«Учке мынэсьтым дэремме!» фестивале пыриськизы быдэс шаерысьтымы дӥсь вурисьёс

Удмурт Дунне
By Удмурт Дунне Апрель 23, 2018 08:30

«Учке мынэсьтым дэремме!» фестивале пыриськизы быдэс шаерысьтымы дӥсь вурисьёс

20-тӥ оштолэзе Пичи Пурга удмурт модалэн шоркарезлы пӧрмиз. «Учке мынэсьтым дэремме!» фестивальын ёросысь, элькунысь но бускель Татарстанысь кибашлыос ас вурем дӥсьёсынызы ушъяськизы, калык дэремез вурон амалъёсын пыр-почгес тодматскизы.

Татьяна Маштаковалэн вурем дӥсьёсыз.

Ужрадлэн мур пуштросэз но чеберез, ёрос культура юртэ пырыку ик, шӧдӥськиз. Фестиваль кутскон азьын фойеын калыкез ёросысьтымы пӧртэм гуртъёсысь дэремъёсын тодматӥзы, котькуд вурыссэ, итэтсэ, чепыллямзэ пыр-поч валэктӥзы.

Фестивале пыриськизы элькунлэн пӧртэм сэрегъёсысьтыз куноос. Кылсярысь, Эграысь модая «Питыран» театр, Эгралась, Кизнерысь кибашлыослэн юртъёссы, Сарапул ёросысь киужъя но туризмъя «Высокий берег» центр, Пичи Пурга ёросысь Вуж Мӧньяысь кибашлыос, Дарали Лели, Зоя Лебедева дизайнеръёс но мукетъёсыз.

Нырысь ик радъяськиз конференция. Отын тодматӥзы удмурт дӥсез вурон амалъёсын. Тодосчиос веразы вашкала но туала дэремъёслэн аспӧртэмлыкъёссы, пӧртэмлыкъёссы сярысь. Нимысьтыз доклад сӥземын вал удмурт вашкала дӥсьёсты, чеберъянъёсты утёнлы.

Собере уж, секциослы люкиськыса, азинскиз. Удмурт кун университетысь Искусствоя но дизайнъя институтысь доцентлэсь Людмила Молчановалэсь секцизэ быръемъёс тодматскизы калык дӥсьлэн мур пуштросэныз. Вуж Мӧньяысь кибашлыослэн юртысьтызы Эльвира Александрова калык дӥсьлэн улонын интыез сярысь вераськиз. Пичи Пургалась этно-дизайнер Татьяна Маштакова гаде но чыртые ошоно чеберъянъёс пумысен мадиз. Дизайнер Татьяна Москвина вераз, кызьы дӥсь воршудъя вошъяськиз, кызьы калык дӥсез нуллоно.

Дӥсь вурисьёс тужгес возьмазы, дыр, ку тодосчиос дунъялозы соослэсь киужъёссэс.

Нош ӝыт концерт дыръя возьматӥзы мода. Гынлэсь лэсьтэм изьыоссэ возьматӥз Татарстанысь Огырчиысь (Агрызысь) Татьяна Хаббибулина. Тросэз дизайнеръёс будэмын ёросамы. Ас сямзыя лэсьтэм дӥсьёссэс «Этно-мода» номинациын возьматӥзы Татьяна Маштакова но Яна Яковлева. Котьку но яркыт, мылкыдэз лӧпкытӥсь — озьы шуыны луоз Вероника Галановалэн коллекциез сярысь. Со калык дӥсез вурон пумысен вань куронъёсты чакла, удмурт дэремез тузӥ карыны турттэ. Шоулэн кӧня ке номинациосаз ас ужзэ возьматӥз Елена Васильева. Со арысь аре учкисьёсты ас ужъёсыныз паймытъя. Зол кичабонъёсын пумитазы Галина Храмоваез, Лариса Константиноваез но Татьяна Леонтьеваез.

Тунсыко дӥсьёсынызы синмаськытӥзы куноосмы но — Кияса ёросысь Светлана Ешкеева но Людмила Кибакова, Эгра ёросысь Ольга Стрелкова но Надежда Касаткина.

Ужрадэз радъясьёс нимысьтыз тау каро модельёслы — 3-ысен 80 арескозь нылъёс но пиос, кышномуртъёс но воргоронъёс 2 арня ӵоже репетициосы потазы, ужрадэз нуисьёслы — Алёна Зянкуловалы но Роман Ивановлы, кырӟасьлы Лидия Семёновалы.

Наталья Фролова, Елена Пименова

 Пичи Пурга черкогурт

Удмурт Дунне
By Удмурт Дунне Апрель 23, 2018 08:30