КПРФ фракция гурт удысэз ӝутонъя закон кылдытон бордын ужа

Удмурт Дунне
By Удмурт Дунне Май 10, 2018 11:30

Хозяйствоосты утёно, соку уж но луоз, гурт но улоз, шуэ Алексей Конорюков.

Кун Кенешлэн 6-тӥ созываз КПРФ фракцилэн 5 депутатэз ужа. 4-ез соос партийной списокъя, 1-ез одӥг мандатъем округъя быръемын. Бадӟым саклык висъяло гуртысь улонэз ӝутонлы.

 

Фракцилэн кивалтӥсез Алексей Конорюков пусъемъя, депутатъёслы адямиос пӧртэм юанъёсын вазисько. Огез тужгес висьытӥсез — корка пуктонлы музъем висъян. Кылсярысь, Дэри ёросын трос нылпиё семьяослы, улон интылы кулэяськисьёслы участок ӵемысь висъяло бусые. Отчы ву но, газ но, тыл но кыскемын ӧвӧл. Эшшо ке сюресэз начар. Адямиос берпум уксёенызы пуктӥсько, кытысь соос коньдон шедьтыны кулэ на сюрес лэсьтыны? Соин ик музъем висъян пумысен законэ воштонъёс пыртон бордын ужаськомы, шуиз Алексей Конорюков.

Мукет ёросъёсын но югдур пӧртэм ӧвӧл. Татысь улон-вылонэз радъяны хозяйствоос юртто вал ай: сюрес но сузяло, тыл но кыско. Но туннэ хозяйствоослы асьсэлы юрттыны дыр вуэмын.

— Верасез вань: хозяйство — со бизнес, ачиз мед азинтӥськоз, — вера Алексей Конорюков. — Фракция таин соглаш ӧвӧл. 2018-тӥ арлы хозяйствоослы бюджетысь висъяны чакламын ог 2,5 миллиард манет. Со пӧлысь гуртоос дорозь али ог 10 процентэз гинэ субсидиос вуттэмын ай. Вавож ёросысь кужмо «Колос» хозяйствоен кивалтӥсен, депутатэн Владимир Красильниковен кенешимы. Солэн гинэ но туннэ уксёез уждун, выт тырыны сяна ӧвӧл. Туннэ хозяйствоослэн субсидиез но басьтэмзы уг луы, кредитэ но пырыны уг быгато. Туэысен быдэсъяськыны кутскиз нимысьтыз постановление: налоговой азьын 1 копейка пунэмед вань ке, субсидия уг сёто ни, мукет льготаос но быро. Али сыӵе чурыт куронъёсты палэнтыны кулэ. Гуртоослы ӝутӥськыны юрттоно.

Алексей Конорюков пусъемъя, фракция ваньзэ лэсьтыны тыршоз гурт удысэз ӝутонъя закон кылдытон вылысь. Хозяйствоосты утёно, соку уж но луоз, гурт но улоз, шуэ со.

Елена Сараматова
Туспуктэм: kprf-udm.ru

Удмурт Дунне
By Удмурт Дунне Май 10, 2018 11:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*