Елена Вяльбе ушъяз удмурт спортсменъёсты

Удмурт Дунне
By Удмурт Дунне Апрель 19, 2018 12:52

Елена Вяльбе ушъяз удмурт спортсменъёсты

17-тӥ апреле Удмуртие вуылӥз Россиысь Куасэн бызьылонъя федерациен кивалтӥсь, СССР-ысь спортъя дано мастер, 3 полэс олимпийской чемпионка Елена Вяльбе. Бадӟым куноез ас дораз пумитаз Александр Бречалов.

udmurt.ru

Елена Вяльбе: Удмуртиын кужмо тренеръёс ужало. Оскисько, азьланяз но эшлыко кусыпъёсмы уз ыше шуыса.

Резиденциын ортчем пумиськонэ озьы ик вуылӥзы СССР-ысь спортъя дано мастер, 4 полэс олимпийской чемпионка, Удмуртилэн но Ижевск городлэн дано гражданинзы Галина Кулакова, Удмуртиысь Куасэн бызьылонъя федерациен кивалтӥсь Тамара Тихонова, Удмуртиысь мугорез кыдатон культурая, спортъя но егитъёсын ужан политикая министрлэсь ужзэ быдэсъясь Наталья Гольцова, тренер Олег Перевозчиков но спортсмен Максим Вылегжанин. Вераськон мынӥз шаерамы куасэн бызьылонэз азинтон сярысь.

— Россилэн сборной командаяз трос аръёс ӵоже Удмуртиысь спортсменъёс валтӥсь инты басьто, — ушъяса вераз Елена Вяльбе. — Татын кужмо тренеръёс ужало. Оскисько, азьланяз но эшлыко кусыпъёсмы уз ыше шуыса.

Спортын бадӟымесь вормонъёс басьтон вылысь кулэ туала куронъёслы тупась спорткомплексъёс. Выльдэм-тупатъямез кулэ каро А. Демидов но Г. Кулакова нимо комплексъёс. Отысь куасэн бызьылон сюресъёс умоесь ке, спортсменъёслэн улон интыоссы сокем ушъямонэсь ӧвӧл на. Биатлонъя комплексын кылдыны кулэ на бадӟым бассейн, фитнес- центр, куасэн бызьылон сюресэз кузьгес карозы, Ижысь «Искра» комплексэн огазеяса. Г. Кулаковалэн комплексаз гостиницаез тупатъяно, кулэ на туала куронъёслы тупась вакс-кабинаос. Шаерысьтымы вылӥ кивалтӥсь оскытӥз, куд-ог лэсьтӥськон ужъёс туэ ик мытэмын луозы.

— Азьло Удмуртиез Калашниковлэн автоматэныз гинэ син азям пуктӥсько вал, нош табере спортлэн шаереныз но адӟисько. Удмуртилэн азьвыл кивалтӥсезлы А. Волковлы тау кароно Гурт шудонъёслы кутскон сётэмез понна, мытэм ужзэ ум аналтэ, — шуиз Александр Бречалов. — Ёросъёсын спортъя выль базаос кылдэмен, мугорзэс кыдатыны мылкыд карисьёслэн лыдзы йылэ. Но спортэн нимысьтыз вырисьёс понна эшшо но бадӟымгес саклык висъяно.

Кылем арын Ижын ортчиз Г. Кулаковалы сӥзем куасэн бызьылонъя калыккуспо марафон. Ужрадэз туэ но азинтозы, но мукет сяменгес. Кылсярысь, кубок понна вожвылъяськон ортчытыса. А. Бречалов отчы пыртыны ӵектэ Вавожын но Глазовын ортчылӥсь ӵошатсконъёсты, «Ижысь лыжня» но «Удмурт дунне» газетлэн кубокез понна вожвылъяськонъёсты.

Тренеръёсты будэтон сярысь но кенешизы. Спортсменъёсмы мукет улосъёсы медаз пегӟе шуыса, спортсменъёсты но тренеръёсты дасянъя Ижын нимысьтыз центр усьтыны малпало.

Валентина Емельянова

Туспуктэм: udmurt.ru

Удмурт Дунне
By Удмурт Дунне Апрель 19, 2018 12:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*