Кызьы ортчиз фин-угор егитъёслэн конференцизы (ИФУСКО-2018)

Удмурт Дунне
By Удмурт Дунне Май 30, 2018 15:30

Куартолэзьлэн кутсконаз Эстониысь Тарту карын егит финно-угроведъёслэн конференцизы (IFUSCO) ортчиз. Сое 34 ар талэсь азьло малпазы но радъязы студентъёс, кудъёсызлы тунсыко вал фин-угор калыкъёслэн лулчеберетсы но кылъёссы.

Конференцие пыриськизы ог 20 удмуртъёс.

Со дырысен конференция котькуд ар ӵоже пӧртэм каръёсын ортчылӥз ни. Тартуэ конференцие ветлэмелы мон туж шумпотӥсько, фин-угор студентъёс быгато радъяны сюлме пырымон ужрадъёсты, соос улон шоры учкемез но вошто.

Тросэз эшъёсы, кудъёссэ мон ӧтисько вал мыныны Тартуэ, шуизы: дуно усе. Нош мон малпасько, та порма ужрадъёсы уксёез жаляно ӧвӧл, малы ке шуоно отын мында басьтэм тодон-валанэз, мылкыдъёсыз огшоры улонысь шедьтыны шуг. Конференцие пыриськон понна мон 64 евро тыри — гостиницаын улон, ӵукна но нуназе сиськон, конференцилэн эмблемаеныз футболка басьтон, Чудское озеро доры ветлон понна. Вуоно арын IFUSCO Австриысь Вена университетын ортчоз. Австрие ветлон Эстонилэсь дуногес усёз ни, озьы ке но удмурт егитъёс студент дыръязы мед дӥсьтысалзы фин-угор ужрадъёсы ӵемгес пыриськыны.

Куке котырад наукая докторъёс, пӧртэм кылъёсын вераськись студентъёс, выльысь дышетскем, мар ке вылез бордын ужам потыны кутске, валаськод кадь, тон азьын трос инвисъёс усьтӥськыны быгато на шуыса. Кызьы уз пот венгер кылэз дышетэмед, куке Венгриысь нылаш тонэн удмурт кылын вераськон куспаз пор ныл доры берытске но утыр пор сямен вазе? Поръёс сярысь верано ке, соос Тартуын мон понна мукет паласен усьтӥськизы — синмаськи соослы, шулдыр кырӟанъёссылы. Мон пор гурт вӧзын будэмын бере, пичи дырысеным шӧдӥ, кызьы удмуртъёс поръёсыз ӵемысь серекъяса, алама вераса уло. Нош Тартуын пушкы тыриз, куке эстонецъёс, комиос но удмуртъёс кырӟазы пор сямен, пӧлазы одӥг пор но ӧй вал ке но. Ӵапак сыӵе дыръёсы мукет калыкъёслэсь культуразэс но кылзэс гажаны, яратыны кутскиськод.

Оглом ужрадэ 190 адями пыриськиз, соос пӧлысь 100-эз докладзэс лыдӟизы. Ужазы фольклористика, литература, культура, лингвистика, история, общество но ивор вӧлмытон, дышетон секциос. Жаляса верано, вань докладъёсыз кылзыны дыр уг тырмы, малы ке шуоно секциос огвакытэ ужало, соин ик мон фольклористикалы, литературалы но обществолы сӥзем секциосы гинэ вуттӥськи.

Эстонъёс возьматӥзы ас калыксылэсь лулчеберетсэ.

Пусйысал удмурт егит тодосчилэсь Лариса Дмитриевалэсь наивной литература сярысь докладзэ, со мынэсьтым синъёсме усьтӥз кадь, литература шоры мукет сямен учкыны луэ шуыса. Эшшо ымме усьтыса ик кылзӥ, кызьы Эстониысь удмурт Сергей Сидоров виртуальной экспедицизэ лэсьтӥз. Виртуальной экспедиция — со Сергейлэн вордскем гуртэз сярысь вотэс бам. Отчы пыртэмын Татарстанысь Тэремшур гурт котырысь микротопонимъёс, вань семьяослэн кушем нимъёссы, гуртлэн историез. Тунсыко вал на Комиысь нылъёслэн асьсэ литераторъёссы сярысь мадемзы. Озьы ик секциос ужан вакытэ луэ вал учкыны фин-угор кылын киноос. Мон Удмуртиысь Денис Корниловлэсь «Анай» кинозэ гинэ учкыны дыр шедьтӥ, со сяна, возьматӥзы на «Пузкар» фильмез, Ксения Ворончихиналэсь экспериментальной кинозэ, Сергей Сидоровлэсь удмурт мультфильмъёссэ но трос пӧртэм фин, пор, коми, эстон кылъёсын киноос. Со сяна, радъямын на вал лив, ижор, выру кылъёсъя но фин-угор комиксъёс суреданъя мастер-классъёс.

Тверьысь карелъёс туала стенд-ап пормазэс возьматӥзы.

Конференциын студентъёс докладъёс гинэ уг кылзо, котькуд ӝыт соос понна шутэтскон радъяське. Нырысетӥ ӝытаз «Угри-мугри» концерт ортчиз, кудаз котькуд калык аслэсьтыз номерзэ возьматыны быгатӥз. Вань фин-угор калыкъёслэн пӧртэм кырӟанъёссы чузъяськизы, кин ке эктӥз но. Нош Тверьысь карелъёс воксё туала стенд-ап пормазэс возьматӥзы. Сцена вылын асьсэзыз воземзы ӟучомемзэс возьматӥз кадь, шӧдӥське ни, соос вашкала карел культуразылэсь кыдёкын шуыса. Нош кузь но мӧзмыт эстон яке фин кырӟанъёс бере туж яркыт кылӥськиз украинкалэн но финкалэн эрзя кылын кырӟамзы. Соос бере мынам но дӥсьтонэ улӟиз, лэся, возьдаськыса ке но, сцена вылэ 2 пол потано луи. Нырысь коми эшъёсы пӧлазы ӧтизы, тодо вал уго, мон коми кырӟанъёсыз яратӥсько шуыса. Собере ми вань удмуртъёсын потам на кырӟаны, ярам, Эстониысь удмурт Паша Кутергин арганэныз отын вал. Куке адӟиськод, кызьы мукет калыкъёс ваньзы ӵош пото, интыын пукем уг пот ни, ми но трос кузя вуэмын шуыса возьматэм потэ. Макем шумпотымон ук, куке фин пияш тэбине удмуртъёс борды, «Орина-Маринаез» кырӟаны курыса. Собере мон но поръёс сьӧры ветлӥ, «Юрже-юреш» кырӟанзэс кылэме потэ шуыса. Мукет ӝытъёсы ми вуылӥмы на мунчое, Тартуэтӥ экскурсие, Йӧскалык эстон музее — татын милемлы 3 час но ӧз тырмы ваньзэ учкыны, эскерыны. Туж тунсыко! Америкаысь музейёслы синмаськыса бертӥ вал кылем сӥзьыл, нош туала фин-угор экспозиция «Урал палась шуккиськем куара» воксё абдратӥз.

Чудское озеро доры ветлонмы но туж тунсыко вал. Пырамы староверъёслэн музеязы но цикорийлы сӥзем юртэ, вуылӥмы эстон семья доры куное. Эстонецъёс туж умой возьматӥзы куно пумитаны быгатэмзэс: сектазы, сюдӥзы, мунчое пыртӥзы.

Конференциын фин-угор эшъяськон сюлмам мур пыӵаз, туж мӧзмисько ни валче кырӟам-эктэммылэсь но кылъёсмес сураса вераськеммылэсь.

Алина Крестьянинова
Туспуктэмъёс: IFUSCO-лэн оргкомитетэзлэн архивысьтыз

Удмурт Дунне
By Удмурт Дунне Май 30, 2018 15:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*