ЖКХ: Малы сомында тырон тупатэмын?

Удмурт Дунне
By Удмурт Дунне Апрель 15, 2018 09:00

Трос квартираем коркаосын улӥсьёс март понна расчёткаос басьтӥзы. Куд-огез паймиз: малы сомында тырон тупатэмын?

Кытысь кылдӥзы?

ЖКХ удысын тыршисьёс валэктӥзы: арлы одӥг пол луэ корректировка — ӵапак март толэзе лэсьтэмын вал кылем ар понна. Нош кызьы со радъяське, луэ-а эскерыны, шонер-а поттэмын лыдпусъёс? Валамтэос кылдыку, кытчы вазиськоно? Та юанъёслы валэктонъёс сётон вылысь котрес ӝӧк сьӧрын пумиськон радъяськиз. Отчы пыриськизы Иж город администрацилэн йырызлэн ЖКХ-я воштӥсез Сергей Чернышев, «ЭнергосбыТ Плюс» огазеяськонэн кивалтӥсь Денис Детинкин, Жилищной инспекцилэн кивалтӥсез Марат Исмагилов но мукетъёсыз. Журналистъёсын ӵош ӧтемын вал Ижын улӥсьёс но.

— Шоркарын оглом 3 сюрс 500 пала трос квартираем юртъёс, — вераз Сергей Чернышев. — Со пӧлысь 2 сюрс 900 палаез итӥськемын шуныт сётонъя централизованной системае. Ӵапак та коркаосын улӥсьёслэн мартлы расчёткаосазы лыдпусъёс воштӥськизы. Корректировка законэн юнматэмын.

«ЭнергосбыТ Плюс» огазеяськонлэн кивалтӥсез Денис Детинкин верамъя, укыр трос тыриськонъёс туэ нокинлы тупатымтэ. Ог 70 процентэзлэн — котькуд квадрат метрлы 30 манетозь йылтэмын, ог 2 процентэзлэн гинэ — 30 манетысен 100 манетозь. Нош кылемезлэн будэтэм интые кулэстэмын но.

— Зэмзэ но, азьло аръёсын ӵошатыса, туэ ӝожтӥськонъёс ӧжытгес вуэмын, — соглаш кариськиз Жилищной инспекцилэн кивалтӥсез Марат Исмагилов. — Туннэ нуналлы ог 400 вазиськон пусъемын. Шонертэм лыдпусъёсты поттон шараямтэ.

Расчёткаосын кытысь кыӵе лыдпусъёс потэмын шуыса валамтэос кылдыку, вазиськыны кулэ, пе, управляющей компаниосы. Но адями сое ас понназ гинэ но эскерыны быгатэ, управляющей компанилэн яке Иж город администрацилэн сайтазы пырыса.

Кудӥз умойгес?

Котрес ӝӧк сьӧрын вераськон ӝутскиз шунытлы тыриськон амалъёс пумысен но. Соос 2 пумо луыны быгато. Яке тыриськонъёс огкадь 12 толэзьлы люкисько. Яке шуныт сётон вакытлы гинэ — 8 толэзьлы. Берлоезъя амалъя гужем тыриськонъёс ӧжытгес луозы, нош толалтэ чутрак йылозы. Специалистъёс верало: таиз амал валамонгес — кӧня шуныт басьтӥд толэзь ӵоже, сомында ик тырод. Нырысетӥ амалъя, кызьы адӟиськом, корректировка лэсьтоно луэ на.

Но кудӥз амал кельшымонгес — калык ачиз вераны кулэ. Кылем арын та пумысен юалляськон Ижын ортчытэмын вал — ӝыныезлэсь ятырез дурбасьтӥзы 8 толэзьлы люкон понна. Но туннэ кутӥське мукетыз амал.

— Мылкыдзэ туж ӧжыт адями вераз, 1 сюрс 400 но ӧз люкаськы, — талэсь мугзэ валэктӥз Сергей Чернышев. — Собере, малпамы, город талы дась ӧвӧл на шуыса. Нырысь ик коркаосысь шунытэз лыдъясь приборъёсты онлайн амалэ выжтоно — отысь лыдпусъёсты Интернет пыр адӟыны мед луоз. Али соос ог 500 коркан гинэ вань. Со сяна, оло, ваньзы уз но ворме толалтэлы бадӟымесь тыриськонъёсты — та сярысь но малпаським.

Но туэ ар пумозь, пе, эшшо одӥг пол юалляськон ортчоз, калык 1/8 амалэ выжыны дась луэмзэ вераз ке, вуоно арын 1-тӥ октябрьысен со кутӥськыны быгатоз ни.

Туэ 1/8 амалъя ЖКХ-лы тыриськонъёсты лыдъяны кутскизы Можгалан, Воткаын но Дэриысь кӧня ке муниципал кылдытэтъёсын.

Элина Кумачёва
Туспуктэм: udmdunne.ru

 

Удмурт Дунне
By Удмурт Дунне Апрель 15, 2018 09:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*