Фронтовиклэн Александр Осинцевлэн лысьӧмъёсыз ваемын Иже

Удмурт Дунне
By Удмурт Дунне Май 15, 2018 13:24

Фронтовиклэн Александр Осинцевлэн лысьӧмъёсыз ваемын Иже

Инметӥ лобись самолётъёс шоры учкыса, Ижкарысь Евдокия Осинцева вера вылэм: мынам но пие, самолётэн лобыса, кошкиз но ӧз берты ни, оло, вуэмзэ адӟо на… Ӧз адӟы ни. Александр Осинцев фронтысь «берытскиз» али гинэ.

Александр Осинцевез сӥё-дано ватозы 18-тӥ инвожое, кайгырон но буре ваён нунал азьын, Ижысь Уйпал шайвылэ.

Туэ толшоре Новгород улосысь «Пирамида» огазеяськон сыръясь интыысь ӝутӥз ДБ-3 самолётэз. Отысь шедьтӥзы стрелоклэсь лысьӧмъёссэ. Музъем, секыт бомбардировщиклэсь кортъёссэ сяна, умой утьыса возем лётчикъёслэсь арбериоссэс но. Поттӥзы дӥськут, знамя но трос мукетсэ. Озьы ик утиськиллям стрелоклэн документъёсыз. Мотоцикл-лы водительской удостоверениезъя тодмо луиз — со Ижкарысь Александр Осинцев.

Улосчимы вордскемын 1917-тӥ арын, Ижысь заводын тыршемын. Армие сое басьто 1938-тӥ арын. Но туала ӵыжы-выжыосыз сярысь номыр тодмо ӧй вал. Соку поисковикъёс Интернет пыр утчаськыны кутскизы, вазиськизы социальной сетьёсысь вань эшъёссылы. Липецкысь поисковикъёс шедьтӥзы Александр Осинцевлэн пичи сузэрезлэсь внуксэ Виталий Осинцевез.

4-тӥ мае Новгород улосвылын Холм карын ортчиз ож бусыосысь шедьтэм 38 солдатъёсты ватон. Нош Александр Осинцевез дораз келязы. Сое ас палъёсаз вайыны ветлӥзы ӵыжы-выжыез Виталий Осинцев, Кун Думаысь депутат Алексей Загребин, Кузебай Герд нимо йӧскалык музейлэн кивалтӥсезлэн воштӥсез Александр Юрпалов но Ижкар администрациын ужасьёс.

Новгород улосвылын А. Осинцевлэсь арбериоссэ ӵыжы-выжыезлы сётӥзы.

7-тӥ мае Александр Осинцевлэсь лысьӧмъёссэ вуттӥзы Удмуртилэн шоркараз. Карл Маркс ульчаысен кутскыса Михаил Архангеллэн собораз пырон дорозь, 2 радэн сылыса, пумитазы Ижкарысь кадетъёс Быдӟым ожын бырем солдатэз. Ижысь но Удмуртиысь Викторин митрополит панихида ортчытӥз.

Виталий Осинцев бадӟым тау каремзэ вераз песянаезлэсь агайзэ шедьтэмъёслы но Ижкаре вайыны юрттэмъёслы. Со уг вунэты анаезлэсь мадемъёссэ. Евдокия Осинцева 99 аресозь улэм. Ялан оскем, пиез бертоз шуыса. Уго похоронка но, ивортэк ышиз шуыса гожтэт но вуымтэ.

Александр Осинцевез сӥё-дано ватозы 18-тӥ инвожое, кайгырон но буре ваён нунал азьын, Ижысь Уйпал шайвылэ. Кузебай Герд нимо музей, ожын бырем улосчимылы сӥзьыса, нимысьтыз экспозиция дася. Холм карысь «Пирамида» огазеяськон келяз Александр Осинцевлэсь документъёссэ, медальонзэ. Озьы ик асьме музейлы утьыны сётэмын лётчиклэн комбинезонэз, парашютэз, пӧзьыез, кислородэн маскаез но баллонэз, самолётлэн двигателезлэн куд-ог ёзъёсыз.

Эдуард Степанов

Удмурт Дунне
By Удмурт Дунне Май 15, 2018 13:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*