Ӧз пушты, ӧз выйы… Тӧр шорын — Быдӟым ожысь ветеран Антонина Васильевна Перевозчикова

Удмурт Дунне
By Удмурт Дунне Май 10, 2018 15:30

Быдӟым оже пыриськем ветеранъёс шаерамы 457 кузя кылемын. Шаркан ёросысь соос 2 гинэ на. Антонина Васильевна Перевозчикова (Трапезникова) война дыръя связист вал. Тазалыкез нуналысь нуналэ лябӟе ке но, чидатэк вите Вормон Нуналэз. Егит вакытсэ, оже ветлэмзэ синкыли пыр тодаз вайиз Антонина Перевозчикова.

Быдӟым ожысь ветеран Антонина Васильевна Перевозчикова

Тоня но Нина

Антонина Васильевна Перевозчикова Шаркан ёросын 70 арлэсь ятыр улэ ни ке но, вордскем гуртсэ — Дэбес ёросысь Варниез — туннэ но син азяз возе. Екатерина Яковлевна но Василий Петрович Трапезниковъёслэн семьяязы бӧрсьысь бӧрсе 12 пиналъёссы вордскиллям вылэм, пӧлысьтызы 6-езлы гинэ быдэ вуыны кылдэм.

— Мон 3-тӥез пинал вал, бадӟымъёсыз лулъяськиллямтэ. Вордскеме берегес ик гуртамы поп вуылэм, анай-атаелы индылыса кельтэм, вож нуныдылы, пе, Антонина ним понэ. Озьы ик кариллям, — тодаз вае Антонина Васильевна. — Антонина бере, монэ Тоня но, Нина но шуо. Бӧрсям будӥзы на Витя, Петя, Валя, Веня но Маруся. Анай-атае — ӟучъёс, монэным но ӟуч сямен гинэ вераськизы. Но удмуртъёсын артэ улыса, мон но, семьямы но удмуртомим.

Антонина Трапезниковалы парта сьӧрын пукыны 2 ар гинэ кылдэм. Лыдъяськыны, лыдӟиськыны быгатӥськод ни, табере нуны утёд, шуэм атаез. Арлыдо кышномурт туннэ но синву пыр тодаз вае колхозын ужамзэ.

Тоняез пичи шуыса жалясьёс ӧй вал, бадӟымъёсын артэ тыршиз. Война кутскем бере кӧня ке нунал Дэбесысь нылпи юртын ужам. Отчы сокугес вайиллям Литваысь эвакуировать карем нылпиосты. Детдом котырысь одӥг ульчаез со дырысен Литовской шуиллям. Собере Антонина Васильевна Ижевск — Балезино чугун сюрес лэсьтӥз, отӥяз атаез интыын Пироговоысь аэродром лэсьтонэ кӧня ке арнялы ветлӥз, сик кораз. Шуныт дӥсьсы йӧнала вылымтэ, пыдысьтызы кутъёссы ялан пӧсьто, сием потэ. Сыӵе улонэз, пе, нокин медаз адӟы.

Улонзы секыт вал ке но, гуртысь егитъёс ӝожтӥськыса, бӧрдыса улӥллямтэ. Шумпотыкузы но, куректыкузы но кырӟало вылэм. Шулдыръяськыны яратӥсьёс пӧлын котьку вылэм Тоня Трапезникова.

Война дыръя.

Войнае — кырӟаса

— Быдӟым ож кутскиз гинэ но, гуртамы повесткаос вуылыны ӧдъязы, — тодаз вае кышномурт. — Тятямылы но почтальон повестка вайиз. Лыдӟиськыны быгатӥсько вал бере, соку ик мазэ-созэ валай но бумагаез кисыям ватӥ, нокинлы но уг вера шуисько вал. Тупаны но кулэ, почтальонлэсь пырамзэ синйылтэм тятямылэн сестраез. Юалляськыны кутскиз. Мон шып улӥсько. Нырысь куаретыны кутскизы Витя вынме, почтальонлэсь бумагазэ кытчы ватӥд шуыса. Собере мон вылэ омырскизы. Ӟепам ватэм бумагазэ поттоно луи. Тятямес оже басьто шуыса ивор быдэс гуртэ вӧлмиз. Бусыын ужась анаймы чылкак куалектэм, вамыштэмез но луымтэ ни, ярано коть, эшъёсыз гуртэ бертыны юрттӥллям. Корка пырыса, нош ик шугомиз. Тятямы соку нырысьсэ, дыр, шораз кеськиз: «Тон мар кариськод, тыныд нылпиосты будэтоно. Чида, асьмелы гинэ таӵе повестка уг вуы».

Варни гуртысь Василий Трапезниковез но куд-ог мукет воргоронъёсты фронтэ басьтӥллям 1941-тӥ арын гужем. Соосты быдэс гуртэн кырӟаса-вераса келяллям. Тоня нылызлы тятяез шуэм, бызьыны, пе, эн дырты, анаедлы юрттӥськы сузэр-вынъёстэ будэтыны. Василий Петровичлы кема ожмаськыны кылдымтэ. 1942-тӥ арын апрель толэзе Трапезниковъёслы похоронка вуэм ни, Смоленск улосысь Туровка гурт котырын В. Трапезников бырыны шедемын шуыса.

Ож мынон вакытэ гуртэ я похоронкаос, я повесткаос вуылӥзы. 1943-тӥ арын Варние эшшо 6 повестка вуэм. 17 аресъем Антонина Трапезниковаез но военкоматэ ӧтиллям.

— Милемыз но быдэс гуртэн, валъёсы пуктыса, келязы, букоос борды думем гырлыос жон-н вазизы. Дэбесысь военкоматэ вуытозямы, кырӟамы, — шуэ кышномурт. — Военком дорысь эшъёсы бӧрдыса потӥзы, нош монэ, пе, ум басьтэ. Доре бертыны возьыт вал, мон но зар-зар бӧрдыны кутски, мынам оже мынэме потэ, шуисько. Викышъяса сылэмме кышномурт адӟиз но, сыӵе мынэмед потэ ке, заявление, пе, гожты. Со кылэз кылэме но ӧй вал, кызьы со гожтӥське, ӧй но валалля. Кышномурт ачиз ик мон понна заявление гожтӥз но берен военком доры пырыны косӥз. Кабинетын пукисьёс паймизы но киынызы шонтӥзы, Кезозь ке но ветлод-а, мар-а, шуизы.

Антонина Трапезникова войнае мынӥз вал, оло, госпитальын ужаны яралоз шуыса, нянь коть кӧттыр сиёз кожаса. Одӥгез но малпанэз ӧз быдэсмы: госпитале но ӧз кутэ, кӧттыр сиёнэз но ӧз адӟы. Дэбесысь егитъёсты Кез каргуртэ нуиллям. Вокзалын, пе, келяськисьёс арганэн шудо, бӧрдо, Трапезникова люкаськем калыкен ӵош частушкаос кырӟам. Кез каргуртэ вуэмъёсты нокин эскерымтэ ни, ваньзэс одӥг радэ султытӥллям но строен мунчое нуиллям. Мисьтӥськыны пыремзылэсь азьло йырзэс ӵышкиллям. Тонялэсь но чебер йырси пунэтъёссэ вандӥллям. Отысен вань егитъёсты Ижевске келяллям.

Война бере.

— Городын милемыз 3 толэзь дышетӥзы телефонистъёсты дасянъя курсъёсын, озьы ик дышетӥзы на ыбылӥськыны, сӧсыр муртъёслы юрттэт сётыны, эмъяны, — шуэ Антонина Васильевна. — Присяга кутэмме али ке но тодам возисько. Нылъёсын сое быдэс уй дышетыны выримы, мон — кырӟаса. Командирмы кырӟаны лэзиз, сотэк присягалэсь кылъёссэ вераны вунэтысал, дыр. Вунонтэм кылизы ыбылӥськонъя занятиос, милемлы 3 патрон сётылӥзы, соосын йӧттыны кулэ вал адями патретъёсты. 2-сэ йӧттӥ, нош 3-зэ мертаськытэк гинэ ыби. Командирмы соку ик шорам кеськиз, наряд, пе, басьтэмед потэ-а, мар-а. Со кылэз милям, деревняослэн, кылэм-адӟеммы ӧй вал, нырысь ик мазэ-созэ но ӧм валалэ. Кырыж ыбылӥсьёслы нырысь нуналаз ик наряд сётӥзы. Со дырысен вань мишеньёсы йӧттыны выри. Кӧня ке арня ортчыса, сюлэмез мӧзмон бугыръяны ӧдъяз, вордскем деревняям бертэме потыны кутскиз. Ярано коть, нуназезэ милемыз умойгес сюдӥзы. Сьӧлыкмы но вал: эшъёсынымы ӵош бакчаостӥ кубиста вораса ветлылӥмы.

Чидано…

3 толэзь ортчыса, нылъёсты фронтэ келязы. Соосты поездэн пырак Украинае нуизы. Днепр шур вамен потыкузы, улэп уз кыле ни шуыса малпало вылэм, шудзы вылэм на. Удмуртиысь нылашез куто зенитной часте, кудӥз интыяськемын вылэм Житомир город котыре. Служить кариз Украинской фронтын связист луыса.

— Котырак бомбаос пуштыло, ыбыло, мон кышкаса зар-зар бӧрдӥсько. Дэбес ёросысь Аргуртысь Галя нимо эше вал, сое мукет часте нуизы. Мӧзмем сюлэммес телефон пыр буйгатылӥмы, удмурт сямен вераськыса, кырӟаса: «Из но, му но пилиське но, адямилы чидано…», — ожмаськон аръёссэ синкылиос пыр тодаз вае ветеран. — Улӥмы землянкаосын, кӧламы пулъёс вылын, сое но асьмеос лэсьтӥмы. Пулъёслы матысь гуртъёсы ветлӥмы. Соос, милемыз адӟыса, бӧрдо, немецъёс ваньзэ лушкаса кошкизы, табере, пе, тӥ милемыз курткиськоды-а? Сиён ноку ӧз тырмылы. Туала вакытэ пудоос но сомында турын уг сиё, дыр, кӧня ми сиимы война вакытэ. Гужемъёссэ капчигес вал: сюмам кӧтмес емышъёсын буйгатылӥмы.

Удмурт нылаш азе бадӟым ужпум пуктэмын вал: разведчикъёслэсь вань верамзэс штабе ивортоно. Нош телефон линия уг ужа ке, улонэз жалятэк, чигиськем интыосты тупатъяно. Войнае мынытозяз, нылашлэн самолётъёсты но адӟылэмез вылымтэ, нош отын соосты куаразыя тодманы дышем. Угось йыр вадьсытӥзы лобась самолётъёс сярысь но штабазы ивортылоно вылэм.

— Телефон линимы ӵемысь тӥяськылӥз, — шуэ ветеран. — Озьы ветлонъям одӥг полаз кулэмлэсь ӧжыт гинэ кыли: туж матын бомба пуштӥз. Пограй, мазэ-созэ уг валаськы, синъёсме усьтӥ но — оло уйвӧтын, оло зэмзэ улонын. Пуштылэм куараосты кылыса, ӝог сазьтӥськи. Сумкаме но катушкаме кутӥ но азьлань вамыштӥ. Ӝытазеяз температурае ӝутӥськиз, маке гадьы висьыны кутскиз. Нош милям эмъясьёсмы ӧй вал, секыт висисьёсты госпитале келяллязы. Вамышъяны кынары ӧй вал, пыдъёсы сьӧлтасько. Госпитале вуэмме уг тодӥськы ни. Эмъясьёс монэ катьязы, осколокме поттӥзы. Буйгатӥзы, номыр, пе, кышкытэз ӧвӧл, кӧня ке нунал ортчыса, эшъёсыд доры лэзём. Арня ӵоже улытозям, концерт адӟыны кылдӥз. Ӵапак со вакытэ госпитале артистъёс вуылӥзы, китэмез но, пыдтэмез но кырӟазы-эктӥзы, эсьма, мон но пӧлазы шулдыръяськи, вань висёнме вунэтӥ кадь.

Пиналъёслы ожъёс сярысь мадён.

Осконтэм Вормон нунал

— 9-тӥ Мае ӵапак дежурить карисько вал, — синкылиос пыр вера кышномурт. — Эшъёсы шумпотыса кесясько, нош мон верамзылы уг оскиськы. Кӧня ке минут чус сылэме бере зар-зар бӧрдыны кутски. Кема витем нунал вуиз! Со нуналэ батальонмес артысь гуртэ шулдыръяськыны нуизы. Война быриз ке но, дорамы одӥгмес но ӵуказеяз ик ӧз лэзе.

Антонина Трапезникова вордскем палъёсаз 1945-тӥ арын август толэзе вуиз. Война йылпумъяськем бере но улонэн кулон вискы шедьылэм на. Ӟеч ожмаськемзы понна нылъёсты кӧня ке нуналлы санаторие шутэтскыны ыстӥллям. Антонина ульча кузя 3 эшъёсыныз мынэ вылэм. Шулдыр нуналзэс куспетӥ карем пуштон. Мина вылэ лёгиськем эшсы бырем, мукетыз пал пыд кылем. Нош Нина дэремен вордскемын вылэм.

Шудэз вылэм ик удмурт нылашлэн, нош дан сьӧры уйиськонэз ӧз тодылы. Кызьы вал со рядовой, озьы ик дораз но рядовоен ик бертӥз. Нокыӵе наградаосыз ӧвӧл шуэмысь, Жуковлэн кинюртэменыз тау каронэз, пе, вал.

— Фронтэ келямзылэсь азьло мынэсьтым юазы вал, уяны быгатӥсько-а шуыса, — тодаз вае Антонина Васильевна. — Чупчи дурын будӥ бере, ваньмыз уяны быгато кожасько вал. Малы озьы юазы соку, шуг вераны, нош фронтысен уяны быгатэме мыным туж юрттӥз. 1944-тӥ арын гужем учыр вал. Линия кыскиськомы гинэ, сомы тӥяське. Кӧня пол итоно-тупатъяно луиз, шуг вераны, бӧрысь выль линия кыскыны куризы. Котыр мыноно ке, катушкаысь езмы ӧй тырмысал, нош шонерак ке мыноно — шур пыкъя. Сержантэн кенешимы но огкылэ вуимы: линия кысконо шур вамен. Нош уяны быгатӥсез мон гинэ вылӥськем. Шур паськыт но ӧй вал кадь, но вуэз зол кошке вал: мырдэм улэп кыли. Линиез лэсьтыны юрттэме понна ик тау карон сётӥзы.

Кышномурт уг ваты: медальёслэсь дуногес улон. Кӧня адямиос мурт музъем вылэ пыраклы кылизы. Нош война йылпумъяськем бере уноез эшъёсыз Украинае улыны кылизы. Тоняез но кыльыны туж куро вылэм, Украинаын улон тупатскиз ни, сиён кӧттыр шуыса. Нош со Удмуртизэ уйвӧтъёсаз но адӟылэм.

— Войнаысь бертыкумы, милемыз одӥген ӧз лэзе, кӧня ке муртлы нимысьтыз адями юнматӥзы, со котькудмес гуртозямы келяны кулэ вал, — шуэ Антонина Трапезникова. — Нырысь ик украин нылъёсмес дор палъёсазы васькытӥмы, собере мукетъёссэ. Монэ но гуртозям келяны дась вал, Воткаысен сюресэз тодӥсько ни шуыса, мыныны ӧй лэзьы ни. Угось мукет нылъёслэн но доразы ӝоггес бертэмзы потэ вал.

Вӧй поттонъя заводын ужан.

Доре — мурт ёросэ

— Фронтэ мон Дэбес ёросысь кошки, нош бертоно луиз тодмотэм Шаркан ёросэ, — веранзэ азьланьтэ ожысь ветеран. — Мон кошкем берегес Дэбес ёросысь Варни гуртын улон туж секыт луэм, колхозмы начармем. Шаркан ёросысь Кипун гуртын улӥсь родняосмы дӥнязы ӧтиллям, колхозмы но йӧналагес шуыса. Мамамы верам кылъёссылы оскем, сузэр-вынъёсме кутыса, вань юртъерез вузаса, Шаркан ёросэ кошкем, отын соосты витись луымтэ. Кӧня ке толэзьзэ семьямы пӧртэм интыостӥ кыстаськоно луэм, отӥяз Галичево гуртэ улыны интыяськиллям. Бертэмез сярысь нылаш нокинлы ивортымтэ.

— Галичево ульчаетӥ военной дӥсен вамышъясько. Гурт калык монэ соку ик тодмаз, тон, пе, тётя Катялэн-а нылыз, — шуэ Антонина Васильевна. — Возьматӥзы мамаелэсь корказэ но. Ӵапак со нуналэ мамае Валя сузэреным ӵош бусые мынэмын вылэм, турын октыны-калтыны. Корка пырыса вуттӥ гинэ, дорамы гурт калык люкаськиз. Мамаме кунултыса пыртӥзы, воксё ӟигартэм вал. Валя сузэре шумпотыса котыртӥм бергаз, нош мамалэн номыр верамез уг луы, бӧрдэ, ӟыгыръя, нылы, Тоня, малы ӧд гожъя шуыса тышкаське. Война йылпумъяськем бере ик ӧй вуы бере, гуртын паймиллям ни вылэм, ивортэк ыши яке кытчы ке бырыны шеди шуыса малпаллям.

Семьяеныз.

Анай дышетэмъя

— Анаймы кыкетӥзэ ӧз бызьы ни. Улонын со нырысетӥ визьнодасе но юрттӥсе вал, — данъяськыса вера ветеран. — Анаймы милям котькинлы адӟем карымон тыршиз, 100 аресъем юбилейзэ пусйиз. Табере тани со интые ачим кылисько ни кадь, 94 аресме тырмытӥ ни. Кырӟась муртъёсты шудтэм шуэмзы потэ. Одӥг ласянь учконо ке, мон кадь шудоез ӧвӧл: войнаысь улэп бертӥ ук, нош мукет ласянь ке — улон туж курадӟытӥз, туала егитъёс медаз адӟе сое. Войнаысь бертыса но, трос курадӟоно луиз на. Гуртын улон туж секыт вал, дӥсь ӧвӧлэн быдэс арзэ, дыр, военной дӥсен ветлӥ на.

Гуртысь нылкышноосын ӵош толалтэосты Шарканысь заготконтораын ужай. Калыклэсь картошка бичазы, соосты кезьыт вуэн миськылӥмы но векчи юдылӥмы. Озьы куасьтэм картошкаез Севере келяллязы. Мон паллян вал, туж ӝог ужай, паллян киыным котькинлэсь трос картошка паласа вуылӥ. Гужемъёссэ маслозаводын ужалляй. Бадӟым флягаосты ӝутъяй. Заготконтораез пытсамзы бере маслозаводын тырши ни. Пенсие потыса но, дасо аръёс ужай на.

2 пол бызьылӥ. 4 пинал вордӥ, табере внукъёсы шумпотто. Шарканысь ветеранъёслэн хоразы 8 ар кырӟаны ветлӥ. Туала улон выжыкыл выллем: ваньмыз вань, телевизорын кырӟало-верало. Иворъёсты сяна, кырӟанъёсын герӟаськем программаосты учкыны яратӥсько. Егитгес луысал ке, Бабкиналэн группаяз одно ик кырӟасал, дыр.

Ог 10 ар талэсь азьло Украинае вуылӥ. Потэ вал ожмаськем интыосмес учкеме, туж жаль, отчы вуылыны ӧз кылды.

Валентина Емельянова
Туспуктэмъёсыз геройлэн

Удмурт Дунне
By Удмурт Дунне Май 10, 2018 15:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*