Кружокысен — автономиозь. Кызьы огазеяськизы удмуртъёс?

Удмурт Дунне
By Удмурт Дунне Май 16, 2018 12:36

Туэ пусйиськом удмуртъёслэсь 100 ар талэсь азьло нырысьсэ огазеяськемзэс. Ма воштӥськиз даур ӵоже?

1919-тӥ арын удмуртъёс люкаськизы 3-тӥ съездазы.

Калыкъёслэн кужымзы

Ортчем сюресмес тодыны луэ «Удмурт кенеш» — 20» книгая, кудӥз поттэмын вал Н. Мусалимовлэн кичӧлтэмезъя. Книгалэн берло бамъёсаз вань Л. Христолюбовалэн люкам хронологиез. Отын нырысетӥ абзацаз ик шуэмын, удмуртъёсты общественно-политической уже кыскыны кутскизы вал ини 1901-тӥ (1902-тӥ) арын ик 4 удмурт дышетӥсьёс. И. Яковлев, И. Шкляев, Ф. Волков, С. Калимуллин — Пермь губерниысь Бадӟым Гондыр гуртын (со али Пермь улосысь Куеда ёросэ пыре) лушкем огазеяськон (кружок) кылдытӥзы, отын вераськон нуизы удмуртъёслы асьсэлы огазеяськон кылдытон сярысь. Ӝоген соос шараямын но губерниысь уллямын вал. Историысь та учырен бадӟым гондыръёслэн данъяськемзы луэ.

Отӥяз хронологиын гожтэмын: 1918-тӥ арын 26-тӥ-30-тӥ июне Елабугаын ортчиз быдэс Россиысь удмуртъёслэн 1-тӥ съездзы. Солэн валтӥсь решениез вал РСФСР-ысь Наркомнаце удмурт отдел усьтон сярысь вазиськон. Съездлэн нимыныз удмуртъёс тау карыса Полтавае В. Короленколы — удмуртъёсты «Мултан уж» дыръя утем муртлы — телеграмма ыстӥзы. Чаклалэ: пуроме ни Граждан ож, вуэ кышкыт вакыт, нош удмуртъёс съезд люкало, соос ужпум пукто кыл но школа пумысен. М. Прокопьев Москваын дыръяз ини Наркомнацын пумиське Москвае Наркомпрослэн курсъёсаз дышетскыны лыктэм К. Гердэн но удмуртъёслы асьсэлы кун, государство кылдытон сярысь вераськон мытэ. Гердлы со осконтэм потэ. М. Прокопьев канцелярияз пыре но, отысь быдэс ӟыгыртэт бумагаос поттыса, шуэ: уд ке оскиськы, учкы, мон тани конституция но гожтӥ ни, карта но суредай ни, комиссаръёс дортӥ но ветлӥ ни. Юрттом, шуизы.

Большевикъёс шузиесь ӧй вал. Соос валазы: таӵе кышкыт вакытэ покчи калыкъёслэсь кужымзэс уже кутоно. Большевикъёс Граждан ожын соин но вормизы: покчи калыкъёслы эрик, асьсэ кылынызы дышетскыны но улыны луонлык сётӥзы.

Автономия кылдытон вылын юн сылӥзы Трокай Борисов но Константин Яковлев, Иосиф Наговицынлы со осконтэмгес потылӥз. Озьы ке но 4-тӥ ноябре удмуртъёслэсь, мариослэсь, калмыкъёслэсь автономиоссэс кылдытон сярысь декрет В. Ленинэн но М. Калининэн гожтэмын вал.

Зарни кылъёс

Граждан ож быриз но, ваче пумит луонъёс выжизы власте вуэм адямиос пӧлы. Кылдӥз бюрократической аппарат. Эчешон ӝутскиз автономилы центр быръён котырын — Ижкар яке Глазов. Вуизы сютэм аръёс. Национальной ужпумъёсты улонэ пыӵатон ӝеганы кутскиз. 1924-тӥ арын дорамы вуылӥз всесоюзной староста М. Калинин. Со шуиз: Граждан ожен но сютэм аръёсын сэрен асьмеос ӧм быгатэ на национальной ужпумъёс борды умой-умой кутскыны, но «мы сделаем всё, чтобы защитить культуры малых народов от всесокрушительного напора великих цивилизаций».

Покчи калыкъёс понна со вал зарни кылъёс. Ортчоз кӧня ке ар, но национальной ужпумъёсын югдур чутрак воштӥськоз. 1925-тӥ арын Москваын пытсаське «Жизнь национальностей» газет. 1930-тӥ аръёслэн кутсконазы ужамысь дугдэ Центриздат, кудӥз поттэ вал Россиысь вань удмуртъёслы, вань чувашъёслы, вань поръёслы но мукет калыкъёслы литература. 1929-тӥ арын шаерчиос пӧлын массовой репрессия ортче. 1932-тӥ арын кылдэ «Софин» уж. Мар луиз? Ужпум вал со бордын — ишкалтоно калыкез аслаз выжыосызлэсь. Кызьы гожъяз соку Иосиф Наговицын, пукон интызэ шунтэм бюрократилэн уг поты вал националъёслы ас интыоссэ сётэмез.

Национальной самосознание вылэ вуэ шуккет бӧрсьы шуккет. Вань калыкъёслы со шуккет вал, но удмурт калык ичи бере, котькуд шуккетлэсь солы эшшо но вӧсь луэ. Коренизация шуон политика куашка но — со интые вуэ номенклатурщина, кудӥз ас котыраз каре сыӵеоссэ гинэ, кин кылзӥське, кин политикалэн куронъёсызъя туж тупатӥське. Кивалтӥсьёс пӧлын конкуренция быре но, бюрократие кылё соос, кинэ шуо назначенецъёс.

1929-тӥ арысен национальной принципъя люкаськылыны уг ни луы вал. Национальной движение кысэ, люкаськыны луэ вал классовой но профессиональной амалъя гинэ. «Удмурт клублэн» но «Удмурт культурая обществолэн» 1980-тӥ-1990-тӥ аръёслэн вожазы вормонзы — соос быгатӥзы выльысь национальной принципез улӟытыны. Со вал сыӵе паймымон, сыӵе витёнтэм шорысь, бадӟым кивалтӥсьмы, «Удмурт культурая обществолэн» кенешаз лыктыса, шуиз: «Что вы тут дурью маетесь?» Со вал историе пырымон фраза. Зэм, со кивалтӥсь удмурт движениез валаны тыршиз, «Удмурт Кенешлэн» кивалтӥсьёсыныз К. Пономарёвен но, В. Тубыловен но огъя кыл шедьтыса, асьме движенимылы берло трос юрттӥз.

Лэсьтонэз трос на

Асьмеос умой тодыны кулэ историмес. Кулэ гожтыны удмурт национальной движенилэсь ортчем сюрессэ. Валаны, малы удмурт самосознание туж улын, малы анай-атайёслэн нылпиоссэс удмурт классъёсы сётэмзы уг поты. Учке со ласянь удмуртлэсь сюрессэ («Мултан уж», «Лудорвай уж», «Софин уж») но валалоды.

Асьмеос шуиськомы: нылпи удмурт кылзэ семьяяз мед дышетоз. Нош мар понна государственной кыл? Семьяын дышетӥзы революцилэсь азьло но. Нош мумы-бубыослэн али дышетэмзы уг поты ке, асьмелы асьмелэсь юано — малы уг поты? Кызьы но малы асьмеос со калэ вуимы?

Куке мон малпаськисько, мар лэсьтӥз берло аръёсы удмурт движение, К. Герд нимо национальной гимназиез тодэ вайыса, искусствоосъя элькун школаез учкыса, мон нырысь ик малпасько тае: Конституциын удмурт кыл государственной каремын вал, асьме площадьёсы вуттэмын национальной символъёс — Кузебай Герд но Трокай Борисов. Кин ке но шуиз: синпелетъёс — со «публицистика в камне». Нош асьмеос одно ик кулэ В. Короленколы выль памятник пуктыны. Асьмелы кулэ на М. Прокопьевлы, Ашальчи Окилы, Филипп Кедровлы синпелетъёс, отӥяз — М. Петровлы но, Флор Васильевлы но, Г. Красильниковлы но.

«Удмурт Кенеш» трос ужпумъёсты ӝутӥз но трос ужъёсты лэсьтӥз ини, эшшо но тросгес на лэсьтоноез.

Александр Шкляев

Удмурт Дунне
By Удмурт Дунне Май 16, 2018 12:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*