Дэри ёросысь теплицаосын 40 ар пала будэто бакча сиёнъёс. Кыӵе ужпумъёсын соос пумисько?

Удмурт Дунне
By Удмурт Дунне Май 28, 2018 15:37

Дэри ёросысь теплицаын туала амалъёсты куто ке но, огреч-помидор но ярато адями шунытэз.

Кылем арня пумын асьсэлэсь удыс нуналзэс пусйизы поставщикъёс. Промышленностья но вуз каронъя, Гурт удысъя но сиён-юонъя министерствоосысь специалистъёс, ужбергатон но вуз карон удысын ужасьёс понна нимысьтыз дышетскон радъямын вал Дэри ёросысь теплицаын.

Теплицаын 40 ар пала ини помидор, кияр, турынъёс, салатъёс, сяська удъёс будэто. Солэн кивалтӥсез Алексей Полтанов верамъя, ар ӵоже 5 сюрс тонна емышен калыкез шумпотто. Удмуртиын улӥсьёслы сяна, вуззэс келяло Татарстан, Киров, Пермь, Самара но Свердловск улосъёсы но. Берло аръёсы предприятиын выльдӥськон, лэсьтӥськон ужъёс мыно. 10 ар ӵоже 12 гектар муос вылын кылдӥзы туала куронъёслы тупась теплицаос. Отчы пуктэм приборъёс асьсэос эскеро омырлэсь, вулэсь но югытлэсь кыӵе луэмзэс. Быдэстэм ужъёсынызы уг буйгатско на, азьланяз муоссэс 10 гектарлы паськытатыны медо. Соку будэтэм емышъёссы 2 поллы уногес луозы.

— Милемлы туала куронъёсъя ужано луэ, сотэк туж бадӟым ыштонъёс адӟомы, — шуэ Алексей Полтанов. — Та вакытэ трос коньдон кошке электрокужымлы. Кылсярысь, предприятиямы ваньмыз-ӧвӧлэз 4 сюрс 500 лампаос лыдъясько. Соосты 1 час ужатэммы 8 сюрс манет пала усе. Ӵошатоно ке, тамында лампаен Ижысен Глазовозь нуись сюресэз югдытыны луысал.

1986-тӥ арын, пе, 1 киловатт тыл понна 1 манет 40 копейка тыроно вал, нош 1 килограмм огречлэн дуныз 2 манет но 20 копейка вал. Та дун государствоен юнматэмын вылэм. Нош та вакытэ со дунъёс ӵошатыны луонтэм: 1 кВт понна 1 сюрс 100 манет тыроно, нош 1 килограмм огреч понна — 73 манет. Соин но огреч-помидор будэтӥсьёс коньдон шыръян амалъёсты утчано луо.

— Удъёсты висёнъёс медаз басьтэ шуыса, асьме биолабораториын лэсьтэм химияя препаратъёсты кутӥськомы, — шуэ 1 номеро цехен кивалтӥсь Ирина Болтачева. — Изъян вайись нымы-кибыосты пайда вайись микроорганизмъёс сиё нокыӵе пестицидъёстэк но нитратъёстэк. Будосъёслы ву кисьтанын но шыръян амалъёс утчано луэ.

10 ар ӵоже 12 гектар муос вылын кылдӥзы туала куронъёслы тупась теплицаос.

Котькуд уд улэ удалтытӥсь сылалъёс ватсало. Помидор удъёс татын 14-16 метр кузьда будо, огреч уд — 2 метр 20 сантиметр. Котькуд квадрат метрысь 40-43 килограмм емыш басьто. Вож салатъёс будэтэм сяна, гужем вакытлы сяська удъёс но вузаны потто. Со сяна, 2-тӥ арзэ губи будэто.

Предприятилэн ужез эшшо но ӟечгес мед азинскоз шуыса, Удмурт Республика ласянь но ужбергатӥсьёслы юрттыны тыршо. Ужрадэ люкаськемъёс кенеш дыръя асьсэ сюлмаськонъёссэс но сэрттӥзы-пертчизы на.

Валентина Емельянова

Удмурт Дунне
By Удмурт Дунне Май 28, 2018 15:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*