Гӧгӧрсинъёс. Николай Павлов. Верос

Удмурт Дунне
By Удмурт Дунне Май 10, 2018 16:30

Николай Павлов — «Удмурт дунне» газетлэн Кизнер посёлокын улӥсь авторез.

5-тӥ классэ ветлӥсь Арсениез, школаысь бертыкуз, машина шуккиз.

Эмчиос 2 пыдысьтыз ик чигиськем лыоссэ бурмытыны быгатӥзы, но пыд вылаз султытыны кужымзы ӧз тырмы. Сюрлыез, пе, шуккиськем, соин ик пыдесъёсыз уг кылзӥсько, парализовать каремын.

4-тӥ арзэ ни Арсений инвалидной коляскаын пуке, юрттӥсьтэк комнатаетӥзы сяна ветлыны уг быгаты.

Арсений кирпичлэсь ӝу-тэм 2 этажъем юртын улэ. Квартираезлэн укноосыз одӥгез уйпала учке, мукетъёсыз — нуназе пала. Дораз одӥгназ пукыкуз, пияш коляскаеныз укноысь укное ворттылэ. Уйпаласез урам пала учке бере, котькуд ортчисез: адямиосты, машинаосты, пуныосты — берзы ышытозь учкыса келялля. Лымшор пала учкисез укно азбарзэс возьматэ, но татын нуназе куазен ветлӥсьёсты шер адӟод: бадӟымъёс ужаны кошкемын, пичиос школаын, садикын. Но тапал укно дорын пукыны Арсенийлы мӧзмыт ӧвӧл, угось лобась гӧгӧрсинъёс бордазы кыско. Азьвыл аръёсы татын соос ӧз адӟиськылэ кадь, оло, Арсений соосты санэ ӧз басьтылы. Кинлэсь ке но верамзэ кылэмез вань: соосты, пе, возён понна Ӟазег Олёш юромо инты лэсьтэм, утялтыса возем. Ог-огзылы дышиллям ни, Олёш тылобурдоосты шумпотыса лэзёз но, олокытысь, оло, инвис сьӧрысь потыса, доразы берытско, пельпумаз пуксьылыны но уг кӧберало. Одӥг уе, шудтэм учыр кылдыса, Олёшлэн коркаез кузёеныз валче, гӧгӧрсин возён интыеныз пеньлы берытскизы. Сутскем бервыл котырын кема бергамзы бере, пуксён инты шедьтытэк, бурдоос мукет инты утчаны лобӟиллям. Самой со гӧгӧрсинъёс ик, дыр, лыктӥллям, малпаз Арсений.

20-25 ар талэсь азьло пуктӥськыкузы юртъёслэн липет йылазы корка сигысен потаны юромо бадӟым укноос лэсьтылӥзы. Кызьы-о соостэк липет йылэ сюрод? Квартираосын пуэн эстӥськись гуръёссы, пиналъёссы вань бере, ӵакмем муръёзэ сузятэк уд возьы, телевизоръёс уноезлэн кылдэмен, антеннаос пуктылоно, собере, пилиськем шиферез воштылыны тубано. Самой со пиялатэм укноез ик синйылтӥллям Олёшлэн гӧгӧрсинъёсыз.

Нырысь аръёсаз соос ог дасо сяна ӧз адӟиськылэ. Али ке — одӥг, кык… вить… дас… Арсений соосты лыдъяны ӧдъяз но, кызёзь-а, мар-а вуыса, сураськиз. Лобакузы лыдъялод шат соосты, пукысалзы ке, соку, оло, быгатысалыд. «Ойдо ӵок, кулэез но ӧвӧл», — ас понназ шыпыртӥз Арсений. Зэмзэ но, сое гӧгӧрсинъёслэн лыдзы сокем ӧз тунсыкъяськыты, паймытӥз соослэн ог-огзэс шӧдыса, валаса лобамзы.

Пукыӵ ньӧл кадь шуак потылэмзэс но корка вадьсын лобамзэс учкыса, Арсений укно азьын трос пол пукылӥз ни. Кызьы меда соос кудпала берытсконзэс ваньзы одӥг кадь валало, кин соослы кыӵе ке куара, вырос яке тодмет сётэ? Оло, пӧлазы азьветлӥсьсы вань, валтӥсьсы? Арсений пӧлысьтызы сыӵезэ шедьтыны малпаз. Гӧгӧрсинъёслэсь лобакузы интыосынызы вошъяськемзэс валаса, чакласькемысь дугдӥз. Ваньзы одӥг тусъемесь, чагыресь. Вань на тӧдьыез но куренез. Таосыз син азьысьтыз уз ышылэ шуыса, сак чакласа возиз та кыкъёссэ. Таосыз но пӧртэм уг лобало. Иське, кин соосын кивалтэ?

— Эх, мынам но бурдъёсы луысалзы ке, соос кадь ик лобасал! — ас мылкыдзэ шара усьтӥз Арсений.

— Лобасалыд, нырысь пыд йылад тэтэ карыны дышетскы, — кытысь ке куара кылӥськиз.

Вӧзысьтыз нокинэ адӟы-тэк, Арсений тодмотэм куаралы шыпыртӥз:

— Шонер вераськод, льӧль малпанэ быдэсмонтэм, Икар сямен, сачак музъем вылэ усё.

Гӧгӧрсинъёс огшап лобамзы бере шутэтскыны укноетӥзы уг пыро, шиферен шобыртэм липет вылэ интыясько. Кытын но кудпалан лумбыт лобало, кытысь сиён шедьто? Ку кӧлыны но вутто меда? Арсений султыку, соос лобало ни, кӧлыны выдыкуз, лобало на, жадёнэз но уг валало, лэся.

Корнилов

Арсенийлэн коркаез вадьсысь кык этажъем коркалэн шиферен шобыртэм липетэз, толалтэ зӧкос пуксем лымылэн секытэзлы чидатэк, ӵемысь пилиськылӥз. Тулыс лымы шунамъя, зор-кот усьыку, висъёстӥз вуэз сигаз виялляз. Озьы юртлэсь липетсэ воштон черод вуиз. Тупатъян ужен вырись бригада липетсэ 2 арня куспын профнастилэн шобыртӥз. Мар быдӟа шумпотон вал улӥсьёсызлы! Нош гӧгӧрсинъёслы?

Арсений, гӧгӧрсинъёсыз шоры учкыса, паймиз: малы соос корка котыртӥ, вылӥе ӝутскыса, улӥе лэзиськыса, лобало-лобало но, нокытчы пуксьылытэк, адӟиськонтэм интые ышыло. Малы липет вылэ уг пуксьыло, укнояз уг пырало?

Малпаськыса пуконъяз гӧгӧрсинъёсыз берытскизы. Дышем сяменызы куд-огез пырак укноязы пырон вылысь лобӟизы вал но, йыгам (ворсам) укноез адӟыса, шуак кожизы. Уноез чилясь липет вылэ лэзиськизы, ӟечак пуксьыны ӧз вуэ — пыдъёссы вольыт липет борды кырмиськыны ӧз быгатэ, йӧвалег вылтӥ кадь гылӟизы. Уллё, бурдъёсыныз сэзъяса, Арсениен люкиськыса кадь, кошкиз.

Чагыр эшъёссэ возьмаса, укно дураз Арсений пукылӥз на, оло, берытскозы, малпаз. Но уллё ӧз ни возьматскылы. Куддыръя гӧгӧрсинъёс оген-кыкен вуылӥзы, корка котыртӥ лобазы, липет йылэ пуксьылыса но утчазы, но пыдъёссы гылӟемен, лобӟылӥзы. «Разведчикъёссы, дыр, — малпалляз Арсений. — Вордӥськем интыоссылэсь мӧзмо, лэся».

Арсений анаезлэсь гӧгӧр-синъёс сярысь юаз.

— Магазинэ ветлыкум, кытӥ-отӥ адӟылӥсько. Ӟус вылын пукись арлыдо нылкышноос нянен, кеньырен, тысен соосты сюдо. Тылобурдоос адямиослэсь чик уг кышкало, пыд ултӥ ик бызьыло. Уг тодӥськы, тынадъёсыз-а, ӧвӧл-а — ваньзы одӥг тусъемесь. Кудпалась лыктэмзэс, кошкемзэс но ӧй чаклалля, — шуиз анаез.

Магазин дорын бызьы-лӥсь гӧгӧрсинъёс сярысь анаезлэсь верамзэ кылыса, Арсенийлэн одно отчы ветлэмез потӥз. Анаез пумит ӧз луы, арнянуналэ, пе, ветломы. Кӧснуналэ, ӧжытак мед чурытмоз шуыса, колды нянь басьтӥз: озьы, пе, Арсенийлы пыргытыны капчигес луоз.

Лыктыкузы одӥг гӧгӧрсин но ӧй вал на. Кыӵе ке кышномурт гинэ скамейка вылын кияз пакетэн шутэтскыса оло гӧгӧрсинъёсты возьмаса пуке. Анаез, Арсенийлэсь колясказэ скамейка урдсы пуктыса, магазинэ пыриз.

— Сыӵе пинал мурт инвалид коляскае пуксёно луэмед. Мар-о луиз? Номыр карыны уг луы ни-а? — кӧня ке пукемез бере кышномурт, жалясь синъёсыныз шораз учкыса, юаз.

— Адӟонэ сыӵе, дыр, — вакчияк вераз Арсений.

— Кыӵе жаль… — кышномурт эшшо маке вераны ӧдъя вал но, шӧдтэк шорысь вылӥысь чагыр уллё лэзиськиз, веранзэ уретӥз.

— Ой-й, кӧня соос! — паймеменыз, шумпотэменыз, коляскаезлэн кутӥськоназ кырмиськыса, ӝутскыны малпа вал но, луонтэмзэ валаса, Арсений пальышаз гинэ.

Кышномурт, пакетысьтыз поттыса, гӧгӧрсинъёслы кыӵе ке кеньыр пазьгиз. Чагыр комокъёс кеньырез оген-оген вожмаськыса кокчало.

Арсений но колдызэ тӥялтыса кырымаз векчигес пыргытӥз но, «гули-гули» вазьыса, азязы куштӥз.

Ваньзы одӥг быдӟаесь, чагыресь, нокыӵе висъясь тодметсы ӧвӧл. Дугды ай, вал ук уллёе пӧлын тӧдьыез но куренез. Кытын-о соос? Уг адӟисько. Бырыны шедизы шат? Оло, та воксё но мукет уллё? Эшшо одӥг пол тэтчаса кокчаськисьёс вылтӥ синъёсыныз ортчиз. Адӟиз, тӥни ук — кыкназы но, тӧдьыез но куренез, артэ бызьыло.

— Мынамъёсыз! — кеськемзэ ӧз ик шӧды Арсений.

Арсений берпуметӥ нянь шоремзэ сюдыку, анаез магазинысь потӥз.

— Адӟиськод-а, гӧгӧрсинъ-ёсыд, пие! Учкы ай, тодмаллям, лэся, тонэ — азяд тэтчаса бызьыло. Нянед но бырем ни, лэся, бертомы шат? Мукет арняе выльысь лыктомы.

Арсений та уйзэ кема умме усьыны ӧз быгаты, синъёссэ кыне но — азяз весь гӧгӧрсинъёсыз бызьыло. «Я, малы-о одӥг-ог мон доры уд лобиське, вунэтӥды шат вордӥськем палъёстэс, ӧд ыштэ на, дыр, лыктоно сюрестэс? Быгатысал ке тубаны, со ӵоксам укноез тӥледлы вӧлак усьтысал. Улэ отын, будэтэ пиостэс!»

Ӵукна анаез ужаз кошкемез бере, одӥгназ кыльыса, яратоно укноез доры коляскаеныз питырскиз: оло, зэмзэ но гӧгӧрсинъёсыз берытскиллям? Ӧвӧл. Уг лобало. Оло, вуозы ай?

Возьмаськыса, малпаськыса пуконъяз анаезлэн вордӥськем гуртаз вуылэмзы тодаз лыктӥз. Соку Арсений школае но уг ветлы на вал. Анаезлэн одӥг гинэ пиезлы возьматэмез потӥз, дыр, кытын со гольык пыд бызьылӥз, кыӵе шурын пыласькиз, нырысь яратонзэ пумитаз.

Ӵапак Троица нуналэ вал кадь со. Гуртоосынызы ӵош шулдыръяськемзы бере Арсений анаеныз урам кузя вамыштӥзы, 2 ӝужытэсь капка юбоос вадьсы вуыса, дугдӥзы.

— Самой татын сылӥсь коркан улӥзы анаен-атае, песянаен-песятае, ачим но татын вордӥськи, пинал дырме ортчытӥ, яратонме пумитай. Та инты туж дуно мыным, ноку вунонтэм. Адӟиськод, юртмылэн 2 юбоосыз сяна кылемын ӧвӧл ни, пыр вал — нокытчы…

Анаезлэсь синвуоссэ ад-ӟыса, Арсений юаз:

— Кытчы табере, анай?

— Песятайёсмы доры, пие, — вакчияк вераз со.

Арсений анаезлэсь верамзэ соку ик ӧз вала. Азьысьтызы киросъёсты, памятникъёсты адӟыса гинэ, валатскиз. Трос калык татын вал ини. Ӵыжы-выжыоссылэн киросъёссы доры вуыса, кышномуртэн пияш дугдӥзы. Пичи гинэ пуктэм ӝӧк вылэ сумказэ поныса, анай пизэ ӟус вылэ пуксьыны косӥз. Ачиз гу вылысьтызы ӝужыт будэм турын-куарзэ ишкиз. Собере сумкаысьтыз ваем саламзэ пуос вылэ тыриз, аракызэ но пазьгылӥз. Куяськонъяз пиезлы вераз, кин кыӵе кирос улын кӧлэ.

Та ветлэмез Арсенийлэн вунысалыз но, дыр, но анаез котькуд Троица нуналэ тодаз вайылэ вордӥськем гуртаз ветлэмзэ.

— Арлыд вуыса, котькинэ дор палъёсыз кыско. Тылобурдоосты но учкы ай, толалтэзэ кытчы ке лобӟыло, нош гужем берытско пи поттэм интыязы. Улыса-вылыса гӧгӧрсинъёсыд но берытскозы ай. Та корка сигын вордӥськемын ук соос.

Тол вуыса, музъем тӧдьы дӥсьсэ дӥсяса, чилясь липетъёс туссэс воштӥзы. Арсений мӧзмыса укно дораз пуке вал, малпамтэ шорысь син азяз чагыр уллё кылдӥз. Зэм-а, вӧт-а малпаса, синъёссэ кырмышъяз, кимышкыныз ӵушылӥз. Зэм, синъёсыз уг пӧясько вылэм: гӧгӧрсинъёс вордӥськем доразы бертӥллям. Корка йылтӥ, укно вӧзтӥ но ортчылыса, кема лобазы. Жадьыса, дыр, шутэтскыны пуксизы лымыен шобырскем липет вылэ, пыдъёссы ӧз гылӟе. Но укное пыремзы ӧз луы, огшап пукыса, озьы ик шуак ӝутскизы но, кӧня ке котыръяськыса, ышизы.

Гӧгӧрсинъёс ӵуказеяз, усьсэяз но корка вадьсын лобазы, липет йылаз но пукизы, корка сиге пырон укнолэсь усьтӥськемзэ возьмазы. Анаезлэн верамезъя, тылобурдоослэн но, адямиослэн сямен ик, сюлэм шӧдонзы вань, соос вордӥськем интыязы кыстӥсько.

Арсений гӧгӧрсинъёсызлы оске, толалтэ берытскизы бере, гужем но дорзэс уз вунэтэ. Оло, соку кин ке укнозэс усьтоз, Инмар юрттэмъя Арсений ке шат?

Туспуктӥз Денис Корнилов

Удмурт Дунне
By Удмурт Дунне Май 10, 2018 16:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*