Липет, сюрес но «Чипчирган». Мар сярысь сюлмаське Сюмси ёрос?

Удмурт Дунне
By Удмурт Дунне Май 4, 2018 13:00

Удмуртилэн Тӧроез Александр Бречалов куд-ог министерствоослэн кивалтӥсьёсынызы ӵош Сюмси ёросэ вуылӥзы. Нунал ӵоже соос предприятиосын гурт калыклэн юанъёсызлы валэктонъёс сётӥз. Интыысь кивалтӥсьёслэсь но ужбергатӥсьёслэсь ӵектонъёссэс кылзӥзы.

udmurt.ru

Сюмсиын Гурт шудонъёс азьын спортзал лэсьтӥзы вал. Отын шекъёс шараяськизы.

Сюмси ёросэ Александр Бречалов 2-тӥзэ вуиз. Нырысьсэ ветлӥз Гурт шудонъёсы. Таяз учыре быдэс нуналзэ ёросын ортчытӥз.

Кутскиз тужгес пыдлось гуртысен. Кильмезь черкогуртэ вуыса, валаны луэ, кыӵе туннэ югдур азьвыл леспромхозъёс чотын улэм гуртъёсын. Сюмси ёросысь экономика ог 70 процентлы тэлен герӟаськемын вал. Колхозъёслы ужаны шуг, муоссы туж уродэсь. 1990-тӥ аръёсы ваньмыз сямен леспромхозъёс куашказы. Кильмезьысь предприятилэн борддоръёсыз гинэ кылизы на.

Ог 5 ар талэсь азьло татчы инвестор вуиз. Но ваньбур поттон кутскиз миым гинэ. Сокема улӟыны выриз предприятие. Туннэ татын 30 адями ужа, быгатысалзы на эшшо 60-зэ кутыны, но нюлэс уг тырмы, пе. Ёросысь тэль палэнэ кошке. Кильмезьёс Тӧроез юрттыны куризы нюлэс дасясьёсын югдурез сэрттыны. Уго ёросын ик пулэсь ваньбур поттоно ке, элькунлы пайдаез тросгес. Озьы ик люкето, пе, урод сюресъёс. Кӧльыё луоен шобыртэм сюрессы тулыс небӟе, бадӟым техникаен продукцизэс нуыны уг быгато ни. Али но складъёссы тырмемын. Но Кильмезе выль сюрес туэ лэсьтыны ӧз оскытэ. Уго вань на эшшо сыӵе 3 гуртъёс, кытчы сӥзьыл-тулыс уд но пыры, уд но поты. Элькун кивалтӥсьёс Удмуртиысь 62 сыӵе сюресъёсты туэ лэсьтыны уксё шедьтӥзы бюджетэ пырисьтэм фондъёсысь.

Александр Бречалов пусъемъя, кема ӝеганы уг яра ни одӥг коркае интыяськем нылпи юртлэсь но садлэсь липетсэс выльдонэн. Со, куронъёсты чаклатэк, палнала (односкатной) лэсьтэмын. Тулыс лымызэ уг сузяло ке, шунам ву юрт пушкы пыре. Ялан котмыса улэменызы, борддорысь изъёс усьыло ни.

Черкогуртысь библиотекае 1 сюрс 500 пала лыдӟисьёс гожтӥськемын. Пӧлазы 600-эз — пиналъёс. Нош книгаос ӧжыт, туж вужесь ни. Библиотекаын ужасьёс нырысь ик выльдыны куро пиналъёслы чаклам фондэз. Озьы ик удмурт писательёслэн но кылбурчиослэн книгаоссы уг тырмо, пе. Татын ӵемгес утчало ӟуч кылэ берыктэм ужъёсты. Удмурт кылэз тодӥсьёс трос ӧвӧл ни. Тӧролы возьматӥзы «Чипчирган» сборникез, отчы пыремын удмурт кылбурчиослэн ӟуч кылэ берыктэм чуръёссы, поттэмын 1985-тӥ арын. Александр Бречалов малпамъя, шумпотымон, калык куре, лыдӟе ке асьме писательёсты. «Чипчирган» книгаез туэ ик выльдыса поттыны луонлыкъёс утчаны косӥз.

Кильмезь калыкен пумиськон ортчиз школаын. Спортзалын пукон инты ваньмызлы мырдэм тырмиз. Сётэм юанъёс пӧлысь тросэз тодмо вал ини. Александр Бречалов Интернет вотэс пыр быдэс элькунысь калыкен кусып возе. Уно вазиськонъёс вуо сюмсиослэсь но.

Тужгес трос юанъёс герӟаськемын вал тазалыкез утён удысэн. Амбулаториязы кема дыр ӵоже ӧвӧл терапевтсы, педиатрзы. Тазалыкез утёнъя министр Игорь Титов вераз: терапевт ужаны кутскоз ни та нуналъёсы, педиатр вуоз матысь дыре. Соос ужаны кутскизы ке, амбулаториын выльысь усьтӥськоз нуназе стационар. Отын 3 инты чакламын луоз пичиослы, 3 — бадӟымъёслы. Гуртоос куризы на УЗИ лэсьтон аппарат но флюорограф. Элькун кивалтӥсьёс юрттыны оскытӥзы. Тӧро тазалыкез утёнъя министрез, 2 толэзь ортчыса, выльысь Кильмезе лыктыны косӥз, гуртоос азьын кыл кутыны.

* * *

Сюмси черкогуртын но лэчыт ужпумъёс ӝутэмын вал. Кивалтӥсьёс нырысь ик дугдӥзы миым гужем Гурт шудонъёслы лэсьтэм стадионэ но спортзалэ. Лэсьтӥськисьёслэн ар ӵоже трос шекъёссы шараяськизы. Кылсярысь, футбол бусыын кот — дренажез, пе, шонертэм лэсьтэмын. Туп палдэ ке, трибунаосысь пластмасса пуконъёс соку ик пилисько. Соосты огпол вошъязы ни, али нош ик 4-ез тӥяськемын. Спорт объектлэн дась луэмез сярысь документъёс юнматэмын ӧвӧл ай. Тырмымтэосты палэнтытэк, уз но юнматэ.

Искусствоосъя нылпи школа но пиналъёслы библиотека 1 липет улын, вуж пу юртын, интыяськемын. Татысь пиналъёс ноку уг бырыло. Интызы ик уг тырмы ни. Соин ик, вужмем юртъерез тупатъям интые, выльзэ но бадӟымзэ пуктыны умой луысал, куризы сюмсиос. Буш инты но юрт вӧзын ик вань. Тӧро проект дасяны косӥз. Со дась луиз ке, федеральной яке инвестиционной программаосы пыриськыны луонлык кылдоз.

Ёросысь кивалтӥсьёсын но ужбергатӥсьёсын кенешонын трос пӧртэм ӵектонъёс чузъяськизы, лэчыт ужпумъёс сярысь но вераськон мынӥз. Александр Бречалов одӥгезъя но валэктон сётытэк ӧз кельты. Пумиськонъёсын ӝутэм куд-ог ужпумъёсты туэ ик быдэстыны пӧрмоз, кыӵе ке ужъёс берлолыгес кылёзы, вераз Тӧро. Со ушъяз ужбергатӥсьёсты но кивалтӥсьёсты, кудъёсыз ӝожтӥськыса гинэ уг уло, пӧртэм пайдаё ӵектонъёс дасяло. Гуртсы, ёроссы сярысь сюлмасько. Сыӵеослэсь ик ӵектонъёссэс тыршозы, пе, улонэ пыӵатыны.

Эдуард Степанов

Удмурт Дунне
By Удмурт Дунне Май 4, 2018 13:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*