Кыӵе сюлмаськонъёсын улэ Шарканысь музей

Удмурт Дунне
By Удмурт Дунне Май 17, 2018 13:00

Шарканысь шаертодонъя музейын нуналлы быдэ кыӵе ке ужрадъёс ортчо. Соос сярысь тупен-тупен мадиз музеен кивалтӥсь Галина Стрелкова.

Шарканысь шаертодонъя музеен тодматэ методист Е. Ефимова.

Шарканысь музей 1997-тӥ арын 1-тӥ ноябре кылдэмын, нош нырысетӥ адӟытонзы ортчиз вуоно араз гинэ. Со сӥземын вал Шаркан черкогуртлэн 320 ар тырмонэзлы. Со дырысен музей арысь аре тунсыко арбериосын узырме. Туннэ нуналлы 4 залзы ужа, фондазы 5 сюрс пала экспонатъёс возисько. Музейчиос данъяськыны быгато туж вашкала дӥсьёсынызы но: пиосмурт дӥськутэн, нылкышно дэремен но куинь сэрего кышетэн. Куэм арбериоссылы даурлэсь ятыр ни.

— Арлы быдэ быгатэммыя гуртъёсы потаськомы, калык но дышиз ни, милемыз доразы ӧтё, вашкала тӥрлыкъёсмы трос луэмын ни шуыса, — вера Галина Стрелкова. — Кылем арын Сильвое, Кечгуртэ но Карсашуре потамы. Вуж тӥрлыкъёссэс куд-огез шумпотыса кузьмало, мукетъёсыз доразы возё, песянай-песятайёссэс тодазы вайыто шуыса.

Музейлэн юртэз, пе, 1960-тӥ аръёсы пуктэмын, музъеме выйыны кутскемын ни. Быгатэмзыя маке лэсьтыны выро ке но, пайдаез трос ик уг шӧдӥськы.

Озьы ке но музейын ужасьёс доразы пырась калыклы сюлмаськонъёссэс возьматыны уг тыршо. Та вакытэ Быдӟым Вормонлы сӥзем «Война но нылкышноос» адӟытонзы ужа. Быдӟым ож дыръя ёросысьтызы 3 нылкышноос пуляос улын быремын. Оже пыриськемъёс пӧлысь Антонина Васильевна Перевозчикова гинэ улэп на. Гуртэ кылем нылкышноослэн но улонзы капчи ӧй вал. Ваньмыз со сярысь туала калыклы тодазы вайыто война вакытысь лэсьтэм туспуктэмъёс.

Музейёслэн калыккуспо нуналзылы сӥзьыса, та арняе отын нуналлы быдэ пӧртэм ужрадъёс ортчо. Музейын ужасьёс калыкез Шаркан черкогуртэн тодмато, пӧртэм мастер-классъёс, квест-шудонъёс ортчыто.

Валентина Емельянова

Удмурт Дунне
By Удмурт Дунне Май 17, 2018 13:00