Кызьы воштӥськоз Кызьпу арама? Та сярысь вераськизы «Удмурт Кенешлэн» исполкомаз

Удмурт Дунне
By Удмурт Дунне Май 14, 2018 14:10

Кылем арняе «Удмурт Кенешлэн» паськытатэм исполкомез ортчиз. Пумиськонын эскеремын вал кӧня ке лэчыт юанъёс. Нырысетӥез герӟаськемын Кызьпу арамалэн азинскеменыз, соин ик кенешонэ ӧтемын вал Кун Кенешысь депутат Сергей Буторин — ӵапак со али кивалтэ Ижысь М. Горький нимо садэн но паркъёсын. 

Исполкомын вераськизы Кызьпу арама, Удмурт культурая центр но матэктӥсь Гербер сярысь.

Уно вераськонъёс вал ини, Кызьпу арамаез выльдоно, удмурт шӧмо кароно шуыса, кылдытэмын соя концепция но. Нош исполкомын асьсэ дэмланъёсынызы тодматӥзы на Ижысь Гуманитарной лицейын дышетскисьёс Артём Леванов но Даниил Исаков. Пиос, пе, Кызьпу арама палан уло, соин соосты сюлмаськытэ парклэн тусбуез. Презентацизэс учкемзы бере «кенешчиос» пусйизы, дышетскисьёс туж бадӟым уж лэсьтӥллям шуыса: пумиськылӥллям дендрологъёсын, кенешиллям парк котырын улӥсьёсын, лэсьтӥськисьёсын. Но маиз тунсыко — уноез малпанъёссы али кутэм концепциен тупало. Угось пиналъёс вунэтӥллямтэ, арамалы удмурт шӧм но пыртоно шуыса.

Парк пумысен туннэ нуналлы 3 ужпумъёс сыло: паркез утёно, пушказ бадӟым юртъёс пуктыны лэзёно ӧвӧл, сое удмурт шӧмо кароно. Умой луысал кенерен котыртыса. Таиз пумысен «кенешчиос» ваньзы соглаш, но парклэсь пушсэ лэсьтонъя споръяськонъёс кылдо. Кылсярысь, «Удмурт вӧсь» огазеяськонлэн ёзчиосыз шуо, со пушкы куала пуктоно, вӧсяськонъёс ортчытъяно но кенер сьӧры мынӥсь-ветлӥсьёсты пыраны лэзёно ӧвӧл. Нош «кенешчиос» лыдъяло, парк Ижлэн шораз интыяське бере, со вань мылкыд карисьёс понна шутэтскон инты луыны кулэ — мед отын луозы нылпиослы площадкаос но, бызьылон сюресъёс но.

С. Буторин тау кариз «кенешчиослы» субботникъёсы мыло-кыдо пыриськемзы понна. Со пусйиз, Кызьпу арамае кадь Ижысь одӥг парке но сыӵе трос калык утялтӥськыны ӧз пота. Нош арамаез чылкытатон огпол гинэ ӧз радъяськы, уго парк бадӟым, нырысьсэ потаку, вань лымы но шунамын ӧй вал на.

Исполкомын эскерем 2-тӥез юан — Ижкарын Гербер ортчытон. Котькуд ар со луэ Кызьпу арамаын 12-тӥ инвожое. Туэ радъясьёс сое фин-угор шӧмо карыны малпало. Удмуртъёс сяна, шулдыръяськонэ ӧтемын луозы Удмуртиын улӥсь поръёс, мордваос, Удмурт кун университетын дышетскись коми студентъёс, венгер но фин дышетӥсьёс.

Ижын удмурт культурая центр кылдытон но сюлмаськытэ. Та вакытэ асьмеос ум на тодӥське, усьтӥськоз-а со В. Короленко нимо театрлэн вуж юртаз яке, сое сэрттыса, выль юрт пуктэмын луоз-а. «Кенешчиосын» пумиськонын Удмуртилэн Тӧроез А. Бречалов пусйиз вал, выль центр кунлык басьтэм дырысен 100 ар тырмонлы — 2020-тӥ арозь — усьтӥськыны кулэ шуыса. Нош асьмелы али огкылэ вуоно: вужзэ юртэз сэрттыны малпазы ке, вылез вылтусызъя солы укшаны кулэ яке ӧвӧл.

Елена Рябина 

Удмурт Дунне
By Удмурт Дунне Май 14, 2018 14:10