Глазов ёросын быдэс арзэ сӥлы карозы Иосиф Наговицынэз

Удмурт Дунне
By Удмурт Дунне Май 21, 2018 14:10

Удмурт автономиез кылдытӥсьёс пӧлын вал Иосиф Наговицын. Солы сӥзем огез синпелет пуктэмын Глазов ёросысь Октябрьской каргуртын. Та палъёсысь Туктым гуртын вордӥськиз дано удмурт воргорон. Туэ солы 130 арес тырмысал. Сое сӥлы карыса, ёросын Наговицынлэн арез ялэмын.

И. Наговицынлэн нимыз туннэ вужере кылемын, шуыны луоз. Солы сӥзем бадӟым ужрадъёс уг ортчыло, нимыз быдэс Удмуртия тыр кылымон уг чузъяськы. Тани туэ но 130 ар тырмонзэ пусъён азьын шыпыт.

— К. Гердлы, Т. Борисовлы, А. Окилы сӥзем конференциос, лыдӟонъёс ортчыло, соослэн синпелетъёссы доры сяська керттэтъёс тырыло, — кӧтӝожзэ вера Октябрьской каргуртысь библиотекарь, 30 ар пала И. Наговицын сярысь материал бичась Валентина Шудегова. — Та адямиос трос лэсьтӥзы удмуртлэсь асваланзэ ӝутон, автономиез кылдытон понна. Но Иосиф Наговицын но соослэсь ӧжыт ӧз лэсьты, оло, тросгес но. Мон малпасько, со вужере кылиз, малы ке шуоно ас вакытаз солэсь нимзэ кыре-буре поттон понна сюлмаськись ӧз шедьы. Тани ми палъёсты гинэ учконо ке, 125 ар тырмонзэ пусйыкумы гинэ, быгатӥмы Октябрьскойысь библиотекамылы солэсь нимзэ сётыны. Но ми ас пал адямимес ум вунэтӥське, библиотекаямы И. Наговицынлы сӥзем сэрегмы вань, школа музейын кыӵе но со материалъёс утиськемын. Гуртамы 1969-тӥ арын Иосиф Алексеевичлы синпелет пуктэмын. 1980-тӥ аръёсы выльдэм синпелетэз школа азбаре выжтэмын вал. Сое усьтонэ вуылӥз И. Наговицынлэн Москваын улэм Владимир Наговицын пиез. Жаляса верано, али со улэп ӧвӧл ни. Школа азбарысь синпелетэз утялтыса-чакласа возё пиналъёс. Али кусып тупатӥм Иосиф Алексеевичлэн ӵыжы-выжыеныз Валентина Хазиахметоваен.

Жаляса верано, Иосиф Наговицынлэн Туктымын вордӥськем юртэз ӧвӧл ни. Сое 1950-тӥ аръёсы Василий Наговицын, Иосиф Алексеевичлэн братэз, Балезиное нуэм, али юрт вужмыса сэрттэмын ни. Но Туктымын утиськемын школалэн юртэз, кытын кӧня ке дышетскиз пичи Ося, озьы шуо вал Иосиф Алексеевичез семьяязы. Али школалэн юртаз лулчеберетъя клуб. Валентина Шудегова верамъя, туэ со юрт борды И. Наговицынлы сӥзем буре ваён пул юнматыны чаклало.

Дано ас пал адямизэс сӥлы карыса, туэ ёросын котькуд школа аслэсьтыз ужрадзэ ортчытэ. Ёрос библиотекаын И. Наговицынлы сӥзем конференция радъяськоз. Октябрьской библиотека ёрос культурая юртын Иосиф Алексеевичлэн вордӥськем нуналаз асьлэсьтыз бадӟым ужрадзэ ортчытыны чакла. Валентина Шудегова И. Наговицын сярысь пичигес книга поттыны малпа, нылпиос тодыса мед будозы, пе, кыӵе бадӟым адями вордӥськемын глазов палъёсын.

Ангелина Снигирёва

Удмурт Дунне
By Удмурт Дунне Май 21, 2018 14:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*