Павел Мелендин: Бокс адями кариз

Удмурт Дунне
By Удмурт Дунне Апрель 16, 2018 16:30

Павел Васильевич Мелендин — СССР-ысь спортъя мастер, Удмуртиысь дано тренер.

Павел Васильевич Мелендин — СССР-ысь спортъя мастер, Удмуртиысь дано тренер. 46 ар бокс удысын ни, соос пӧлысь 36 ар тренер луэ. Со будэтӥз боксъя 3 спорт мастеръёсты, ас вакытаз 2-ез дышетскисьёсыз Россилэн олимпийской сборнояз вал. Павел Васильевич шуэ, улонам ӧй кылдысал ке бокс, мон шырмач (бандит) луысал, дыр.

Туала зал

Павел Васильевичен пумиськимы Ижысь 91-тӥ школаын. Татын солэн сюлмаськемезъя нылпиослы боксэн вырыны сэрег кылдытэмын. Быдэс городысь школаос пӧлын таиз тужгес туалаез но ӟечез.

— 2005-тӥ арын таӵе боксъя зал лэсьтӥмы асьмеос пиналъёсын, — вера П. Мелендин. — Бадӟым тау директорлы Любовь Сурниналы: со нырысь пичигес висъет сётӥз, собере пиналъёсмы Удмуртиысь чемпионатъёсын вормылыны кутскизы но, залэз паськытатӥм.

Ваньзэ, мар вань боксъя залын, соосты Павел Васильевич аслэсьтыз татчы сётӥз, куд-огзэ кузьмазы азьвыл дышетскисьёсыз. Залын лэсьтэмын ринг, уно мешокъёс, укноос дурын лачак перчаткаос. Залын пуктэмын телевизор, пиналъёс нимо-дано спортсменъёслэсь рингын нюръяськемзэс учко, озьы ик асьсэдыз видеое пукто но бӧрысь янгышъёссэс ӵош эскеро. Татчы мугорзэс кыдатыны ветло 10 аресысен нылъёс но пиос.

Павел Васильевичен вераськон куспамы пиослэн тренировказы кутскиз. Ачиз дано тренер али нылпиосты бордаз уг басьты ни, соосты будэтыны сюрес сётӥз дышетскисьёсызлы, кылсярысь, 91-тӥ школаын тренерын ужа Вячеслав Подкин. Нош Павел Васильевич доры дышетскыны ветло бадӟымъёс.

21 аресаз спортъя мастер луиз.

Героеным вераськон куспам малпай: солэн улоназ вань огкадез Америкаысь тодмо боксёрен Майк Тайсонэн. Со но одӥг интервьюаз шуиз: боксёр ӧй луысал ке, оло, хулиган будысал…

Шаян пи

Павел Мелендин вордӥськиз Сьӧлта ёросысь Югдон гуртын. Семьяяз 5 нылпиос пӧлысь покчиез — шумес пыдэс вал.

— Атае Василий Гусев (Павел Васильевич анаезлэсь фамилизэ нуллэ — авт.) мон шоры Гусёнок пие шуыса вазиськылӥз. Со 3 ожез ортчиз: жугиськиз японецъёсын, финъёсын, фашистъёсын. 1943-тӥ арын, зол сӧсырмыны шедьыса, дораз бертӥз. Атае туж визьмо вал — техникумез быдтэмын. Гуртысь колхоз председательлы быдэс арлы отчётъёс лэсьтыны юрттылӥз. Анаелэн но 7 класс дышетскемез. Атае, зол висьыса, вазь кулӥз, мон соку гинэ школае вамыштыны кулэ вал.

Пичи дыръяз Павел туж йӧнтэм вылэм. Югдонъёслэсь сьӧлтаос гинэ но кышкало вал, Ува кемын но тодо вал кужмо югдон батыръёс сярысь.

— Дышетскыны ветлӥсь-комы вал 5 иськеме Юмга гуртэ, — азьланьтэ П. Мелендин. — Мон котькытчы чуртнаськыны тыршылӥ: пыдын бызьылӥ, волейболэн, баскетболэн, футболэн шудылӥ — котькытын одӥгез кужмоез вал. Кӧты ӧз веськалля шат куасэн бызьылонлы гинэ — уг яратӥськы вал сое, кызьы гинэ дышетӥсьмы Михаил Сергеевич Зуев ӧз тыршы малпанме воштыны — ӧз быгаты.

Мынэсьтым 2-3 ареслы бадӟым пияшъёс но кышкаллязы, палэнтӥ ортчыны тыршылӥзы. Мугорыя бадӟым ик ӧй вал ке но, инкуазь кужымзэ сётэм. Соку визьтэм йырын малпалляй: кужым вань ке, зэмлык тон палан. Зэм, пичиосты мон ноку ӧй обидьылы, мукетъёсызлы но ӧй сётылы. Азьветлӥсь луыны ӧй тыршы ке но, эшъёсы асьсэос монъя кариськылӥзы. Классмылы старостае но кӧня пол пуктыны медо вал, ачим пумитъяськи.

Пушкам мон романтик вал. Яратылӥ лыдӟиськыны. Соку Югдонын библиотекамы вал, но отын ужась ӧз сюрылы, лыдӟиськон юртмы ворсаськыса сылӥз. Мон отчы книга вораны пыралляй, но котьку интыяз берыктылӥ. Туж яратылӥ геройлыко, зэмлык понна нюръяськись адямиос сярысь лыдӟыны. Озьы 5-тӥ классын ик А. Дюмалэсь «Три мушкетёра», «Генрих IV» романъёссэ лыдӟи. Н. Островскийлэн «Как закалялась сталь» романысьтыз Павка Корчагинэн асме ӵошатылӥ, со кадь ик будэме, уродэныз нюръяськеме потылӥз.

6-тӥ классозь туж ӟеч дышетски, поведение понна ке шат «2» пуктылӥзы. Быгатӥсько вал дышетӥсьёс-лэсь йырзэс кур карыны, бӧрысь со сямы боксын туж юрттӥз. Туж яратӥсько вал математикаен, физикаен ды-шетӥсьмес Нина Капачинскихез, солы синмаськемын но вал. Оло, соин ик урокъёсаз туж йӧнтэм асме возьылӥ. Ӧч кареме понна со монэ кӧня ке толэзьлы мукет классэ но выжтылӥз. Трос аръёс ортчыса, тодӥ, мон солэн яратоно дышетскисез вылэм шуыса. Мон ноку урокъёслы рос-прос ӧй дасяськылы, урок азьын гинэ лыдӟылӥ но юакузы ваньзэ туж умой вералляй.

Рингын мыжгаськон дыръя.

Берло аръёсы агайёсы, апае милемын уг уло ни вал. Ми анаеным ӵош улӥмы. Атайтэк будӥмы бере, ваньмызлы дыши: пу пильылӥ (бӧрысь со туж юрттӥз боксын), чипы-курег, парсь сюдӥ. Яратӥсько вал чорыганы, пӧйшураны, 10 арескам нырысетӥ лудкечез ыби. Асьмелэн пыӵалмы ӧй вал ке но, мыным бадӟымъёс оскылӥзы. 7-тӥ классын дышетскыкум, анае туж зол висьыны усиз, гужемлы сое Ижысь больницае понӥзы. Озьы вань хозяйствоез ачим утялтӥ. Анаелы пенсия сётыны кулэ вал — 3 манет, нош почтаын ужасьмы тётя Катя со уксёез мыным ӧз сёты. Сьӧд нянь но ву вылын улӥ, ярам гулбечын картошкамы вал на — сое пӧзьтыса сии, бӧрысь бакча сиён кисьмаз. Гуртамы ӵыжы-выжыосмы но вал, но соос доры, юрттэт курыса, вазиськыны?! Сямы сыӵе ӧй вал, ваньзэ ачим вормоно кожалляй.

«Прописка»

Со гужеме ик Пашалэн анаез улонысь кошкиз. 14 аресказ пияш сирота кылиз. Бадӟымез агаез Геннадий сое дораз басьтӥз. Со Ижын семьяеныз улэ вал ини. Паша Металлургысь 70-тӥ школае вамыштӥз.

Гуртын мон азьветлӥсь вал ке, татчы вуыса, адӟи — мынэсьтым но йӧнтэмъёсыз вань вылэм. Микрорайонысь пияшъёс «Сотня» группировка кылдытӥллям. Соослэн кивалтӥсьсы Фердинанд одӥг пол монэ ульчаысен кырмиз. Тон, пе, арнялы быдэ 20 копейка мыным сётъялод. Нош кытысь ай мынам уксёе? Ӧй сётскы, со монэ ӧз вормы. Бӧрысь нош ик «Сотняысь» пияшъёс монэ кырмизы. Выль адями «прописка» пыр ортчыны кулэ, пе. Котькудӥз ымнырам, пе, мыжгоз. Монэ 10 адями котыртӥз, черодэн мыжганы выро, нош мон уг сётскиськы. Пегӟыны но луэ вал, но мон ноку пеганы ӧй тыршы. Соку одӥгез но ымнырам ӧз вутты, мон палэнскыны быгатӥ. Одӥгез гинэ шат ныр йылам вуттӥз. Мон кескич вал: куасалски, ныр пушме копалтӥ, нырысьтым вир потэ шуыса, возьматӥсько. Соослэн куспазы вераськемын вылэм, вир потто ке, «прописка» ортчемын лыдъяське. Шумпотӥзы. Югдонын улыкум ай, Коля агае Ижысь 2 боксёрской перчатка вайиз вал, мыжыклэсь палэнскыны дышетӥз. Со туж юрттӥз та учырысь потыны.

Устоез боксёр

— 8-тӥ класс бере Ижысь одӥгаз училищее пыри, андан ӵыжатӥсьлы дышетски. Бӧрысь ужаны кутски «Ижсталь» заводын андан ӵыжатӥсьлэн юрттӥсез луыса. Училищеын дышетскыкум, ульча кузя тӧлэз ӵыжаса медам ветлы, урод адямиос пӧлы медам сюры шуыса, Коля монэ боксъя секцие ӧтиз. Со нуналэз — 1972-тӥ арын 29-тӥ октябрез — шунытэн тодам вайисько.

Боксэ ӧй лыктысал ке, малпасько, мон со «Сотняысь» яке мукет группировкаысь адямиосын эшъяськысал, соос кадь ик шырмач луысал. Угось классысьтым ик куд-ог пияшъёс со «Сотняе» пыро вал, монэ но бордазы кыскыны выризы. Нялтас вераса, тросэз азьвыл эшъёсы улэпесь ӧвол ни, кинэ ке эшъёсыз ик быдтӥзы, мукетыз, пытсэт сьӧры сюрыса, кулӥз, куинетӥез кышкыт 90-тӥ аръёсы улонысь кошкиз.

Боксёръёсын В. Кузнецовен но И. Сидюкен.

Мыным туж удалтӥз тренерен. Юрий Михайлович Новиков мыным атай интыын луиз, мон котьма ласянь солэсь адӟем карылӥ. Бокс мынэсьтым быдэс улонме басьтӥз, одӥг пол но тренировкаез кельтэме ӧвӧл, висьыкум но тренажёрной залэ дыртӥсько вал. 3 толэзь тренировкае ветлэме бере мон Удмуртилэн чемпионэз луи. Зэм, солэсь азьвыл клубъёс куспын 3 ӵошатскон ортчиз, ваньзэ келяй. Удмуртиысь чемпионат азьын тренере установка сётӥз — чемпион луыны. 13 бой вал, 1-тӥ разрядэн пияшъёсты ваньзэ ворми. Та бӧрсьы мыным 1-тӥ юношеской разряд сётӥзы.

1973-тӥ арын Нижний Новгородын «Зенит» спорт обществолэн боксъя турнирез вал. Но со азьын спаринг дыръя киысьтым лыэз чигиз. Тренерелы ӧй вера, турнире уз басьты шуыса. Малпай, ӵошатскон дорозь, оло, бурмоз ай. Нижний Новгородын турнир азьын тренировка ортчытӥм, отын золгес мыжгыны шедьтӥ, бурмыны сётскем инты выльысь вӧсь луиз. Озьы ке но ринге потӥ, одӥг киыным мыжгаськи, 1-тӥ раундын ворми, но быдэс боез 3:2 счётэн келяй. Бӧрысь монэ, 19 аресъем пияшез, бадӟымъёс пӧлын турниръёсы нуллыны кутскизы. Ӧдъясько вал Москваысь мугорез кыдатон культурая институтэ пырыны, но армие басьтӥзы. Службаме нуон вискам боксэз ӧй вунэты, мастере кандидат луи. 1978-тӥ арын, 21 арескам, спортъя мастер луи. Соку Новгородын А. Невскийлэн призэз понна ӵошатсконъёс мынӥзы.

5 бой ортчоно вал. 4-яз ворми. 5-тӥез бой москвичен вал, сое тренере зол мыжганы ӧз лэзьы. Шӧдӥсько, вормыны быгато, нош тренере нош ик ӝыны кужымен мыжганы куре. Судьяос тушмонэлы вормон сётӥзы. Бӧрысь тодӥ: тушмонэлэн тренерез но мынамез эшъёс вылӥллям, судьяосын но азьлапал вераськемын вылэм ни. Москвичъёс тренерме куриллям, мон мед келяло шуыса. Та сярысь тренере вераз берло гинэ, кулон азяз. Та учыр пумысен одӥг пол но тренерме пыкылэме ӧвӧл, угось со сомында мон понна лэсьтӥз, мон солы музъемозь йыбырттыны дась.

Пыд йылэ султон

Павел Мелендин 1980-тӥ аръёсы тренер луыса ужаны кутскиз, нялтас тыршиз «Ижсталь» заводын 21-тӥ цехын андан ӵыжатӥсьлэн юрттӥсез луыса, бӧрысь цехысь комсомол огазеяськонлэн секретарез вал. Павел Васильевич андан ӵыжатӥсьёсты спортивной, культурной ужрадъёсы пыриськыны бурдъялляз. Нырысетӥ араз цехсы 2-тӥ интые потӥз, бӧрысь быдэс заводын устоез цех луиз. Заводчиосын ужаны быгатэмез понна Павел Васильевичлы Испание но Прибалтикае шутэтскыны путёвкаос сётъязы.

Сьӧлта ёрос библиотекаын пумиськон дыръя.

Павел Мелендинлы луыса ик Удмуртиын нырысьсэ тодӥзы кикбоксинг сярысь. Испаниысь со восточной единоборствоос сярысь журналъёс вуттӥз. Городын кикбоксингъя секциос усьтӥськизы, тросэзлы егитъёслы выль спорт тунсыко потӥз. 1991-тӥ арын Удмуртиын нырысьсэ радъяськиз кикбоксингъя Россиысь чемпионат. Ар ортчыса, нимысьтыз федерация но кылдӥз, соин кивалтыны кутскиз ачиз ик Павел Мелендин.

Секытэнгес мынӥзы ужъёс боксын. 1990-тӥ аръёсы бокс кулэ ӧйлась ни, боксёръёс мугорзэс кыдатӥзы кин кытын быгатэ. Со вакытъёсы Удмуртиысь боксъя федерациез пыд йылаз султытыны амал шедьтӥз Павел Мелендин, со ик федерациен но кивалтӥз.

— Спортсменъёс ужаны но, мугорзэс кыдатыны но мед быгатозы шуыса, усьтӥ «Белый квадрат» спортивно-охранной предприятие. Ужаны спортсменъёсты гинэ басьтылӥ, со вакытэ мон дорын боксъя 13 тренер ужаз, уждун басьтӥз, тренировкаосы ветлӥз. Куд-огез ужлэсь воксё мозмытэмын вал — боксэн гинэ выриз, но уждун огшоры ужасьлы сямен сётъялляй. 1990-тӥ аръёсы городын йыртэмасьёс вӧлмемын вал, монэ но бандит шуылӥзы, одӥг пол но законэз тӥяме ӧвӧл ке но. Ми доры, утьыны курыса, ӵем вазиськылӥзы ужбергатӥсьёс, угось ужамы договоръёсъя, налогъёс тыримы, — вера П. Мелендин.

Павел Мелендин ке ӧй луысал, 1990-тӥ аръёсы, оло, Удмуртиысь бокс воксё бырысал. Павел Васильевич будэтӥз спортъя 3 мастеръёсты. Игорь Сидюк но Юрий Никифоров Россилэн олимпийской сборнояз сюрылӥзы.

— Игорь 1996-тӥ арын США-ысь Атлантаын ортчоно Олимпиадае мыныны кулэ вал, — вера П. Мелендин. — Ачиз лапег, векчи гинэ — 48 килограмм — нош мыжыкез кужмо вал, солэсь кышкаллязы тросэз спортсменъёс. Но Олимпиада азьын Москвае ачим мыныны ӧй быгаты — Игорез мукет тренерен келяй. Но тренерез вуымтэ шуыса, И. Сидюкез Атлантае ӧз басьтэ. Нош солэн вормыны луонлыкъёсыз туж бадӟымесь вал, кин со Олимпиадаын куинетӥез луиз, сое И. Сидюк ворме вал. Та понна туж асме тышкаськисько. Бӧрысь Игорь спортысь воксё кошкиз. Юрий Никифоровен али Ижысь 9-тӥ спортшколаын тренеръёс луыса ӵош ужаськом. Виталий Кузнецов но мастер спорта луэмез бере боксысь кошкиз, нош со вал одӥгез, кудӥз нырысетӥ раундын ик вормылӥз. Туж данъяськисько Марсель Ижбулдинэн, со 16 аресаз спортъя мастере кандидатлэсь куронзэ быдэстӥз, Россиысь но дуннеысь ӵошатсконъёслэн вормисьсы луэ.

Кыкетӥ атай

— Павел Васильевич монэ трослы дышетӥз, — шуэ азьвыл дышетскисез Вячеслав Подкин. — Мон бубытэк 7-тӥ классын кыли, Павел Васильевич мыным атай интыын луиз, бордаз басьтӥз, боксэн тодматӥз. Нырысетӥ бойёсме тодам вайисько ке, кыӵе зол сюлэмы дырекъя вал, но Павел Васильевич быгатылӥз кулэ кылъёс шедьтыны, кужымелы оскон пыӵатыны.

— Ваньмыз боксэ вуэм пиналъёс одно ик спортэн улонзэс герӟалозы шуыса уг малпаськы, — азинтэ веранзэ П. Мелендин. — Нырысь ик соослэсь адями карыны тыршисько, школазэ мед йылпумъялоз, бӧрысь техникуме, университетэ пыроз, собере ӟеч ужась, атай луоз. Боксёрез чемпион карыны капчи ӧвӧл. Малпаськоды, нянь, сӥль, ву вылын гинэ ӟеч спортсменэз будэтыны луэ? Уг. Сое ӟеч сюдыны кулэ витаминъёсын но биодобавкаосын. Татын трос юрттӥз Чайковскийысь мугорез кыдатон культурая институтын дышетскеме. Биохимиен дышетӥсе Юрий Прасолов биодобавкаос сярысь трос тодон-валан сётӥз. Тренировкаос, ӵошатсконъёс дыръя мае сётоно, кызьы спортсменэз сюдоно шуыса, солы вазиськылӥ, кенешылӥ спортъя врачъёсын, допинге сюронтэм но спортсменлэсь тазалыксэ сӧронтэм вылысь.

Тросэз шуозы, дыр, бокс — туж вӧсь карись спорт. Но боксёрлэн кадь ненег но огвакытэ кужмо мыжыкез вань меда? Зэмос ӟеч боксёр лек луыны, вӧсь карыны быгатэ рингын гинэ. Ӵошатсконъёс, тренировкаос дыръя рингын пушкысьтыз со ваньзэ уродзэ поттэ, семьяезлы шунытсэ, яратонзэ кельтэ.

Ачиз Павел Васильевич одӥг пол но весяклы кышнояськиз. Кузпалыз кема аръёс ӵоже ужаз нылпи садын. Вордӥзы 2 нылпи. Пизы Сибирьын улэ. Нылзы Москваын. Мелендинъёслэн вань ни 3 аресъем нуноксы.

Ангелина Снигирёва

Туспуктэмъёсыз авторлэн

Удмурт Дунне
By Удмурт Дунне Апрель 16, 2018 16:30