Елена Сараматова. Артана. Этюд

Удмурт Дунне
By Удмурт Дунне Апрель 16, 2018 17:32

Елена Сараматова. Артана. Этюд

Татчы туж шерез вуэ пыд йылаз но йырсазяз. Егитэз но, мӧйыез но уродос вайёслэсь люкам артана кадь адско: котькызьы кужмысь шонеръя — вольыт уз луы. Олокытысь пыдлось кылӥське на ӟукыртэмзы, нискетэмзы. Тани али но корк-корк! йыгам куара шуккиське. Морзе азбукаен сямен, кин ке курадӟемез сярысь, койка борды йыгаса, ивортэ. Мырдэм, кужымтэк. Огдырлы чалме кадь, собере нош ик — корк, корк, корк…

Та корккетэм ик Оляез йырсазяз берыктӥз кадь. Котыр ӝомо-югдо: коридорысь гинэ ӟубис усьтэм ӧсэтӥ шуныт тыл пыре. Со шуныт доры амалтэк кыстӥськод. Борддор тыр бадӟымесь, сисьмем пулэсь укноос пыр тӧл быдэс палатаез сӥсъя. Зӧк шобрет но кезьытлэсь уг утьы. Борддоръёс но тани-тани куашкалозы кадь: отын-татын кесям бумага кадь ошиськылэмын цементэныз валче буёл, езъёс. Чурен бызьыло тараканъёс. Таӵе но больницаос вань шат шуыса валатозяз, Олялэн пель сьӧраз нош ик чузъяськиз корккетэм куара. Отӥяз кесяськыса жадем мурт кадь кин ке каллен куриз:

— Юрттэ, юрттэ…

Артысь палатаын со. Малы эмсузэръёс уг лыкто? Уг кыло шат? Оля висись доры мыныны медэ вал но султонъяз тём-тём пеймыт гуаз нош тюаз. Сайкакуз югыт вал ни. Котырзэ эшшо югытгес каро тӧдьы халатъёс. Ымныръёссэс Оля уг ик адӟы кадь. Огез вирзӥбетсэ мертаз, мукетыз капельница мертчалтӥз. Мар сярысь куспазы кенешемзэс Оля ӧз кылы. Эмчиос кошкем бере укно дурысь койка вылысь куара кылӥськиз:

— Асьме врачмы туж умой — ваньзэсты пыдъя. Тани мон татчы, пыдъёсы воксё дугдыса, вуи. Арня ортчиз — сьӧросэ ачим ветлыны кутски. Нош тон егит ай, ӝоггес бурмод. Мыным 74 ни.

 

Кызьы 74? Шораз учкид ке, 50 но уд сёты. Ымнырыз мунёлэн кадь вольыт. Синкабакъёсыз но мугорыз ке шат тӧрнамын. Бератаз гинэ Оля синйылтӥз: палатаысь эшшо 3 муртэ но егит уд шуы. Тужгес чупрес — 60 аресъемез, ваньмызлэсь вазь султэ: 6 часын ик йырсизэ миське. Эмсузэръёс вуэмлэсь азьло кытчы ке тамак кыскыны пота но синучкон борды басьтӥське. Икыр-кукыр будӥсь синкашъёссэ пинцетэн ишке, синлысъёссэ таш-таш буя, ымдуръёссэ горд-горд маялля. Осто, мынам, солэсь кык поллы егитгес муртлэн, интыысьтым вырӟыны кужыме ӧвӧл, больницаын буяськыны тодам ик ӧй лыктысал, нош со вазь ӵукна ик тылыоссэ сузя. Олялэсь тазьы паймемзэ кылыса кадь, кыӵе ке лушкем ужез быдэстӥсь мурт сямен, нылкышно сипыртӥз:

— Кин тодэ, оло, карт шедьтыны быгато. Огез шорам учкылэ ни. Кышноез кулэмын, шуиз. Ӝыны даурме карттэк улӥсько ни. Вань мылкыдме пиналъёсылы сётӥ, нош ачим табере соослы кулэ ӧвӧл ни: квартираме асьсэ вылэ гожтӥзы но монэ сад-бакчае уллязы.

Отӥяз, Олялэн валесэз вылэ пуксьыса ик, уксёлы ёрмыса улонэз вылэ ӝожтӥськыны, эмеспиоссэ курланы кутскиз. Куараез быдэс палата тыр чузъяське. Мукетъёсыз нылкышноос изем улсы кариськизы. Таос ваньзы веранъёсызлэсь жадиллям, кожалод. Оля но бадӟым куаралэсь ӝог акыльтӥз, йырыз уката висьыны кутскиз. Ярано коть, врач пыриз. Соку но кышномурт ӧз чалмытскы: кыӵе но висёнъёсыз сярысь мадьыса ӧз вутты, массаже куриськиз. Та татын кузё, малпаз Оля.

— Мон тӥледыз туннэ лэзьыны малпасько вал, — вазиз солы врач.

Соку нылкышно воксё ыштӥськиз. Кызьы лэзёды ни? Мон дась ӧвӧл на. Эшшо 2 нунал дыр сётэ на, шуиз.

Врач сьӧры сюлтыр-калтыр кунулскыса потӥз. Та кык нуналзэ со воргоронъёс палась ӧзгес кошкылы. Пайдаез луиз, лэся — дӥсьёссэ бичакуз, шуиз: нылъёс, кавалере но ӵуказе больницаысь потоз, ӵош улыса эскеромы. Кошкемез бӧрсьы ваньзы ганяк шокчизы. Татчыозь шыпыт улӥсь 93 аресъем песянай но 45 аресъем нылкышно куараоссэс поттаны кутскизы. Нылэн анай кадь тупазы соос. Пери шуккем песянайлы выль «нылыз» я пуксьыны, я сиськыны юрттылӥз. Оло дораз висьыса кыллись анайзэ малпаса, оло эмсузэр луыса ужамысьтыз, пересь борды сокем кыстӥськиз.

Соослэн гурламзы шоры учкыса, Олялэн но пуксьылэмез потыны кутскиз вал. Но врачъёс алӥзы: йырды берга на, тросгес изьыны тырше. Изёд, пе. Отысь но татысь нискетэм, вӧсь луэмлы чидатэк кесяськем, соргетэм куараос пельзэ вандо. Осто, ачим но соргетыны дышо ни таос пӧлын, малпалляз Оля. Нош тужгес зол кышкалляз со уйин каталка ворттэм куаралэсь. Выль висисьёсты уйлы быдэ сямен вуттылӥзы озьы. Вӧзам бушам койкае гинэ медаз выдтэ, туж секыт кылльыны зол висисьёс бордын, шуылӥз сыӵе дыръя Оля. Нош макем курдалляз со палатаосысь кулэмъёсты поттасьёслэсь. Сьӧразы нуозы кадь йӧтылӥз. Кулэмъёсты келяны 74 аресъем кышномурт гинэ яратылӥз: ярам ай, мон улэп на, шуылӥз кадь. Ӵукналы быдэ янак вылэ пуксьылӥз укно ултӥ кошкись катафалк мышкы кирос карыны. Котьку будэтъяз: эшшо огзэ нуизы.

Та кылъёслэсь Оля юзыр-кезьыр луылӥз. Улэме потэ на, шуылӥз со аслыз. Шара вераськыны ӧз яратылы. Мар со арлыдоослы вералоз? Висён сярысь ке, котькудӥзлэн со тырмытлэсь но тырмыт. Нош улон сюрессэ мадьыны кылыз ӧз бералтӥськылы. Вераськон мылкыдзэ но ӵукна ик быдтылӥз выж миськись. Пызьыртымтэ мучолоен котыр ваньзэ суп-сап пазян-коттон солэн сямаз. Выжез сяна, врачъёсты но, депутатъёсты но, улонэз но «миськылӥз». Мае но уг тоды, мае но уг курла! Висисьёс куспазы сое «валтӥсь политик» шуылӥзы, пырыкуз чалмылӥзы. Вазид ке, пож ведраысь музэн ымысьтыз маиз ке кисьтӥськоз.

Палатаысь ваньзэсты пумен-пумен лэзизы. Кылизы на Оля но пери шуккем пересь гинэ. Песянай шуиз:

— Ӵуказе тонэ лэзёзы, огнам кылё. Эн малпа — уг сётскы. Можга палъёсы вуылыкуд, пыра дорам. Мынам туж шулдыр садэ.

Адрессэ сётӥз. Оля абдраз: 93 аресын но улэм потэ на вылэм. Со шоры учкыса, Оля ялан малпалляз: мон таза, учкы ай, ветлэме но, кырӟаме но луэ. Ӧсэтӥ потыкуз, вӧсяськиз: осто, вань висёнэ татчы ик тараканъёс борды мед кылёз, улон артанаме сузяло, выльзэ люкало.

Удмурт Дунне
By Удмурт Дунне Апрель 16, 2018 17:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*