟым ӧвӧл бере, адямиос ог-огзэсты тодо. Озьы мыным жингыръяны кутскизы пӧртэм издательствоосысь, тӥ, пе, авторской правоен выриськоды, лэся, юрист: сыӵе тус кылдытӥськем.

Одӥг ар мон озьы ужай но малпаськытэк кыли библиотекае. Библиотекаын тон быгатӥськод аслэсьтыд уждэ, котырдэ ачидъя радъяны. Уг  кельшы ке кыӵе ке югдур, тон сое ачид тупатыны, кельшись уж мытыны, кыӵе ке проектэз азинтыны быгатод.

— Нош наука? Али выриськоды на-а?

— Выремъяськисько. Статьяос гожъясько, туж оскисько, куке но диссертациме йылаз-пумаз вутто шуыса.

Лингвистика мыным котьку но тунсыко вал. УдГУ-ысь дышетӥсе Наталья Владимировна Кондратьева монэ нырысетӥ курсъёсысен ик кыскиз тодослыко улонэ, ӵем поталляй пӧртэм каръёсы студенческой научной конференциосы. Талы туж шумпотӥсько. Темае тунсыко вал: дышетонын компьютерной амалъёсты кутон. Туж бадӟым мылкыдын дипломме гожъяй. Басьтэм тодонъёсы ужын но туж юрттӥзы, библиотекаын проектъёсмы ӵапак интернет-технологиосын герӟаськемын вал бере.

Огъя верано ке, лингвистика но, фольклор но мыным туж матын. Мон одӥг нунал но нылпи садэ ветлэмын ӧвӧл, будэмын песяеным, калык сямъёс, чакланъёс пичиысен пыӵамын. Кылсярысь, туж тунсыко учыр вал пичи дыръям. Гуртамы ик уло ӵужанай но ӵужатай. Огпол ӵужанае доры потӥськеммы, солэн убояз киярез шунды шорын ӝуам. Эх, пе, шуэ, нылы, кияре быриз ук. Нош мыным 3 арес. Мон, пе, шуисько: нош песяй киярзэ убо вылэ губи потэм бере гинэ мерттэ.

Германиысь удмурт кылэз дышетӥсь студентъёсын.

— Наукаен вырон, кылэз умой тодон тӥледыз Германие но вуттылӥз.

— Ар но ӝыны пала Гёттинген университетын наукаен выри, отын фин-угор отделение вань, немецъёсты удмурт кыллы дышетӥ. Нырысетӥ араз та курсъёсы одӥг группа люкаськиз, 2-тӥ араз нош — 2. Кин ке юромо та параосы шуыса 200-300 иськемысь ветлэ вал. Германиын сыӵе эрико дышетскон система: студентъёс мукет университетъёсы кыӵе ке курсъёсы — шуом, кудъёсыз соос дорын уг нуисько — ветлыло.

Иностранецъёслы, ӟучъ-ёслы удмурт кылэз сётыку, анай кылыд шоры мукет синмын учкыны кутскиськод. Тыныд со вань но вань кадь, но мукет калыкъёслы кызьы валэктыны, малы татын озьы, нош отын мукет сямен? Соку тон зэм ик кыллэсь законъёссэ валаны кутскиськод. Туж бадӟым тау шуыны кулэ отысь профессорлы Эберхард Винклерлы, со выре удмурт кылэн, дасям удмурт грамматикая нимысьтыз книга, со мыным туж зол юрттӥз. Отын ваньмыз радызъя валэктэмын.

Дышетӥсь понна тужгес умоез, дыр, дышетскисьёсыз вераськыны кутско ке. Огез студенткае удмурт кылын умой вераське вал. 3-ез студентъёсы вуылӥзы Удмурт кун университетэ удмурт курсъёсы. Одӥгез быдэс ар ӵоже Ижын улӥз. Вераны кулэ, Германиын удмурт кылъя туж трос дипломъёс гожъясько.

Гожтэм кыллы оскон

— Огласянь — творчество, мукет ласянь — кивалтон. Кызьы соос валче уло?

— Мынам улонам инты вань творчестволы но. Куддыр кулэ луэ кивалтон амалъёсты кутыны, малы ке шуоно вань дорожной карта, госзадание, сое одно ик быдэстыны кулэ. Но та уж бадӟым кыл кутон азе пуктэ. Тани, шуом, удмурт дуннеын, вотэсын, ас вакытаз туж золэсь проектъёс кутскемын вал. Но куке сое лэсьтэ общественник, со мылкыд вылын гинэ возиське. Соин сэрен туж зол удмурт проектъёс туннэ нуналлы ӧвӧл ни. Проект лэсьтӥськысал ке кыӵе ке госучреждениын, со мылкыд вылын гинэ ӧй возиськысал. «Воршуд» бордын но ужакумы, тросэз шуо вал, оло, пытсано ни сое, выль проект борды кутсконо. Самой секытэз, зэм но, кутскемзэ азинтыны.

Азьло мон ачим но уг валаськы вал, малы, кылсярысь, должностной инструкциос кулэ. Мон тани котькыӵе ужез быдэстыны быгато, должностной инструкциосам со гожтэмын яке ӧвӧл, уг учкы. Но вань сыӵе адямиос, кин зэм ик шуыны быгатоз, тазэ мон уг лэсьты, со мынам уже ӧвӧл!

Куддыръя мылкыд, зэм но, быре, малпаськод, малы со планъёс, отчётъёс, документация кулэ. Дыр быдтон. Вож но потэ кадь. Но котькуд ужлэн радлыкез луыны кулэ.

Йӧскалык библиотекаын арлы быдэ 300-лэсь уно ужрадъёс ортчыло.

— Юатэк уг быгатӥськы Йӧскалык библиотекалэн выль юртэз пумысен но… Та дырлы солэн проектэз умоен лыдъямын. Шуо, 2020-тӥ арлы со устӥськыны кулэ. Мар отын луоз?

— Ми сое асьмеос но туж зол возьмаськом ни.

Луоз крезьгуро висъет, кытын адямиос аудиозаписьёс лэсьтылыны быгатозы. Ми сӧсыр муртъёсын но ужаськом ук — кылсярысь, сукыръёсын но ляб адӟисьёсын — соослы отын умой луоз. Литературной гостиной туала куронъёсъя лэсьтӥськоз: туала техника, висъетъёс. Ӝажыос вылысь адями ачиз но книга бырйыны быгатоз. Бадӟым лыдӟиськон зал 3-лы люкиськоз: огшорыезлы, гань-гань лыдӟиськыса пукон сэреглы но электронной книгаосын висъетлы. Нылпиосты кельтон комната но луоз.

— Жаляса верано, куд-ог интыосын библиотекаосты ворсало яке воштӥськонъёс пырто. Кылсярысь, бадӟым городъёсын соос луо лулчеберетъя центръёс. Кыӵеен адӟиськоды библиотекаослэсь азьланьзэс?

— Кунгожсьӧрез учконо ке, паймоно кадь, отын вань студентъёс библиотекаосын пуко, тужгес но сессиос дыръя. Отын туж умой луонлыкъёс кылдытэмын — асьмелэн сыӵеез матысь дыре уз луы на, дыр. Кылсярысь, Гёттинген библиотекаын пукиськод, 15 минутлы быдэ укно ачиз усьтӥськылэ. Библиотекаос уйбыт ужало, студентъёс пушказ кӧло но, дыр.

Асьме библиотекаослэн огъя направлениоссы пусъемын, но нимысьтыз ужъёссы гожтэмын ӧвӧл. Кунгож сьӧрысь тросэз библиотекаос кадь ик, Йӧскалык библиотекамы научной лыдъяське. Но макем бадӟым инты со басьтэ туннэ нуналлы наукаын? Германиысь библиотекаосын ужало бадӟым исследовательской центръёс, соос азинто гуманитарной наукаез, отын ик вань пӧртэм лабораториос но — ваньмыз лэсьтӥське наука понна. Асьме библиотекаосын бадӟымгес инты басьтэ визьнодан (воспитание) — та но одно ик луыны кулэ. Конечно, мынам потэ вал, Йӧскалык библиотекалы луыса Ижкар научной центрлы мед пӧрмоз шуыса. Библиотекаын мед азинскысал наука, озьы ик кулэ на сое калыке вӧлмытыны. Возьматоно, наука со кулэ но туала маке шуыса, солэн дунлыкез мед будоз.

«Удмурт дунне» энциклопедиен тодматскон ӝыт дыръя. Газетлэн валтӥсь редактореныз Зинаида Рябининаен.

Асьмелы одӥг-кык вамышлы азьпалагес малпаськоно. Тани, шуом, али ми квестъёсын выриськом. Но валано ни, соослэн дырзы ортче. Лыдӟисен ужаны выль амалъёсты утчано. Йӧскалык библиотека шаерысьтымы вань библиотекаослэн методической центрзы луэ. Кунгож сьӧрысь библиотекаослэсь дышетскыса, соослэсь малпанъёссэс, ужъёссэс асьме элькунамы, пичияк воштыса, пыӵатоно — асьмелэн луонлыкъёсмы мукетэсь на ук, кылсярысь, тросаз гуртъёсын али но Интернет ӧвӧл.

Библиотекаямы туж пӧртэм удысъёс пӧлэстӥсько. Туннэ, шуом, радъяське удмурт кылъя но литературая кыӵе ке пумиськон, ӵуказеяз — врачъёсын котырес ӝӧк, вуонояз — математикъёсын. Мон понна тужгес секытэз но валантэмез вал, дыр, ляб адӟисьёсын но синтэмъёсын ужан. Кышканэ вал. Алигес Москвае «Экспо» адӟытонэ ветлӥмы, отысен валай: туннэ нуналлы асьмеос ляб адӟисьёсын ужанын мукет улосвылъёслэсь бере ум кылиське.

Висъясал на туж кулэ но умой проектъёсмес. «Край удмуртский» блог. Адямиос отчы ӵем пырало, материалъёсты лыдӟо. 2-тӥ арзэ ни ми ортчытӥськом ёросъёсысь литератураослы сӥзем аръёсты — туэ со Можга палъёслы сӥземын. Кулэ-а со, ӧвӧл-а? Но адӟиськом, пумен со тунсыкогес но тунсыкогес пӧрме. Милям трос лыдӟисьёсмы вотэсын но. Интернет пыр туж трос юанъёс вуо. Кылсярысь: печення пыжон фабрика усьтӥськом, милемлы кулэ вал ческыт сиёнъёсты лэсьтонъя ГОСТ. Скалэлэн сыӵе-сыӵе висёнэз. Кулэ вал литература. Ӧвӧл меда удмурт сценарийёсты?

Кужым сётэ вордскем музъем

— Библиотекаын сомында ужрадъёс ортчыло. Котькудаз кивалтӥсьлы луыны кулэ кадь. Та трос кужымез быдтэ. Кызьы шутэтскиськоды?

— Германиын еврей тодосчиослы — тросэз соос Совето Союзысь кошкемъёс — шуисько, мон бакча ужез яратӥсько. Нош соос шуо: ну тон, Аня, шузи адями ӧвӧл кадь но, кызьы бакчаын копаськонэз яратод, со юнме дыр быдтон ук!

Уж бере, зэм но, сыӵе жадиськод. Куке быдэс нунал адямиосын ужаськод, куке кужым быре, куке воксё мылкыд ӧвӧл, мон ӵемысь мынӥсько магазинэ но бырйисько, кылсярысь, кидысъёс. Со мынэсьтым кужымме йылтэ. Туж зол яратӥсько узы-боры, губи октыны. Гуртамы нюко-гопо интыос вань, мон отын бичаськисько 30 градус пӧсен, быдэс нунал шунды улын пыжисько, гурезетӥ ветлыса, чидантэм жадисько… Борызэ но мон уг сиы, но мыным кулэ араз кӧня ке пол тазьы потаны. Малы меда? Музъемлэсь кыӵе ке кужым басьтӥсько, дыр. Ӵапак вордӥськем музъемелэсь.

Туннэ мон уг шӧдӥськы ни, вордскем гуртэ кыдёкын шуыса. Асьмеос али мобильноесь ини: транспорт, телефон, скайп вань. Нуналлы быдэ анай-атайёсын вераськисько.

Эшшо яратӥсько лыд-ӟиськыны. Лыдӟиськисько мон туж кема, профессиональной литератураез лыдэ басьтытэк. Куке тон котькуд кыл сярысь малпаськиськод, эшшо филолог синмын учкыны кутскиськод на ке, соку лыдӟиськон шутэтсконлы уг пӧрмы ни — малпаськонлы.

Вераськиз Мария ВЕКШИНА
Туспуктэмъёсыз авторлэн

Удмурт Дунне
By Удмурт Дунне Май 30, 2018 17:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*