Кин юрттоз Вавож ёросысь Итчи-Докъяын школа пуктыны?

Удмурт Дунне
By Удмурт Дунне Апрель 17, 2018 12:23

Вавож ёросысь Итчи-Докъяын (Кионгурт) 2018-тӥ арын выль школа ӝутыны кутскозы шуыса, сӥзизы вал 2 ар талэсь азьло ик. Угось борддоръёс 2 интыетӥ пилиськемын, толалтэ кезьыт. Но та дырозь тодмо ӧвӧл на, ку пиналъёс югыт, шуныт юртын тодон-валан басьтыны быгатозы.

Школалэн дӥньыз (фундаментэз) кирпичен-кирпичен куашка.

Сюлмаськон бӧрсьы юслмаськон

Та школа 1970-тӥ арын пуктэмын. Сое ас кужыменыз ӝутӥз вал колхоз, нимысьтыз лэсьтӥськисьёсты ӧтьылытэк. Аръёс ортчыса, юрт вужмиз.

— Борддоръёс кузя висъёсты адӟыса, ми кышкаса гинэ улӥськом, — сюлмаськемзэ вера школалэн директорез Валентина Матвеева. — Фундаментмы шудэ, соин ик борддоръёс пилисько. Толалтэ школа пушкын 13 градуслэсь шуныт уг луы — пиналъёсмы курткаосын урокъёсын пуко. Ма, школаез ог 50 ар талэсь азьло колхозмы ас кужыменыз пуктӥз бере, солэн бумага вылын проектэз но ӧвӧл. Тани туэ ву гумыосмы кынмизы, кытын маиз сӧриськиз, тодыны ӧм быгатэ — проектмы ӧвӧл. Бадӟым тау колхозмылы — выль ву гумыос кыскиз. Али тани сюлмаськиськом ни школамес гужемлы дасяны — нылпиосты лагерьтэк уд кельты ук. Но столовоймы нормаослы уг тупа, отын пыкмем зын вӧлскемын, вӧлдэтаз пурысьтам виштыосыз трос. Кылем арын, кырсь интыосты буяса, зыраса, лагерь усьтыны быгатӥм ик. Но туэ столовоез куронъёслы тупамон карон понна бюджетысь уксё но висъямзы уггес поты, оло, выль школа ӝоген пуктыны кутскозы шуыса. Юнме уксё кисьтон медаз луы, пе.

Тупатоно яке выльзэ ӝутоно?

Туннэ нуналлы школаын Кионгуртысь, Макаровоысь, Берӟекысь 140 пинал дышетске, соосты визьнода 24 дышетӥсь. Школа пумысен бадӟым юан кылдэмын: тупатъяно яке выльзэ ӝутоно? Татын «Удмуртия» колхозлэн юрттэмезъя 2014-тӥ арын экспертиза ортчытэмын вал. Соку юрт аварийной шуэмын ӧй вал ке но, отын дышетскыны экспертъёс алӥзы (нецелесообразный к использованию, пе). Тупатъяны но толыкез ӧвӧл ни, капчигес, быдэс сэрттыса, выльзэ пуктыны, шуизы. 2016-тӥ арын татчы вуылӥз соку Удмуртилэн Тӧроез Александр Соловьев, гуртоослы со сӥзиз 2018-тӥ арын выль школа пуктыны. Но туннэ нуналлы тодмо ӧвӧл на, ку лэсьтӥськон уж вырӟоз. Но воштӥськонъёс пала вамышъёс уг лэсьтӥсько шуыны уг яра. Соос ӧй луысалзы, вылды, секыт югдурез тупатыны ӧй басьтӥськысал ке «Удмуртия» эштос. Колхоз вуоно школалэсь проектсэ дасяны уксё сётӥз.

— Зэм но, Кионгуртын школа пуктӥськыны кулэ вал «Школа-2025» программая, — вера ёрос администрациысь дышетонъя управленилэн кивалтӥсез Анатолий Тарасов. — Но выль кивалтӥсьёс та программае сюрем школаосты выльысь эскеризы но, Итчи-Докъяысез списокысь куштэмын вал. Ужез интыысьтыз вырӟытон понна «Удмуртия» колхоз проект дасяны уксё висъяз. Оскиськомы, проект лэсьтэмын бере (али экспертиза пыр ортче на), быгатомы Удмуртилэн инвестиционной проектаз сюрыны. Школа туннэлы, зэм но, секыт югдурын. Отын дышетскемлэсь алэ Роспотребнадзор, тылпу кысӥсьёс ласянь тырмымтэос шараямын ӧвӧл. Роспотребнадзорлэн вазиськемезъя суд пуктӥз: туэ 1-тӥ сентябрёзь школаез пыр-поч тупатъяно. Но юртэз выльдон понна 1-2 миллион манет гинэ уз окмы, вань санитарной нормаосты чакласа, школа борды ӝутоно спортзал (али пиналъёс колхозлэн спортзалаз мугорзэс кыдато), уг тырмо классъёс, лэсьтоно нимаз мастерскойёс, кулэ ӟеч столовой. Соин судлэсь куронъёссэ быдэстыны луонлыкъёс ӧвӧл. Школа пуктытозь, вань малпанмы покчиосты но 5-тӥ-9-тӥ классъёсты гуртысь культурая юртын дышетыны, отӥоссэ 12 иськемысь Вавож школае нуллыны.

Школа вань ке, улон азинске. Соин вань гуртоос туж витё, нылпиоссы ӟеч, шуныт, югыт интыын дышетскыны быгатозы шуыса. Но ӵапак куашкан калэ вуэм школае нылпиоссэс сётэмзы потымтэен, 3 семья палэнэ улыны кошкиз ни. Та муген ик гуртэ мукет семьяослэн но лыктэмзы уг поты, уг гочаты соосты ӟеч уж но, бадӟым уждун но. Нялтас вераса, «Удмуртия» колхоз — шаерысьтымы одӥгез тодмоез но кужмоез хозяйство.

Ангелина Снигирёва

Удмурт Дунне
By Удмурт Дунне Апрель 17, 2018 12:23