Эмъян удысын тырмымтэос ӧжыт ӧвӧл. Кызьы югдурез воштоно?

Удмурт Дунне
By Удмурт Дунне Май 3, 2018 16:42

Гуртоосты эмъянын трос тырмымтэос шараясько. Кызьы югдурез воштыны луоно? Та ужпумъёс сэрттэмын-пертчемын Кун Кенешысь котрес ӝӧк сьӧрын.

Гуртъёсын кулэ фапъёс.

Усьтӥськоз 80 ФАП

Кенешонэз радъязы Кун Кенешысь КПРФ фракцие пырись депутатъёс. Но ӝутэм ужпум туннэ троссэ сюлмаськытэ. Озьы ужрадэ пыриськыны мылкыд карисьёс трос люкаськизы, соос пӧлын — Кун Кенешлэн Тӧроезлэн воштӥсез, тазалыкез утён понна кыл кутӥсь ялан ужась комиссилэн кивалтӥсез Надежда Михайлова, тазалыкез утёнъя министр Игорь Титов, куд-ог ёрос больницаослэн кивалтӥсьёссы, ёрос администрациосысь специалистъёс но мукет.

— Шаерысьтымы улӥсьёс пӧлысь 34 процентэз, яке 517 сюрс 300 пала адями, — гуртоос, — вераз тазалыкез утёнъя министр И. Титов. — 25 муниципал кылдытэтъёсын 1 сюрс 975 гурт. Соослы эмъюрттэт сётон вылысь 25 ёрос больница, 14 участковой больница, 63 амбулатория но 573 фельдшер-акушер пункт ужало. Кытын ӧвӧл медпункт, отчы ёрос больницаосысь эмчиос асьсэос потало. Кылем арын августэ басьтэмын питранъёс вылын центр. Ӝыны ар куспын со палэнэ интыяськем 59 гуртъёсы вуттӥськиз. Али ужа Кез ёросын. 2017-тӥ ар ӵоже 166 «скорой» машина вуиз, со пӧлысь 61-ез — гуртъёсы…

Мар лэсьтӥське эмъян удысын, пыр-поч вераз Тазалыкез утёнъя, семья но демография политикая ялан ужась комиссилэн кивалтӥсез Надежда Михайлова но.

— Эмъян удысын модернизация кутскем дырысен арлы быдэ тросгес коньдон висъяське, — шуиз со. — Али ужало пӧртэм кун программаос, кылсярысь, «Гуртысь эмчи», солы луыса гуртъёсы 539 специалистъёс мынӥзы ни. Туэысен юрттэт луоз фельдшеръёслы но — 12 мурт быдэн 500 сюрс манетэн басьтоз. Гуртъёсы 2025-тӥ арозь 80 фельдшер-акушер пункт усьтыны чакламын, со пӧлысь 19-эз — туэ. Ваньмыз та адӟиське лыдпусъёс вылын: калыклэн улон вапумез кузёме, кылем арын шаерамы кулэмъёслэн лыдзы, Приволжск федерал округын сярысь, ичигес луиз, дышим ни 500 грамм вордскем нуныослэсь но улонзэс утьыны…

Луысалзы ке автобусъёс…

Тырмымтэос но ӧжыт ӧвӧл, шуизы ужрадэ люкаськемъёс — калык юнме уг ӝожтӥськы. Дэри ёрос больницалэн валтӥсь врачез Валерий Савельев соосты погыльтэ уксёлэн тырмымтэез вылэ.

— Милям ёросамы кулэлэсь 71 процентэз гинэ уксё вуэ, — шуиз со. — Соин ик шыръятэк уг луы. Льготаен эмъян понна уксё 30-35 процентэз гинэ висъяське.

Эшшо Дэри ёросын улӥсез ог 45 сюрс лыдъяське ке, тулысысен сӥзьылозь 75 сюрсозь но йылэ. Соин ик эмъюрттэт курыса вазиськисьёс йыло. Эмчиослэн тырмымтэзы шӧдӥське. Вылаз ик, ёросысь больницаосын эмъян тӥрлык уг тырмы. Валерий Семёнович малпамъя, ӝожтӥськонъёс ӧжытгес луысалзы, ваньмаз ик гуртъёсы ветлысалзы ке рейсовой автобусъёс — али тросаз шоро-куспо гуртъёсы арнялы 1-2 пол, оло, ветло ик, нош пичиосаз — воксё уг.

Валерий Савельевен соглаш кариськиз Шаркан ёрос больницалэн валтӥсь врачез Юрий Перевозчиков. Ватсаз: эмъясьёссы соослэн али тырмо, но данакезлэн пенсие потон вакытсы вуэмын — ог 5 ар ортчыса, ужаны нокинлы луоз. Эшшо, пе, эмъян учреждениосты ӧрысьтызы потто эскеронъёс — я роспотребнадзоръёс, я тылпу кысӥсьёс ялан вуо.

Нуны вайыны уг курадӟо

Юанъёс кылдӥзы санаторийёсы путёвкаос пумысен но.

— Сюлэм но сэр висёнъёслэсь курадӟисьёсты реабилитацие «Металлург» санаторие келяло вал, — шуиз депутат Павел Чушъялов. — Табере таӵеез ӧвӧл ни. Малы?

Тазалыкез утёнъя министр Игорь Титов соглаш кариськиз: реабилитация кулэ, но туннэ, Уваысез сяна, вань мукет санаторийёс нимаз адямиос киын. Нош али юрттэт сётӥське Сюлэм но сэр висёнъёсъя центрын.

— Малы кулэ вал нылпи ваён юртъёслэсь лыдзэс кулэстыны? — паймизы кенешонэ люкаськемъёс пӧлысь куд-огез.

— Мон малпасько, ваньмыз шонер лэсьтэмын, — ӝот-ӝот вераз Надежда Михайлова. — Куд-ог нылпи ваён юртъёсын толэзь ӵоже 3-4 нуны вордске. Со понна гинэ быдэс штат уд возьы, собере, акушер-гинекологъёслэн но тэк улыса тодон-быгатонлыкъёссы лябӟо. Нылпи ваён юртъёсты огазеям дырысен сюрес вылын анайлэн но нунылэн улонзылы кышкытлык кылдытӥсь учыръёс ӧй вал.

Таиныз веранэн соглаш кариськизы валтӥсь врачъёс но.

— Нылпи ваён юртын секыт югдур кылдэ ке, анестезиологез, хирургез но мукет кулэ специалистъёсты люкан понна ог 40 минут кошке вал, — шуиз Шарканысь валтӥсь врач Юрий Перевозчиков. — Али нуны вайыны дасяськись анайёсмес келяськом Воткае — сюрес вылэ ог ӝыны час гинэ кошке. Со понна Воткаысь нылпи ваён юртын вань специалистъёс, кулэ луись оборудование тырмыт.

Кенешон дыръя мукет но трос ужпумъёс ӝутскизы. Шуэмын: тазалык потэ ачиз адями бордысь но. Соин ик таза улонэн эшъяськон сярысь вунэтоно ӧвӧл — калык пӧлын та мылкыдэз пыӵатоно.

Элина Кумачёва

Удмурт Дунне
By Удмурт Дунне Май 3, 2018 16:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*