Эгра ёросысь Сэп гуртын вашкала кышетъёсын адӟытон ортче

Удмурт Дунне
By Удмурт Дунне Апрель 16, 2018 09:46

Татысь котькуд кышетлэн аслаз адӟонэз, ортчем улонэз.

Эгра ёросысь Сэп гуртысь культурая юртэ ку гинэ эн пыры, отын ялан ужгур пӧзе. Тулыслы но тани выль адӟытон лэсьтӥллям — «Чибориё кышетэ».

Культурая юртлэн борддоръёсаз ошисько пӧртэм вакытъёсысь 10-лэсь уно кышетъёс. Но тужгес дуноосыз — вашкалаосыз. Клубъёс таӵе адӟытон радъяськомы шуыса ивортӥллям гинэ но, гурт калык соку ик кышетъёссэ сандыкъёсысьтыз поттыса, куд-огез йыр вылысьтыз но куштыса адӟытонэ вайиллям. Нош клублэн кивалтӥсез Татьяна Мосова лэсьтэм на туспуктэмъёс но — соос вылын кышетъёсын адямиос.

Адӟытонэн тодматыкузы, ужасьёс нимысьтыз дугдо ӝӧк доры. Со дауръем гын кышетэн шобыртэмын, котыраз пуконъёс пуктэмын. Сак учкись валалоз, ӝӧк сьӧрын одӥг пукон уг тырмы.

— Кышкыт ук, вашкалазэ ыштӥськод ке. Сое ик возьматэ та буш инты, — шуо клубын ужасьёс.

— Ӝӧк вылысь кышет мынам песянаелэн Ефросинья Ивановна Антоновалэн, — вера Нина Лекомцева. — Со вордӥськемын 1904-тӥ арын. Кышет гынлэсь лэсьтэмын ке но, сое кей уг сиы, тодӥсь-валасьёс веразы, со, пе, маин ке пыӵатэмын. Песянаелэсь верамзэ тодӥсько на, тае со вуз карисьёслэсь картошкаен воштэм шуыса. Тае но эшшо одӥг буртчин кышетсэ со нылызлы бызьыкуз кузьмам.

Татысь котькуд кышетлэн аслаз адӟонэз, ортчем улонэз. Тунсыко, кышет пыр гинэ но историез тодыны луэ вылэм.

Мария Векшина

Туспуктӥз Татьяна Мосова

Удмурт Дунне
By Удмурт Дунне Апрель 16, 2018 09:46