Беромем гожтэт. Анна Бурдина. Верос

Удмурт Дунне
By Удмурт Дунне Май 14, 2018 17:10

Анна Бурдина.

                        

Сӥзьыл тӧл урмыса йыгаське гольык льӧмпу вайёсын Вормезь Петырлэн зорлэсь суч-сач котмем коркаезлэн укнояз. Муръё пушкы йыромыса сямен, со тӧлпери я шуланы ӧдъя, я огдырлы шыпыта.

Корка пушкын, тём-тём пеймытын, оброс шоры учкыса, валес вылын вырӟылытэк кылле воргорон. Куинетӥ уйзэ ини та шаян куазьлэн акылляськеменыз сэрен Петыр умой-умой кӧлыны уг быгаты. Ӵапак таӵе вакытъёсы войнаын контузие шедем мугорыз уен-нуналэн чидантэм висе. Вырӟемезлы быдэ я суйёсаз, я пыдъёсаз, я тыбыраз сю пала векчи веньёс мертчиськыло кадь.

Нокин ӧз тоды оген улӥсь воргоронлэсь сюлэм висёнъёссэ. Война дыръя передовойын ожмаськыса, со улэп бертӥз. Кӧня пол кулон вӧзтӥз кусоен шонаськиз, но со дорозь озьы ик ӧз сузьтӥськы. Медальёсыз нош кык гадьлы тырмымон. Озьы ке но гурт калык востэм Петырлэн герой луэмезлы ӧз оскылы. Ма, ачиз но воргорон медальёссэ мурт синъёс азе ӧз поттылы. Вормезь Петырлэн мукетыз понна сюлэмыз висе…

Али гинэ кадь ӵуж бабля йырсиё пиез, кырыж-конгыль лёгаськыса, сьӧраз уж дуре улляське вал. Вал… Со дырысен кызь ар ортчиз ини. Али Дилинька пиезлы кызь кык арес луысал. Нош кытын со, вылысь Инмар гинэ тодэ. Дилинька ӧз берт Афган ожысь. Гожтэт гинэ вуиз, Дилий Петрович, пе, ивортэк ышиз. Кыкетӥ араз, сюлэмыз чидатэк, Петырлэн кузпалыз кошкиз та югыт дуннеысь. Со дырысен огназ кылем воргоронлы нуналъёс толэзь кадь потыны кутскизы — огез кузьгес мукетызлэсь. Ӟечезлы оскон гинэ сое пыд йылаз возиз. Нуналлы быдэ Вормезь Петыр, Дилинькаезлэсь бертэмзэ витьыса, капкаезлэсь усьтӥськемзэ возьмаз. Оло, бертоз на пиез?..

Чал-чал коркан кылӥське вуж часлэн ветлэмез гинэ. Зор дугдӥз. Туннэ нунал удалтӥз. Капчияз Петырлы но. Сӧсырмем мугорыз шундыё куазен уг висьылы. Ӵукна вазь ик султыса, воргорон атас-курегзэ сюдӥз. Мукет пудо-живот уг ворды. Ог аръёс талэсь азьло холмогор выжыысь скал возиз. Дилинькаез туж яратэ вал соку гинэ кыскем йӧл юыны. Тулыс, гырон вадесэ, бускелез юэм йырыныз Маньказэ тракторен донгытэм. Озьы воргорон сюдӥсезтэк кылиз. Кин ке мукетыз, пудозэ озьы карысалзы ке, быдэс гурт тыр куаш поттысал, дыр. Нош Петыр кыл но ӧз вера бускелезлы. Соиз янгышамзэ ӧз ик вала кадь. Вормезь Петыр таӵезэ гинэ ӧз чидалля.

Сиськемез бере воргорон куашкась кенерзэ тупатоно кариськиз. Предзы нош ик верам кылзэ ӧз быдэсты. Котькуд ар оскытылӥз, Вормон Нуналлы вань ветеранъёслы юрттом, пе, мар кулэяськонъёссы вань.

Кенерзэ кутыкуз но, Петырлэн мӧзмись сюлэмыз Дилинькаез сярысь малпаськытэк ӧз чида. «Тани пие бертоз, нош кенермы йыг-йыг сылэ», — ас понназ вераське воргорон. Быдэс нунал ортчиз та ужен, дораз пыриз катьтэммыса. Валесаз усиз но, синъёсыз соку ик кыниськизы.

Тик-так, тик-так… Нош ик гыж-гож вазё льӧмпу вайёс, укное зыраськыса.

— Ух, проклятой! — куазьлэсь жоб луэмзэ валаса, кеськиз Петыр.

Толло жадем вылаз мугорыз эшшо но зол висе. Чидантэм вӧсь. Мугорызлы гинэ ӧвӧл, сюлэмезлы но. Луысал ке кин ке но вӧзаз, трослы капчиясал, дыр.

— Эх, Поля, Поля, малы, малы кельтӥд огнаме? — ымдуръёссэ мырдэм усьяса, оброс пала вераз воргорон…

* * *

— Петыр! Петыр, тон дорад-а? Гожтэт вуиз. Ремонт вал почтаын. Вуж гожтэтъёс сюризы. Тыныд но вань. Оло, пиедлэсь? Учкы ӝоггес!

— Гожтэт? — мугорызлэсь вӧсь луэмзэ шӧдытэк, Петыр интыысьтыз тэтчиз но почта нуллӥсь Валя пумитэ дыртӥз.

Дырекъясь киосыныз усьтӥз конвертэз. Бызьылӥсь синъёсыз кема учкизы ӵужектэм бумага шоры. Вань букваос йырысьтыз потӥзы кадь. Кӧня ке дыр ортчыса, воргоронлэн ымнырыз кӧсэктӥз. Сюрем пиез, сюрем. Жаляса верано, улэп ӧвӧл ни.

Петыр, пал кыл вератэк, гожтэтэз Валялы берыктӥз но корказ пыриз.

Кинэ ке утчаса сямен, лекъяськись кезьыт тӧл шуласа котыръяське оген кылем воргоронлэн юртэз кузя. Кезьыт Вормезь Петырез шедьтӥзы валес вылысьтыз.

— Ышем гожтэт ӧй ке шедьысал, Петыр озьы ик улысал, пиезлэсь бертэмзэ возьмаса. Оло нош, умойлы со? Кӧня курадӟиз, мугорыз висемен! Ӵок, мар луиз, луиз. Адямилэн улонэныз Инмар кузёяське, — мур лулӟыса, укно пала учкиз Вормезь Петырлэн Сенька эшез.

Каллен ӟукыртыса, капка усьтӥськиз. Дилинька бертӥз дораз…

Удмурт Дунне
By Удмурт Дунне Май 14, 2018 17:10