Любовь Ганькова. Улэм потэ. Улонысь учыр

Удмурт Дунне
By Удмурт Дунне Май 8, 2018 16:50

Любовь Ганькова.

Улонысь учыр

Алнаш районысь Тыло гурт номырин ӧз висъяськылы мукетъёсызлэсь. Калык тыршыса ужаз колхозын но, ас юрт котыраз но. Улонэз адӟем пересьёс сопал дуннее кошкылӥзы, егитъёс яратылӥзы, кышнояськылӥзы но нылпи вордылӥзы.

Тылоысь Василий Никонов аслыз кузпал бырйиз артэ Варӟыл гуртысь Анастасия Маяковаез. Кузпалъяськизы, ог-огзэсты яратыса но анай-атайзылэсь кылзӥськыса. Вася чебер, мугорын ӝужыт, таза, колхозын одӥгез устоез тракторист. Насьта ымныр тусын картинкаысь ныллы уг ке но укша вал, со понна со кыллы устоеныз, ужлы чырткеменыз висъяськылӥз. Мар кулэ на егит семьялы!

Огаз ӝытэ Васялы почтальон гожтэт вайиз. Насьта ӵап дораз кемдӥз. Сюлмыз чидатэк, Вася киысь гожтэтэз басьтӥз но лыдӟе: «Никонов Василий Михайлович, ӵуказе, 1940-тӥ арын 16-тӥ мае военкоматэ лыктыны кулэ, отысен тӥледыз лэзёзы Пермьысь военной инженерной училищее». Мар карод?! Мынытэк уг луы. Нош Насьта нылпи ваёно, берпум толэзьёссэ секытэн ветлэ. Ӵуказеяз со, вал кыткыса, картсэ Алнаш военкоматозь келяз. Сюрес вылысен Вася кышноезлы шуиз: «Уг тодӥськы, Насьта, кӧня монэ отын возёзы, оло, собере война кутскоз. Пие вордскиз ке, Ёрги ним сёт, ӟуч сямен со Георгий, (Победоносец, иське), ныл ке — ачид тодӥськод».

Люкиськонзы кема ӧз кыстӥськы. Алнашысь военкомат азьын калык ымгай вал ни. Келяськисьёс пӧлын бӧрдӥсез но, кырӟасез но вань. Насьталэн сюлмыз ӧз но бӧрды, ӧз но кырӟа, малпанэз мукет — ӟечкын нылпи ваёно.

Насьта ӵем гинэ басьялляз Пермьысь гожтэт. Ачиз но гожъяз. 1940-тӥ арын июль толэзе Васялэн Ёрги пиез вордскиз. Пиезлы 10 толэзь тырмем бере Насьта солэсь патретсэ гожтэт пыр картэзлы лэзиз. Нош 1941-тӥ арын июне секыт ивор гуртэз зуркатӥз. Война… Валамон ини, Васяез война кутскон нуналэ ик оже келязы. Нырысь ожмаськиз Тверь музъем вылын. Жаляса верано, тушмонлэн кужмыз но, ож тӥрлыкез но данаклы тросгес вал. Никонов ожмаськиз саперъёслэн взводазы, соин ӵош татчы ик сюриз Асангуртысь Василий Ермаков. Горд армия Тверь город дорын бадӟым ыштонъёс адӟиз. Кема малпаськыны дыр ӧй вал. Немец армия тани-тани городэз басьтоз. Асьме командование решение кутэ городэз немецъёслы сётыны. Ож тӥрлык немец кие медаз шедьы шуыса, командир кык удмурт пияшъёслы, Никоновлы но Ермаковлы, приказ сётӥз:

— Кылёды выжез пуштытыны! Немецъёслэн танковой колонназы выж вылэ вуиз ке, соку гинэ уждэс быдэстоды. Нош али вань документъёстэс штабе кельтэ.

Солдатъёс валазы, соосыз кулыны кельто. Командованилэн осконэз ӧй вал лэся, кин ке соос пӧлысь улэп кылёз шуыса. Кык удмурт пиос выж пуме динамит интыязы. Немец пумтэм ыбылӥз, со куспын Ермаков сӧсырмыны шедиз. Выж пуштытон Никонов вылэ кылиз. Ог дас вить немец танкъёс гудыръям кадь со пала лыкто. Никоновлэн малпан одӥг: оскем ужез быдэстоно! Мед чигналозы асьме ожгарчиос, кӧнялы ке но ӝегатоно та сьӧсьёсты! Кужмо пуштэм куара зуркатӥз музъемез. Ваньмыз омыре лобӟиз: выж, немец солдатъёс но танкъёс, соосын ӵош рядовой Никонов но. Вася Ермаков сӧсырмиз ке но, быгатӥз асьме полевой госпиталез шедьтыны. Отысен ини вордскем гуртаз гожтэт ыстӥз, вералэ, пе, Тылоысь Никонов Васялэн кышноезлы, картэз мынам син азям кулӥз.

***

Вася уг тоды, кӧня кыллиз музъем вылын, немец кылэз кылыса, йырыз сазёмиз. Пермьын переподготовка ортчыкуз, немец кылэз кӧня ке дышетӥз вал. Йырзэ ӝутытэк, кылле Вася музъем вылын, инбам сайкыт, куазь шуныт. «Эх, кыӵе улэм потэ! Неужто ыбозы?! Оло, асме ыбом? Уг, улэм потэ, мынам пие вань! Инмаре, тон вань ке, пие понна улэп кельты монэ», — малпаз Вася. Тани кык кузя немецъёс дораз вуизы. Огез Никоновез пыдыныз ӵыжиз но мукетызлы шуиз: «Гут, гут нихт шиссен!» Никонов валаз: уз ыбе, пленэ басьтозы. Собере сое, машинае куштыса, кыӵе ке гуртэ вайизы но отысь черке пыртӥзы. Татын со выллем пленэ сюрем солдатъёс трос гинэ вал ини.

Капитан ог дасо кужмо но таза солдатъёсты котыраз люказ но уйин пегӟыны дэмлаз. таос пӧлы сюриз Никонов но. Ӧз тодэ соос, Тверь музъем быдэсак немецъёслы сётымын ини шуыса. Черкысь бен потӥзы ик, но кыдёке кошкыны ӧз вуэ, соосыз кутӥзы. Лябӟемъёссэ отын ик ыбылӥзы, кылемзэ нош со черке ик ворсазы. Солдатъёсты вутэк но сиёнтэк возизы черкын. Гурт калык жаляса сиён но ву нуллэ вал, бератаз соосты но черк доры ӧз лэзьялэ ни. Военнопленнойёсты возьманы немецкой овчаркаос вайизы. Пегӟонлы оскон сӥяз.

Ӝоген пленнойёсты черкысь поттӥзы. Немецъёслэн вераськемысьтызы Никонов но эшъёсыз валазы, соосыз нуо Польшае. Пӧлазы пегӟыны ӝуткасез нош сюриз. Сюрес вылысен соос вить кузя пегӟизы вал. Кыдёке ӧз вуэ, соосты нош берыктӥзы. Собере пленнойёс куспазы кенешизы, оген-оген пегӟыны, озьы, пе, шӧдскымон но уз луы, немецъёслэн син азязы ум адӟиське.

Никонов озьы быгатӥз пегӟыны. Табере кызьы ке но асьме частьёсыз шедьтоно, ведь кытын ке но кылемын на соос. Но кыдёке-а мынод пыдын? Куазь пӧсь, сю куасьме, ву нокытын ӧвӧл. Йырын одӥг малпан: ву, ву, ву. Гуртъёсы пырыны дӥсьтыны уг луы, отын немецъёс.

Интыос тодмо ӧвӧл, Никонов тылобурдоослэн лобамзыя ву утчано кариськиз. Озьы вуиз пичи ты дуре. Учке, ты дорын трос гинэ кулэм солдатъёс, отын ик ӟучез но, немецез но. «Коть дӥськутсэс кылё, оло сиёнзы но кылемын», — малпаз со. Ты доры матэ вуиз но, пыдессинъёсыз либрак луизы: шӧйёс кор зӧкта тӧрнамын, синъёссы тэтчамын, кудъёссэ пӧлы пум быдӟаесь нумыръёс поръяло, кудъёсыз вылын сьӧдкуакаос пуко.

«Тӥни кытчы лобало вылэм тылобурдоос»,- малпаз Никонов. Юрдонэз валатэк, нумырӟем вуэз гульк-гульк юыны кутскиз. Шӧдтэк-шорысь пуны утэм куара кылӥськиз. Вооргорон берытскыны ӧз вуы, чырты сьӧраз овчарка тэтчиз, кыксы ик вуэ зымизы. Вася киосыныз ымнырзэ ӵоктаз, нош ик пиез тодаз лыктӥз. «Инмаре, улэм потэ, мынам пие вань», — малпаз со. Пуны кема кысказ на мугорзэ, куртчылымтэ интыез кылиз ымныраз но кӧтаз. Йырсазьзэ ыштэм Никоновез нош ик пленэ басьтӥзы. Маин вайизы лагере, созэ Вася ӧз тоды. Йырсазьыз сайкомиз, удмурт кылэз кылыса. Мар та, улэп-а, кулэмын-а мон яке вӧтасько?

— Вася кырси, Вася кырси, улэп-а тон? Кылӥськод-а? Мон та, гуртоед, Гирбасов Вавил. Ярам, ымнырыд быдэс кылем, ато мон тонэ ӧй тодмасал, куртчылымтэ интыед ик ӧвӧл ук, мон тонэ арня чакласько ни!

— Кытын мон? — мырдэм вазиз Никонов.

— Польшаысь «Освенцим» лагерьын, — шуиз Вавил.

Гирбасов Никоновлэсь егитгес вал, сельсоветсы одӥг бере, ог-огзэс умой тодо. Вавил векчи кукей сьӧмез, вуэн кизертыса, Вася кырсиезлы сётӥз.

— Йӧна кырси, сиськы, ужан быгатӥсь муртэ татын сюдо, кин ужаны уг быгаты, сютэм кулэ.

Но одӥг уе шӧдтэк шорысь, быдэс лагерез сайкатыса, военнопленнойёсты Германие келязы.

***

Германиын соосыз возьмало вылэм ини. Ваньзэсты, одӥг радэ султытыса, ужъя биржае нуизы. Татын, базарын сямен, узыр немец фермеръёс асьсэлы ляльчи утчазы. Никонов таза воргорон вал бере, вӧзаз куинь узыръёс султӥзы. Юалляськизы кытысь, кин луэмзэ, вань-а специальностез. Тракторист луэмзэ тодэмзы бере споръяськонзы уката пуромиз. Ярано, Никонов сюриз ӟеч сюлэмо адями ки улэ.

— Толалтэ ми дорын кезьыт луэ, — шуиз со. — Тани тыныд юрт, тае ачид ик тупаты но аслыд улон инты кар.

Та дырысен Никонов пегӟон сярысь ӧз ни малпаськылы ни. Соку немец солдатъёс вуэмын вал ни Сталинград доры. Гуртын ужаса будэм пияшлы Германиын тырмиз 24 арес. Фермерлэсь сётэм ужзэ со ӟеч быдэсъялляз, кузёез ушъя вал. Та кузё дорын горничной луыса ужаз егит нылаш, Украинаысь кужмысь ваем маке. Галялы — 18 арес гинэ, тусын мак сяська выллем ныл ужаны чырткем вал. Ӵем гинэ со Никоновлы кузёлэсь ческыт сиёнъёссэ поттылӥз. Егит дыр одӥг пол гинэ луэ ук! Зӥбыса возёд шат егит мылкыдэз. Со одно ик кыре куриське, яратэм потэ, улэм потэ! Та кык егитъёс ог-огзылы синмаськизы. Немец музъем вылын кылдӥз ӟуч семья. Талы пумит ӧз луэ кузёос но. Ар улыса, Васяен Галялэн вордӥськиз нылзы. Дор палъёсызлэсь мӧзмыса, лэся, Галя нылзэ Христя нимаз. Никонов ӧз ваты Галялэсь, кыдёкысь удмурт шаерын солэн кышноез но пиез вань шуыса. Егит сюлэмъёс понна со могӟет но, пыкъет но ӧй вал. Соос кадь семьяос Германиын трос вал ни. Ваньмон дыръязы соос ог-огенызы пумиськылӥзы но, дор палъёссылэсь мӧзмыса, ас кырӟанъёссэс кырӟазы.

Дыр ортчемъя фронтысь мукет иворъёс вуыны кутскизы. Горд армия шуккет, пе, сётӥз немецъёслы Волга шур дурын. Кузёослэн но мылкыдзы воштӥськиз. Улонзы огыр-бугыр луиз. Котькуд нунал я ошсэс, я скалзэс вандыса келяло — немец армилы юрттэт кулэ, пе.

Сӥзьыл Никонов кадь советской военнопленнойёсты Англиысь союзникъёс, киулазы басьтӥзы. Англичанъёслы соосты сюдыны ӝоген акыльтӥз, лэся. Асьме солдатъёсты, огазе люкаса, Америкаысь союзникъёслы сётӥзы. Советской военнопленнойёслэн Америкаын улонзы уродмиз. Соосыз лагерьын сямен ез кенер сьӧрын возизы, возьмаськисьёс негръёс вал.

Начармем пленнойёсты «русская собака», нош сӥльвирооссэ «русская свинья» гинэ, пе, шуылӥзы. Лагере пуктэмын вылэм тусь, со тусе кисьтылӥллям чукиндэрен яке галанкаен пӧзьтэм шыд, котьмаин си, пуньы ӧвӧл. Нянез но кенер вамен куяло вылэм. Татын ни пленнойёс куспын нянь понна ченгешон но, жугиськон но кутскылӥз.

Одӥг пол бадӟым начальство лыктыса асьме пленнойёслы ӵектӥз Америкае кыльыны. Сомында адями пӧлын соглаш луисез но вал. Никонов трос малпаськиз: мар кароно? Германиын Галя кышноез вань, будэ нылыз. Дор палаз эшшо одӥг кышноез, пиез. Уйзэ оло изиз, оло ӧз, ӵукна пал уйвӧт адӟе: Ёрги пиез Варӟылын ӵужаез дорын кадь. Капка азязы султэм но бӧрдыса сылэ. Мар луиз, пие, шуыса Васялэн юамезлы тэшкыли вераз: «Тон кулӥд шуыса, песяй милемыз улляз, анай висе, больницаын, ӵужмурт монэ корказ пырыны уг лэзьы, мон нокинлы кулэ ӧвӧл! Берт, атай!» Собере син азьысь ышиз. Пиосмурт, вӧтэзлэсь куалектыса, сайказ. Война вылтӥ нырысьсэ пизэ уйвӧтаз адӟиз, дор палъёсаз вуылӥз.

Ӵуказеяз Америкае мыныны пумит луыса кагаз вылэ гожтӥськиз, со нуналэ ик союзникъёс сое сётӥзы советской представительствое. Келякузы меӵак веразы, янгыш, пе, лэсьтӥд, туж жалялод, тонэ дорад уз лэзе. Та кылъёс зэмазы, СССР-е вуэм военнопленнойёсты пырак Донбасэ шахта тупатъяны нуизы. Татын соос немец военнопленнойёсын огазьын ужазы.

***

Кема бӧрдӥз Насьта картэзлэн кулэмез сярысь ивор басьтэмез бере. Котькӧня бӧрд, синкылиен картэз уд берыкты, уд но улӟыты. Со огназ ӧвӧл ук, котькуд корка таӵе кагаз вуылӥз. Мар карод на? Пиез пыд йылаз султытоно, малпаз Насьта. Кылем толэзе Асангуртын одӥг пилэсь гожтэтсэ басьтӥллям, кышноез лыктыса ик вераз, кызьы но кытысен Васяез бырыны шедем. «Оло со Ермаков бертыны кемдоз, соку ваньзэ ачим рос-прос юаллясько», — ас понназ малпаське Насьта. Озьы но тазьы Васялэсь ньыльдон уйзэ но ортчытэм кариз. Собере, пизэ кутыса, берен анай юртаз, Варӟылэ, бертӥз. Мултэс ым нокинлы кулэ ӧвӧл.

Гуртын улон, войнаын сямен ик, туж секыт вал, татын ӧз гинэ ыбылэ. Сютэм улонэз тросэз шӧмъязы. Секыт выт тыронъёс гурт калыкез какалмытӥзы, вылаз ик котькуд сельсоветлы сётэмын вал задание чугун сюрес вылэ но нюлэс коранэ ужасьёсты лэзьыны. Насьта но та ужлэсь палэнтэмын ӧй вал. Уен-нуналэн, гуртаз бертатэк, ужаз со чугун сюрес лэсьтонын но нюлэс коранын. Одӥг толалтэ сокем кынмыны шедиз, ӵыжы-выжыосыз кулэмзэ возьмало вал ини. Нош со, сизьым толэзь больницаын кылльыса, пиез доры, гуртаз, вуиз. Дораз келякуз, эмчи вераз:

— Ну, Насьта, анай-атаенд юн тазалык сётиллям, кӧня быгатӥ, мон эмъяй, но жаляса верасько, нылпи вайыны уд ни быгаты, карт утчамед но уз пот!

Насьтаез та кылъёс сокем ӧз ӝожомытэ.

— Картэ кулэмын, пие вань, гуртын пиосъёс так но ӧжыт кылемын, монэ сотэк но нокин уз басьты. Тау, йӧнатэмды понна, — шуиз Насьта но эмчилэн пыд азяз йыбырттӥз.

***

Быдӟым Отечественной войналэн тылӝуаз ожмаськиз эшшо одӥг солдат. Со вал Тула областьысь Михайловка черкогуртысь Николай Скученков. Та ӟуч пи сямызъя сабыр но востэм вал. Войналэн жугиськоназ сое, Никоновез сямен ик, нырысь нуналаз ӧтизы. Одӥгаз секыт ожын соое контузить кариз. Кин но кызьы госпитале вуттӥз — созэ верась ӧй вал, ачиз но ӧз тоды. Йырсазьыз сайкиськем бере валаз: документъёсыз ӧвӧл. Госпитальын кема кылльыны ӧз кылды. Сое нош частяз ыстӥзы. Николай Петровичлэн дӥськутэз сутскемын вал. Госпитальысь медсестра шуиз: «Мын, васькы подвалэ, отын туж трос дӥськут. Шинель дӥся яке фуфайка басьты». Подвалын егит солдатлэн йырсиез пежырскиз. Кыӵе но дӥськут куямын ӧй вал татын, котырын шӧй зын лӧсъяське. Мар карод, часте гольык уд мыны ук. Вирен орсмем но наштаськем дӥськут бордын медальёс но орденъёс бырттылэмын. Кема быръемез бере Скученковлы кыӵе ке старшиналэн шинелез тупаз.

Кулэм солдатлэн дӥсеныз Скученков аслаз частяз вуиз. Госпитальын кылльытозяз, трос эшъёсыз быриллям, командир но воштӥськем. Егит лейтенант, 18 аресъем пияш, Скученков штабе пырыку, телефон пыр маке ӟырдыт вераське вал. Со пырем мурт шоры учкиз но, шинельысьтыз лычкаоссэ адӟыса, юнмамтэ куараен кеськиз: «Принять командование взводом! Срочно!» Скученков гуньдылыса вераны тыршиз: «Рядовой Скученков прибыл после ранения. Документъёсы ӧвӧл, шинеле кулэм муртлэн. «Молча-а-ать! — кеськиз лейтенант. — Принять командование взводом, товарищ старшина!» Озьы Скученков, ачиз но марзэ созэ валатэк, взводэн кивалтоно луиз.

Огаз ожын туж зол сӧсырмиз. Скученков сайказ Куйбышевысь госпитальын. Врачъёс кема нюръяськизы солдатлэн улонэз понна. Скученков ожмаськыны ӧз ни яра, инвалид кылиз. Озьы ке но солдатэз дораз ӧз лэзе, келязы Удмуртиысь Голюшурма спиртзаводэ ужаны, угось та завод лыдъяське вал стратегической объектэн. Завод фронтэ котькуд нунал спирт келя вал. Озьы Тулаысь ӟуч пи, Голюшурмае вуыса, МТС-ын трактор бригадаен кивалтӥз, со вискын ик спиртзаводлы гуртъёсысь но колхозъёсысь картошка бичаса ветлӥз. Та уженыз ик вуиз Варӟылэ, но тодматскиз Василий Никоновлэн пал кылем кышноеныз — Насьтаен. Кин тодэ на, оло яратӥзы егитъёс ог-огзэсты, оло улонлэн секыт вакытэз соосты огазеяз.

***

Война бырем бере гуртэ ожгарчиос вуылыны кутскизы. Одӥг ӝыт Насьта доры бускельзы шокпотыса пыриз.

— Насьта! — кеськиз со ӧс куспысен. — Васяед бертэм!

— Вася?! Кызьы?! Кытысь?! — пыд йылаз сылыны ӧз ни быгаты Насьта, сылэм интыяз пыдесъяськиз.

Та ивор гуртын туж ӝог вӧлмиз. Вася Тыло гуртаз пизэ но кышнозэ адӟиськыны ӧтиз. Насьта, мар карыны ӟудыса, Коля картэзлэсь ужысь бертэмзэ возьмаз но визь-кенеш куриз.

— Тон янгыш ӧвӧл, мон но янгыш ӧвӧл, война янгышаз, — шуиз со. — Пиез солэн, мыноно луод. Улод-а тон соин, ачид тодӥськод, аслад йырыд, аслад сюлмыд, котькудмес бырйы».

Алаз пуктыса, Вася кема вешаз Ёрги пизэ, кышнозэ янгыш ӧз кары. Ваньмыз шонер вал, кулэм сярысь кагаз но, Асангуртысь эшез Ермаков но адӟиз сюен согиськемзэ. Военнопленнойёсты шахтаын гожъяськыны ӧз лэзьылэ. Татын ассэ умой воземез но ужамез понна сое гуртаз адӟиськыны лэзиллям.

Насьта та ӝытэ Васяез доры ӧз кыльы, пизэ кутыса, Варӟылаз ик, Коляез доры берытскиз. Ӟуч картэз, солдат котомказэ тырыса, кошкыны дасяське вылэм ини. Кытчы, ачиз но уг тоды: кузпалыз пиеныз немец солдатъёс сьӧры Германие кошкемын. Бертӥсь кышнозэ но пизэ укноетӥ адӟыса, бызьыса ураме потӥз но, пизэ кияз ӝутыса, бордаз ӟыгыртӥз. Бам вылысьтыз виясь синкылиоссэ ӵушылыса но гуньдылыса вераз: «Сынок! Никому тебя не отдам, сам воспитаю! Жить будем!» Пичи Ёрги та кылъёсты оло валаз, оло ӧз, оло сюратаез жаль потӥз, оло ачиз солэсь мӧзмиз, чыртыяз юн-юн ӟыгырскиз но сюратаезлы шуиз «Атай! Жить будем!».

Йылпумъяса

Никонов Василий Михайловичлэн пиез Георгий Васильевич улэ Алнаш черкогуртын, со кемалась пенсиын ни. Партилэн райкомаз но ужаз, киносетьлэн директорез но вал, Алнаш сельсоветэн но кивалтӥз. Мыным кылдӥз соин ӵош ужаны Алнашысь вытъя инспекциын.

Василий Михайлович пытсэт сьӧрысь мозмытскемез бере кышнояськиз. Солэн нылпиосыз вордӥськизы на. Али уло шаермылэн пӧртэм сэрегъёсаз, ӵыжы-выжыосыз Тыло гуртын.

Николай Петрович Скученков Насьта кышнозэ но Ёрги пизэ ас вордскем палъёсаз нуллӥз. Но Алнаш музъем солы дуногес луиз. Соос Насьтаен артэ ватэмын Варӟыл шай вылын.

Удмурт Дунне
By Удмурт Дунне Май 8, 2018 16:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*