Воштӥськонъёс бере кызьы улэ «Удмуртлес» огазеяськон?

Удмурт Дунне
By Удмурт Дунне Апрель 16, 2018 14:00

«Удмуртлес» огазеяськон арлы быдэ 90 миллион манет ыштонъёс адӟе, миым гужем вытъёсъя пунэм тыронэз 118 миллион манетозь вуиз. Соин валче «Удмуртлесэ» антикризисной управляющей Евгений Родичкин юнматэмын вал. Мар воштӥськиз?

«Удмуртлесысь» антикризисной управляющей Евгений Родичкин

Тылпулэсь утён, кибыосын но висёнъёсын нюръяськон, выль нюлэс будэтон. Та 3 валтӥсь ужпумъёсты быдэсъя «Удмуртлес». Со понна котькудаз ёросын усьтэмын автономной учрежденилэн ёзъёсыз. «Удмуртлеслы» элькун бюджетысь котькуд ар 50 миллион манет висъяллязы. Но со уксё, пыдэстэм бекчеысь ву кадь, олокытчы кошкылӥз. Предприятие ялан будӥсь пунэмъёсыз пӧлы выйиз. Ӵапак соин Александр Бречалов огазеяськонлы антикризисной кивалтӥсь юнматӥз.

Коньдон ужпумъёсъя менеджер Евгений Родичкин ужзэ мытӥз огазеяськонлэсь бюджетсэ сӥсъян бордысен. Ижкарысь управлениез бордысен кутскыса, вань ёрос ёзъёсызлэн ужамзылы дунъет сётэмын вал. Соку ик шараязы, кытчы юнме уксё кисьтӥське.

— Зэмос лыдпусъёсты шараян миым 80 миллион манет тыр ыштонъёслэсь утиськыны юрттӥз, — шуэ Евгений Родичкин. — Туннэ та амалэз вань бадӟым предприятиосын куто ни, малы сое бюджет удысын пыӵатонтэм?

Евгений Родичкин нырысь ик эскериз, маин выро воштӥсьёсыз. Куд-ог кивалтон интыос чылкак быдтэмын вал. Малы, пе, 2 ужез 3 кивалтӥсь лэсьтыны кулэ.

Коньдон пуйыез али одӥг кивалтӥсь кияз возе. Азьло котькуд филиал аслэсьтыз дунзэ юнматъяз. Дунъёсъя огъя политика кылдӥз. Выль курон пуктӥзы «Удмуртлеслэсь» вузъёссэ басьтӥсьёслы но. Нырысь тэль понна коньдондэс быдэсак тыре, собере вузмес басьтоды, шуизы. Предприятие азьын пунэме кылемъёсты зуркатыны кутскизы. Электрон амалэн басьяськыны кутскизы асьсэос но. Со чотын, кылсярысь, эстӥськонлы гинэ 15 миллион манетлы ӧжытгес быдтӥзы.

Озьы огазеяськон 12,7 миллион манет табыш басьтӥз. Нырысьсэ элькун бюджетысь субсидитэк ужаны быгатоз. 2 поллы пичиятӥзы дебиторской пунэмзэс, 3 поллы — азьвыл тырымтэ вытъёссэс. Туннэ огазеяськонын 1 сюрслэсь трос адямиос тыршо. Кошкисьёс ӧвӧл. Воштӥськонъёсты, пе, ваньмыз сямен умой пумитазы.

Табере инвестиционной программа кылдытон борды басьтӥськизы ни. Со чотын нюлэс поттонъя но ворттонъя бадӟым техниказэс выльдыны малпало. Уго али ужасез 20 ар талэсь азьло поттэмын ни. Кыӵе пайдаез луоз, трактор ӝыны нунал ужа, собере кӧня ке нунал тӥяськыса сылэ ке, вера Евгений Родичкин.

5 ар ӵоже 560 миллион манет кутыны чакламын. Со выль ужан интыос усьтыны юрттоз. Озьы ик тыршомы, пе, тросгес тэль асьме элькунысь ваньбур поттӥсьёс доры мед кылёз шуыса. Быгылес коръёсты интые, пулэсь дасям арбериосты вузаса, элькун бюджетэ но тросгес вытъёс кылёзы, оске Евгений Родичкин.

«Удмуртлесын» ортчись выльдӥськон чотын элькун казнаысь 50 миллион манет шыръямын вал. Удмуртилэн Тӧроез вераз: та уксё мыноз социальной удысэ. Элькун ваньбурез пайдаё кутон ужпум вань кивалтӥсьёс азе пуктэмын. Та уж малы ке ляб мынэ, ӵектонъёс трос ӧвӧл, шуиз Александр Бречалов. Но та уж одно ик азьланьтӥськоз. Рос-прос чаклалозы вань активъёсты, учкозы, макем соос пайдаё кутӥсько. Элькун Тӧро верамъя, эскероно элькун но, кар но, ёрос но объектъёсты.

Эдуард Степанов

Удмурт Дунне
By Удмурт Дунне Апрель 16, 2018 14:00