Улонлэн пӧзись ӧраз. Ольга Туктаревалы — 50 арес

Удмурт Дунне
By Удмурт Дунне Апрель 26, 2018 12:30

Удмуртиысь калык артистка О. Туктарева.

«Брангуртысь песянайёс» ансамбльлэн кивалтӥсез Ольга Николаевна Туктарева, муш сямен, ужамысь уг дугдылы: шутэтскон нуналъёсы нылпи театръёс пӧлын фестиваль ортчытыса, арня кутсконын ансамбленыз концертэ мынэ ни. Туннэ, 26-тӥ оштолэзе, Ольга Николаевна 50 арессэ пусъе.

— «Евровидение» пыриськемдэс, шоу-бизнесын улэмдэс тодэ вайыса, тӥ «Брангуртысь песянайёсын» ӵош тыл но, ву но пыртӥ ортчоно луиды.

— Куке тодмо луиз, «Евровидение» мынӥськомы шуыса, ӝоже уси. Ваньмыз азьлапал ик тодмо вал ни, мон малпасько. 2010-тӥ арын милемыз синйылтӥзы, нош 2012-тӥ арын вормисе поттӥзы. Оло мон шонертэм малпасько, оло зэм но быдэс Россия ми понна куаразэ сётӥз, но со адске вал, милемыз кужмысь поттӥзы шуыса. Малпасько, со быдӟа страна но, малы ӵапак милемлы «Евровидение» сюрыны кулэ вал? Ми дышетскемын но ӧвӧл, кырӟаммы но, сцена вылтӥ ветлэммы но адямиослэн кадь уг луы. Кышкан вал. Ӧй вал оскон шоу-бизнеслы. Но песянайёс пичи нылпиос кадь ук, соос шумпотэмын, соослы тунсыко, соос уг валало, кытчы ми сюрим.

Отчы сюрес милемлы дотово трос адями усьтӥз. Надежда Уткина, Павел Поздеев, Ирина Замараева, Мария Толстухина… Ксения Рубцова («Брангуртысь песянайёслэн» продюсерзы — авт.) Людмила Зыкиналэсь юбилейзэ дася вылэм, отчы аспӧртэмлыко коллектив кулэ луэм. Нош Ксения Удмуртиысь бере, аспалъёссэ ик кыскемез потэм. Соку Маша верам, тани, пе, Брангуртысь песянайёс рок кырӟало. Нош али озьы ук: маин ке паймытоно. Соин, дыр, ми отчы сюремын. Паймытыны. Но шоу-бизнесысь адямиос ӧз валалэ пумозяз, кинэн герӟаськизы. Пересьёс — соос зэмосэсь, чылкытэсь ук. Умой, песянайёслэсь ӟеч сямзэс шоу-бизнес сӧрыны ӧз быгаты шуыса.

Мон паймисько песянайёслы. Ужам уксёзы миллионъёсын палэнтӥ ведь кошкиз. Соос та сярысь уг малпало. Нош куке канфет сёто — шори люко, ваньмызлы мед тырмоз шуыса. Коллективысьтымы Натальяпаймес весь висъяны выро, мон валасько, со тужгес яркытэз, медийноез шуыса. Но мон тыршисько, пӧлысьтызы огзэ но палэнэ медаз кельтэ шуыса — кӧтсы урод луоз ук, песянайёс ваньмыз огкадь ужез берыктэмын.

Шоу-бизнес сыӵе бадӟым опыт сётӥз! Быгатӥсь, визьмо эшъёсы эшшо но трос луизы — туж шумпотӥсько талы. Сыӵе капчи али улыны. Кыӵе ке визь-кенеш, юрттэт кулэ ке, проект гожтоно ке, жингыртӥсько. Гастрольёсын-кытын луэм учыръёсмес гожъяны кутски ни, мед адямиос но милям янгышъёсмы вылын дышетскозы кадь потэ, мед тодозы. Нош учыръёс ортчыт трос.

Огпол Лондонэ отын улӥсь ӟучъёс ӧтизы. Таможня пыр ортчиськом, отын сумкаосысь огыр-бугыр гинэ утчасько ук, нош песянайёслэн сумкаосазы ну ма-арзы гинэ ӧвӧл — соослэн ваньмыз сьӧразы. Катяпаймылэн пичи гинэ пуртэз но вылэм. Дотово трос калык люкаськиз ни ми котыре, керӟегъясько…

Москваын кинофестиваль усьтӥськыку, англи кылын кырӟаны косӥзы. Ма, кызьы кырӟалом? Режиссёрлы шуисько, потэ ке милемыз клоунъёсты кадь возьматэмды, возьматэ. Милям контракт, ми «ум» шуыны ум быгатӥське. Режиссёр шуэ, Никита Михалковез, пе, возьмады ке, сое куасалтыны быгатӥды ке… Люр-ляр интыын песянайёс 4 час пукизы, режиссёрез возьмаса. Фестиваль усьтӥськыку, удмурт кырӟанмес зыл-зыл ик лэзим.

— Ансамбльдылэсь нимзэ али нулло мукет песянайёс…

— Берло дыре валамон вал ни, милемыз воштозы шуыса. Песянайёс но сое шӧдо вал, но пумозяз ӧз оске, ваньмыз озьы берытскоз шуыса. Шоу-бизнесын со дышем сям ук. Нош асьмеос озьы улыны дышемын ӧвӧл, соин та сюлэме бышкалтэм кадь луиз. Ксениялы мынам нокыӵе кӧтӝоже ӧвӧл ни. Тау гинэ шуэм потэ: сотэк ми сокем тодмо но ӧй луысалмы. Ксения милемлы черк пуктыны уксё поттыны юрттӥз. Олокыӵе но адямиосын пумиськыны кылдӥз. Ку ми доры Брангуртэ ачиз Сергей Безруков лыктысал ай!

Выль песянайёс понна возьыт медаз луы, соос голькытэсь медаз луэ вылэм, соос милесьтым ниммес нулло ук.

— Нош куке тӥледлы мае ке но дэмлало вал, тӥ ваньмыныз соглаш кариськиськоды вал шат? Шуо, «Евровиденилы» кырӟанэз Виктор Дробыш, пе, гожтӥз. Но со удмурт кылэз уг тоды ук.

— Ой… весь война вал. Синкылиос, изьымтэ уйёс… Вал сыӵе кырӟанъёс, кудъёсыз понна возьыт. Но пересьёс ӧй ке луысалзы, мон тае ӧй вормысал, дыр. Соос комбайнъёс кадесь, уродысь но умойзэ шедьтозы. Москва шорын ик уй клуб усьтӥське. Люр-ляр, бардак. Милемыз сцена вылэ поттӥзы. Песянайёс кырӟаны кутскизы но — ваньзы чалмизы, кырӟам бере калык ӟыгыръяськыны тубиз, усьтэм сюлэмын. Малпай: котькуд адямилэн яратоно песянаез вань ук.

Виктор Дробыш шуиз: «Евровидениын» англи кылын гинэ кырӟалоды. Со, пе, европейской конкурс ук, удмурт кылэз отын нокин но уг тоды. Оло, ми тӥледлы дэрем но мукет вуромы, оло, Натальяпай балалайкаен шудоз… Шуисько: ма, кызьы ми асьме дэремтэк потом ай? Асьме дэреммес ик дӥсялом. Галина Николаевна Коневамы милям боевик, танк кадь, со тодэ, кызьы ӟучъёсын, калыкен вераськыны. Кыл тупатыны ми сое гинэ лэзьяськомы. Пӧрмытэ. Озьы ик «Евровидение» мынон кырӟанэн но. Ойдоте, шуиськом, 2 чурзэ удмуртэн кырӟалом. Соку ик дасяським, уйин удмурт текст гожъяса пуки, песянайёсын дышетӥм. Дасен лыктӥськом: кылзӥське ай, шуиськом, удмурт кылын кырӟаммы английскоен кадь ик кылӥське… и кырӟаса сётӥськом. Мар ке но татын вань, пе. Эшшо сцена вылэ гур пуктыны — милям малпанмы вал на. Ну кызьы, малпасько, со быдӟа сцена вылэ, сомында калык азе песянайёс потозы? Мар ке но сюлэмлы матынзэ кулэ. Корка уд пукты, гур, перепеч — интыяз! Но ваньзэ ас паламы куасалтыны ӧм быгатэ, конечно.

— Тӥ али но сцена вылысь уд кошкылӥське. Акыльтымон ӧвӧл-а?

— Сцена — со наркотик выллем ни. Песянайёс, арлыдзы шоры учкытэк, калык азе кема уг потало ни ке, адямиосын пумиськемзы потэ. Кыӵе ке ужрадысь бертӥськом ке, туссы ик воштӥське, тазагес луо кадь, выль кужым люкало, учкисьлэсь яратонзэ пыӵато. Ну жадё, конечно.

— Кытысь кужым шедьтӥськоды? Азьланяз кыӵе быдэстоно ужъёсты чакламын на?

— Ачид сярысь гинэ малпаськиськод ке, соку кужым уг тырмы, висён кутске. Ӵошен ӟечез борды кутскиськод ке, соку адями ик ӟигар сётэ, мылкыд но бугырске.

Ужъёс улэмъя кылдо. Перестройка бере тужгес но валатскиз: котькуд адями бордысь потэ, кыӵе милям улонмы луоз. Кин лэсьтоз, асьмеос ке ӧм? Мон котырын туж трос культурной адямиос уло, соослэн но олокыӵе но малпанъёссы монэ ӝуато. Асме азьветлӥсь ӧй шуысал. Командаын мон, адямиосын ӵош ужасько.

Нылпиосын ужаны кельше. Песянайёсын ветлытозям, быдэс поколение нылпиос будӥзы, соос «Кузьыликар» театральной кружоке пыр ӧз ортче. Система сӧриськиз. Ки пыр кошкемъёсыз мукетэсьгес будӥзы. Нылпиослы ӟечсэ сётыны быгатӥсько бере, будӥсьёссэ но мед вуттысал на дышетыны. Нылпиос туж быгатӥсесь, дӥсьтӥсьтэмесь гинэ. Мынам соосты дӥсьтӥсь кареме потэ. Соос улонын ӧс усьяны мед дышозы. «Артэ» фестивальме но уг ортчыты ни шуисько вал, но куке мон адӟи, макем зол азинскемын театральной кружокъёс, макем воштӥськемын нылпиослэн кусыпъёссы… Соку малпанэ воштӥськиз: гуртысь нылпиосын нокин но уг ужа ук.

— Та дырлы улонады кыӵе тужгес бадӟым вормонды?

— Семьяе ваньмыз вӧзам, соос монэ валало. Мынам туж ӟеч выжые, соос мыным юрттӥсько, мынам но соослы юрттӥськеме мед луысал.

Песянайёсын ветлыкум, семьяелы секыт усиз ни. Картэ сыӵе ӟеч сямо ӧй ке луысал, номыр ӧз пӧрмысал. Нылпиосы дышемын асьсэ понна кыл кутыны. Но жалясько, быдэ вуыкузы мон соос вӧзын ӧй вал шуыса. Дышетскыны капчиен пыризы. Юля историен дышетӥсь луоз, дышетоз, дыр, ай дорамы ик — Брангуртын. Сава, шуак мон понна, агрономе мынӥз. Сюрессэ ачиз бырйиз.

— Кызьы юбилейдэс ортчытоды?

— Юбилейме нимаз ортчытэме уг поты вал, кулэ но ӧвӧл со мыным. Туннэ со вань, ӵуказе ӧвӧл. Малпасько, вань ужъёсты палэнтыса, дырме семьяелы висъяны.

Мария Векшина
Туспуктӥз Владимир Широков

Удмурт Дунне
By Удмурт Дунне Апрель 26, 2018 12:30