Школа понна вожмаськон. Кытчы тэрытоно нылпиосты?

Удмурт Дунне
By Удмурт Дунне Апрель 14, 2018 09:03

Нылпи садэ яке школае инты понна анай-атайёс вожмаськоно луо, черодын сыло. Та юанэз сэрттыса-пертчыса, Удмуртиысь Адямилэн правоосызъя уполномоченной Вениамин Соломенников ортчытӥз экспертъ-ёсын кенешонзэ.

udmurt.ru

Ижын 17 ар ӵоже нырысетӥез выль школа усьтӥськиз миым феврале «Столичный» микрорайонын.

1 инты- 1 миллион манет

Удмуртстатлэн ивортэмезъя, арлы быдэ шаерамы нылпиос тросгес вордско. 17 аресозь нылъёс но пиос ог 340 сюрс кузя. Со вакытэ ик кылдэ мукетыз ужпум: декретысь уже потӥсь анайёс тэшкылиоссэс интыяны нылпи сад уг шедьто. Ярам, 2012-тӥ арысен таиз ужпум сэрттӥське кадь. 3-ысен 7 аресозь вань покчиос садэ ветлыны кулэ, шуизы. Нылпи садъёсы выль группаос усьтӥзы, 25 мурт интые, 35 тэшкыли люказы но, пӧрмиз, лэся. Зэм, пиналлы дышетскон ар шорын 3 арес тырме ке, со дораз пуконо луэ на — уго путёвкаосты люкылон май толэзе радъяське, нош нылпи садэ куто сӥзьыл пал гинэ. Соин та вакытэ Ижын 4 сюрс 828 тэшкылилы садэ инты кулэ, Дэри ёросын уг тырмы 382 инты, Дэбесын — 17, Гракын — 12, Пичи Пургаын — 3.

Ижевск город администрациысь школалэсь азьвыл дышетонъя управленилэн кивалтӥсезлэн воштӥсез Наталья Шевякова верамъя, шоркарын эшшо ватсаса 900 инты шедьтыны луэ.

Кылсярысь, выль нылпи сад пуктоно ке, 1 пиналлы инты понна чаклано 1 миллион манет котыр. Нош выльдон-тупатъянлы ичигес уксё кулэ — 1 нылпилы 200 сюрс манет чаклано, шуэ кивалтӥсь.

— Кытчы эшшо пачкатыны на пиналъёсты? — талы пумит луэ город Думалэн тӧроезлэн воштӥсез Фания Фёдорова. — Садъёсысь спортзалъёсы, суредаськон студиосы группаос усьямын ни. Ӝоген коридоре валесъёс пуктылоно луоз! Малы ужбергатӥсьёс та уж борды уг басьтӥсько?

Дышетонъя но наукая министрлэн воштӥсез Игорь Белозёров ивортэмъя, городын 2 гинэ нылпи сад частной лыдъяське. Отчы 63 пинал ветлэ. Таӵе садъёс рос-прос быдэсъяны кулэ нылпилы тодон-валан сётон программаез. Соин валче частной садлэн дуныз — толэзяз ог 40 сюрс манет.

— Ижын узыр семьяос трос ӧвӧл, соин частной садъёс уно уз луэ. Нош трос квартираем юртъёсын усьтӥськись группаосты нылпи сад шуыны уг луы, татын нылпиосты сюдыны но чакланы гинэ быгато, — вера Игорь Белозёров.

Нялтас вераса, таӵе группаос Ижын 40-лэсь ятыр ни. Толэзяз татын 8-15 сюрс манет дун куро.

Оскыны кыле Россиын 2017-тӥ ар пумын кутэм дышетонэз азинтон сярысь программалы. Яслиос пуктыса, 2020-тӥ-2025-тӥ арозь ваньмыз 3 аресозь тэшкылиос садэ мынозы, шуэмын отын.

Малы бушало гурт школаос?

Нылпиослэсь йылэмзэс лыдэ басьтытэк школаосты пуктон республикаез вуттӥз секыт югдуре. Шоро-куспо лыдпусъёсты учконо ке, Удмуртиын школаос 97 процентлы тырмемын. Со дыре ик куд-ог муниципалитетъёсын туж малпаськытӥсь лыдпусъёс. Кылсярысь, Сарапулын школаос 136 процентлы тымиськемын, Воткаын — 132 процентлы, Можгаын — 125 процентлы, Дэриын — 122 процентлы, Ижын — 121 процентлы.

Райцентръёсысь школаос кемалась 2 сменаен ужало. Кылсярысь, Кизнерын 3 школа: огез 215 процентлы тырмемын, кыкетӥез — 175 процентлы, куинетӥез — 165 процентлы. Нош райцентрлэсь 30 иськеме интыяськем Короленко черкогуртысь школае 32 мурт ветлэ — нош чакламын со 320 пиналлы.

— Азьло аръёсы Короленкоын азьмынӥсь колхоз вал. Предприятие куашказ. Калык, уж утчаса, кошке но кошке, — шуэ школалэн директорез Дмитрий Щербаков. — Кизнерын химия ож тӥрлыкез быдтонъя завод усьтэм бере уката трос егитъёс райцентре выжизы.

Туннэ Короленкоысь школа 9-тӥ классозь гинэ тодон-валан сётэ на. 6-тӥ классын одӥг дышетскисьсы но ӧвӧл. Пиналъёс эшшо ичигес луысалзы, артэ Выль Мултанысь 12 пинал татын ӧй дышетскысал ке.

Со дыре ик дышетӥсьёслы татын уг ёрмо — соос 13 кузя, вань предметникъёссы тырмо, кулэ луэмезъя соос тодон-валанзэс муромытыны ветло.

— 1974-тӥ арын пуктэм школаямы условиосты туала кырыны тыршиськом, — вера директор. — Тани шуныт туалет лэсьтӥмы. «Огъя Россия» партилэсь грантсэ утыса, спортзал выльдэмын. Туэ 1-тӥ классэ татчы вуоз, дыр, 2-3 мурт.

Нош нылпи садэ быдэс черкогуртысь 12 пинал гинэ ветлэ — отын 14 инты чакламын. Гурт, оло, улӟысал, ӟеч предприятие кылдысал ке. Али Короленкоын вань на культурая юрт, магазин, нимаз ужбергатӥсьлэн пичи предприятиез, тросэз нылкышноос соцработник луыса тыршо.

Малпаськытӥсь югдур мукет районын но. Дэбес ёросысь Удмурт Льӧм гуртын кужмо предприятизы вань — Калинин нимо СПК. Гуртоослэн усто ужамзы понна ик 2013-тӥ арын татын школа-сад усьтӥськиз. Азьвылэз пу юртсы куашкан калэ вуэмын вал ни. Туэ нырысетӥ юбилей — 5 ар. Но пумитало сое ӝожомем мылкыдын. Школа али 56 процентлы гинэ тырмемын.

— Начальной школамы 16 пиналлы чакламын. Али 9 мурт дышетске. 3 муртлы тросгес луысал, но анай-атайёс пиналъёссэс Зар-Медлоысь школае нуллыны шӧтазы. Пиналзы уго, 4 ар ортчыса, сёровно отчы вамыштоно луоз, выль коллективлы дышоно. Зар-Медло школае ог 20 пинал автобусэн ветлэ бере, соос сьӧры тэшкылиос но мыно ни, — шуэ директор Юрий Григорьев.

Садикын 15 пиналлы инты ке, отчы 8 покчиос ветло. Школа-садын нылпиос ичи ке но, татын быдэс штат ужасьёс — 2 дышетӥсь, воспитатель, сиён пӧрась, утялскись, возьмаськись. Директор верамъя, выляз аре нырысетӥ классэ 2 мурт лыктоз. Соин 2 ар мында ужанлы оско на, мар луоз отӥяз — шуг вераны.

23 ар возьмало

Удмуртиысь городъёсын дасо аръёсын школаос ӧз ни ӝутске. Ижын 17 ар ӵоже нырысетӥез выль юрт усьтӥськиз миым «Столичный» микрорайонын. Татын 825 инты чакламын, нош вуиз 1 сюрслэсь трос пинал. Озьы дышетскон 2 сменаен радъяськиз. Ижын али 12 школа уг тырмы. 2025-тӥ арозь чаклало ӝутыны 10-сэ. Отын 9 сюрслэсь ятыр инты луоз, но сюлмаськон уз быры на.

Воткаын 23 ар выль школа возьмало. 5 номеро школаын тужгес секыт югдур. Отысь потон амал утчаса, малпазы вал Воткаысь промышленной техникумлэн буш улӥсь юртъёсаз — дышетскон корпусын, мастерскойын но общежитиын — классъёс усьтыны. Интыысь администрация малы ке но уг вырӟы. Таӵе амалъя ик колледжъёслэсь но техникумъёслэсь буш юртъёссэс чакланы кутскизы Ижын. Кытчы вуттоз та югдур? 10 ар отчыса, вань пиналъёс вузъёсы уз мынэ ук!

Анай-атайёс пиналъёссэс жаляло, трос кузя, ёркыт интыын дышетско шуыса. Городъёсысь классъёсын ӧжытсэ 28 пинал луэ. Классын нылпиослы инты уг окмы — мумы-бубыос вазисько Прокуратурае. Таиз нормативъёсты чакламтэзы понна директоръёслы штраф ляке. Озьы кылем арын 17 протокол гожтэмын, оглом 247 сюрс манет тыриськон сётэмын.

Матысь аръёсы югдур уката секыт луоз. Дышетонъя но наукая министерство чакламъя, школае мынӥсьёслэн лыдзы арлы быдэ ог 1,5-2 сюрслы будоз. 2022-тӥ арын тужгес трос покчиос парта сьӧры куриськозы. Нош луоз-а инты?

Елена Скворцова

Удмурт Дунне
By Удмурт Дунне Апрель 14, 2018 09:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*