Виктор Лебедев: Валтӥсь герой луыны кулэ гырись-кизись

Удмурт Дунне
By Удмурт Дунне Апрель 28, 2018 13:00

Алнаш ёросысь «Прогресс» хозяйстволэн тӧроез В. Лебедев вормиз «Гурт адями» конкурслэн «устоез кивалтӥсь» номинацияз.

Алнаш ёросын 17 гурт хозяйство. Татын ӟеч инкуазь, урод ӧвӧл музъемъёс, но эштосъёс азинско пӧртэм сямен. Аслэсьтыз нимзэ зэматыса, азинлыко тырше «Прогресс» хозяйство (Туймыйыл, Удмурт Вишур, Шубино гуртъёс). Туннэ кенешиськом солэн председателеныз Виктор Лебедевен.

— Виктор Николаевич, тодӥськом, тӥ — Удмуртиысь гурт удысысь дано ужась, пусъемын Россиысь Гурт удысъя министерстволэн Данъян грамотаеныз, нош алигес тӥледлы гуртоосты кузьым лэсьтӥзы — «Удмурт дунне» газетлэн «Гурт адями» конкурсэзлэн «Устоез кивалтӥсь» номинацияз ӵектыса, тӥ понна тужгес трос куара люказы. Тӥ понна со шумпотымон луиз-а?

— Ма, кызьы уз. Таӵе дунъет — тужгес дуноез, малпасько, угось наградаос сётъяло вылӥ кивалтӥсьёс — хозяйствоя лыдпусъёсыд (показательёсыд) луизы ке, пусъёзы, нош калыклэсь сюлэмзэ котьку лыдпусэн гинэ уд басьты, соосты валаны кулэ. Берло дыре мон маке газетэз уг басьтӥськы ни вал, табере одно выльысь эшъясько, соин, куке тодӥ, мон сярысь «Удмурт дуннее» лушкем гожтӥллям шуыса, туж тышкаськи. Мар, кожасько, шыпыртыса компьютер азьын пуко, нош соос ке куара сёто ни вылэм. Туймыйылэз гинэ ӧвӧл, бускель гуртъёсты но ӝуткаллям! 2 арня ӵоже контора, школа, сельсовет — ваньзы — мон понна «висиллям». Калык одӥг ужез но адӟытэк уг кельты вылэм. Ноку но ӧй малпасал, куке но мыным тау карозы библиотекае книга кузьмам, ульчаосы сяська мерттытэм понна… Но табере уката зол тыршоно луоз, осконзэс быдэстоно. Но сёровно ӧжытак возьдаськисько — али гуртоос понна туж ик ӟеч вакытъёс ӧвӧл уго. Хозяйствоямы та нуналлы 247 адями ужа. Шоро-куспо уждунмы 16 сюрс манет. Мукетъёсын ӵошатыса, ӧжыт ӧвӧл, но трос но уд шуы.

— Тодӥськом, гурт хозяйствоосты туэ туж зол шуккиз йӧл дунлэн кулэсмемез. Со дыре ик кивалтӥсьёс верало, эштосъёслы юрттэт висъямын шуыса…

— Бен, сӥзё субсидия, 300 миллион манет ӧжыт уг кылӥськы, но сое быдэс шаерлы люконо ук! Ваньзэ возьмато лыдпусъёс: араз колхозмы 10 миллион манет субсидия басьтэ — сомында ик вал 7 ар талэсь азьло, тросгес луиз 2010-тӥ кӧс аре гинэ, угось вань ю-нянь ӝуаса быриз, гектарысьтыз 6 центнер сяна ӧм кутсалэ. Со дыре ик ми араз пӧртэм фондъёсы 22 миллион манет отчислениос, вытъёс тыриськом. Ӵошатон понна уката яркыт пример: килограмм йӧл сылэ 19 манет, топливо — 42 манет… Хозяйствоос ведь ваньзэ лыдъязы-чаклазы вал, килограмм йӧллы дун 22 манет луоз шуыса, нош со 19-озь усиз. Озьы ми бадӟым ыштонъёс адӟиськом. Конешно, ми ум куашкалэ, пыд выламы умой возиськиськом, но гурт калыклы юрттыны умгес пӧрмытӥське ни. Тросэз 3-4 скал возё, уг азьтэмъясько, озьы частникъёслэсь йӧлзэс килограммзэ 16 манетэн басьтӥськом вал, но табере со милемлы, прибыль лэсьтэм интые, изъян вае, угось сое люкано, сьӧрло нуллоно — расходъёс люкасько. Вылаз ик, заводъёс тыриськонзэс ӝегато, озьы милям но гуртоос азьын долгмы люкаське.

— Озьы ке но колхозъёс понна йӧл — тужгес пайдаё продукция.

— Конешно. Соин ик 2-тӥ арзэ бызьылӥськом ни скал гид пуктон проектэн. Нырысь сӥзизы вал кадь азинлыко хозяйствоослы 1-5 процентъем гинэ кредит. Нош милям кемалась малпанмы ни выль ферма усьтыны — потэ Вавож ёросын выллем 600 йырлы туала гид пуктэм. Вӧзаз кулэ на кунян ваён инты. Та проектлы кулэ 160 миллион манет. Милям проектмы но дась ни, госэкспертиза пыр но потӥм — ваньзэ-ӧвӧлзэ 2,5 миллион манет пала быдтӥм, нош кредит басьтыны нокызьы уг пӧрмы табере — банкъёс малы ке палэнско, кун процентлэсь виссэ тырыны луонлык уг шедьты-а, мар-а…

Али ми араз скаллы быдэ 6 сюрс килограмм йӧл кыскиськом, ваньмыз малпаммыя пӧрмысал ке — 7 сюрс килограммозь вуттысалмы.

В. Лебедевез вормеменыз њечкылало гуртоосыз.

— Алигес та темая Тӧроен Александр Бречаловен вераськыкумы, со юанлы пумит юанэн шуиз: кызьы озьы луэ, артысь музъем вылын ужась хозяйствоослэн лыдпусъёссы (результатъёссы) куд-ог дыръя 2 поллы висъясько… Озьыен, тросэз потэ кивалтӥсь бордысь?

— Огласянь, шонерез вань, конешно. Ваньмыз урод, милемды нокин уг вала, уг юртты шуыса пукид ке, озьы ик куашкалод. Но ваньзэ предъёс вылэ гинэ куштыны уг яра, гурт удысэз азинтонъя кун политика золгес луыны кулэ.

Гуртоос — ужась калык, ми тырмымон поттӥськом йӧл но, ю-нянь но. Тани туэ ми ӧм ке но кизе, юмы тырмоз — кеносъёсмы али но тыроесь, но пызьлы мынӥсь зерноез килограммзэ 6 манетэн гинэ вузаммы уг поты!

— Эн кышкатэ, ми адӟим, бусыосады тракторъёс гурето ни…

— Ма, сыӵеез, конешно, ноку медаз луы. Бен, 19-тӥ апреле техника удобрение пазяны потаз. Нош кизьыны потон понна ӧжытак куазез возьмано. Но котькугес ик кизьыны празднике, 1-тӥ Мае, потӥськом — празднике, 9-тӥ Мае, йылпумъяськом. Милям дырмы ӧвӧл демонстрациостӥ, парадъёстӥ ветлыны, но ми кадь патриотъёсты шедьтыны кулэ ай — азьветлӥсь трактористъёсмы Россилэн но Удмуртилэн флагенызы гыро — сыӵе дан понна вожмаськыса ужало. Трасса вылтӥ ортчись вань машинаос, милемлы сигнал сётыса, кошко.

— Туймыйыл — бадӟым, синмаськымон гурт, татын котьмар вань: сюрес, школа, нылпи сад, клуб… Кивоштӥсьёсын сюлмаськонды ӧвӧл, дыр?

— Кытын меда сыӵе сюлмаськон ӧвӧл? Огласянь, бен, мар кулэ на кадь: ужасез ӟеч улэ, котькудӥзлэн тып-тып коркаез, машинаез, но егитъёсты капчи улон гочатэ, лэся — ваньзы сямен городэ кошко. Тани аслам но нылпиосы, сельхозакадемиын дышетскыса вылысь, городэ интыяськизы. Егит специалистъёсты кыскыны выриськом ик, одӥгез тани воксё Дэбес кемысь татчы выжыяськиз, тыршиськом юрттэт висъяны. Вот выльысь кутскысалзы ке ужась адямиез данъяны, телевизоретӥ, ток-шоуос интые, гуртысь гырись-кизисьёсты, скал кыскисьёсты, заводысь станок сьӧрын ужасьёсты возьматъяны, улонмы выльысь ас ӧраз пырысал, малпасько. Али ведь Нырысетӥ каналын ӝытбыт супыльтыса-ӵашетыса пуко! «Мынам Удмуртие» каналэз ум адӟиське, радиоын, азьвыл сямен, очеркъёс ӧвӧл ни. Тау «Удмурт дуннелы» калыкез ӝуткамды, гуртъёсы потамды понна, кивалтӥсьёс сярысь гинэ ӧвӧл, огшоры колхозникъёс сярысь но тросгес гожъялэ.

Зинаида Кириллова
Туспуктӥз Максим Егоров

Удмурт Дунне
By Удмурт Дунне Апрель 28, 2018 13:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*