Сюресъёслы — 1 миллиард 460 миллион манет

Удмурт Дунне
By Удмурт Дунне Апрель 13, 2018 15:30

1 миллиард 460 миллион манет висъямын туэ федерал бюджетысь Ижысь но котырысьтыз сюресъёсты тупатъяны. Кыӵе сюресъёс понна куаразэс сётӥзы калык кылзонъёсы пыриськисьёс?

udmurt.ru

Шаерысьтымы но Ижысь кивалтӥсьёс шоркарысь сюресъёсты эскеро.

2016-тӥ арысен Россиын улонэ пыӵа «Кышкыт луисьтэм но ӟеч сюресъёс» проект. Со чотын тупатъясько бадӟым каръёсысь но соос котырысь 100 иськемысь сюресъёс.

Выльдоно сюресъёсты бырйизы пӧртэм амалэн. Интернетын куара сётон ортчиз водительёс куспын, юалляськизы Ижкарын улӥсьёслэсь, 2-сэ сюресъёсты пыртӥзы «Калык фронт» огазеяськон ӵектэмъя. 6-сэ косӥзы тупатыны ГИБДД но судъёс, отын укыр трос авариос кылдылыны кутскемен. Озьы Ижкарысь 43 но город сьӧрысь 12 участокъёсты тупатъяны малпамын.

Кыӵе предриятие кудзэ сюресэз тупатъялоз — тодмо ни. Торгъёс йылпумъяськизы. Ижкарын валтӥсь ужъёсты быдэстозы 2 предприятиос. Кылзонъёсы пыриськисьёс соку ик пыкылыны кутскизы: малы 2 гинэ? Конкуренцитэк ӟечлык ӧвӧл, шуизы. Транспортъя но сюрес хозяйствоя министр Алексей Горбачёв валэктӥз: торгъёсын трос предприятиос вожвылъяськизы. Вормизы дунтэм, но со дыре ик ӟеч материалъёс но услугаос ӵектӥсь огазеяськонъёс.

Быдэстэм ужъёслэсь, сюресъёслэсь ӟечлыксэс табере 5 амалэн чакласа улозы. Асфальт вӧлдӥсь катокъёс вылын, кылсярысь, видеокамераос сылозы. Соос онлайн амалэн возьматыса улозы, кызьы ужало дорожникъёс. Тупатэмзы бере сюресэз эскерозы асьсэос подрядчикъёс, общественной организациос, кивалтон ёзъёс.

Ижысь сюресъёс пумен воляло.

Кылзонъёсын калык трос юанъёс сётъяз кутӥськись материалъёс пумысен но. Тодэмзы потӥз: уз луы-а, кылсярысь, Свердловск улосвылысь изэз асьмелэнэныз воштыны. Уго сокемысь ваён асдунзэ 2-3 поллы будэтэ. Министр валэктӥз: асьме му пушкысь поттӥськись кӧльы укыр векчи но укыр быгылес. Со секыт машинаос улын уз чида, паньгалоз. Но ӧжыт техника ветлоно сюресъёс вылэ интыен-интыен эскерон понна сое вӧлдӥзы ини. Учком, пе, мар луоз соин, гарантия дырыз бырытозь. Но дуныз ог 4 поллы ичигес.

Торгъёс дыръя 30 миллион манет шыръяны пӧрмиз. Нырысь та уксё чотын тупатъяны чакламын вал Ижкарысь туэлы списоке пырымтэ сюресъёсты. Но берло пичи каръёслы сётоно кариськизы. Калык огазеяськонъёс тае умоен лыдъязы.

Озьы туэ удалтӥз Камбаркалы. Карысь куиньмосэз сюресъёс гинэ куронъёслы тупало. Бюджетысьтызы миллион манет гопъёсты кышъяны сяна уг тырмы. Камбаркаос уксё куризы вал 19 урамъёсысь сюресъёссэс тупатъяны. 30 миллион тырмоз 12-езлы. Та но умой ни. Дасо аръёс ӵоже ни та удысын сомында уксё ӧз берга.

Черодын сылэ Можга. Татын но сюресъёссы пӧртэмесь ӧвӧл. Кивалтӥсьёслы та пумысен азьвыл ик калыкен кенешыны дэмлазы. Со понна городын улӥсьёс но водительёс пӧлын юалляськонъёс, кылзонъёс ортчытыны ӵектӥзы. Нырысь ик тупатъяно сюресъёсын список но соослэн паспортъёссы луыны кулэ. Уксё шедиз ке, ужъёсты ӝегатскытэк радъяны мед луоз шуыса.

Выльдоно сюресъёсты валче быръем сяна, озьы ик уртче эскерыны дэмлало, кыӵе соос толйизы, кытын шекъёс кылдӥзы. Кылем шутэтскон нуналъёсы Ижысь ульчаосы кар но элькун кивалтӥсьёс потазы ни. Соос та уже пыриськыны ӵекто калыклы но. Та кутсконэз гинэ ай. Лымы шуна, асфальт паньган интыос кылдозы ай. Рос-прос эскеронъёс кутскозы лымы быдэсак шунам бере. Нош тупатон ужъёс — инвожоысен.

Эдуард Степанов

Туспуктэмъёс: udmurt.ru

Удмурт Дунне
By Удмурт Дунне Апрель 13, 2018 15:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*