Дарали Лели. Театрын. Верос

Удмурт Дунне
By Удмурт Дунне Апрель 17, 2018 17:29

Дас ньыль аресъем Лираез кужмысь театре уллязы. Билетъёс вал амфитеатрлэн нырысетӥ радаз. Анаез, атаез но Марина апаез интыяськизы кыкетӥ, куинетӥ, ньылетӥ интыосы, Лиралы сюриз нырысетӥез — дураз. Лираос ӧтись чингыли бере ик пыризы, лад-лад каръяськизы, чусомизы. Сцена горд пильысэн шобыртэмын. Буфет палась пыжкем но чорыг зын лӧсъяське. Оркестр гуысь ӟукыртэм-ӝуштэм, шулам, дымбыртэм кылӥське.

— Мон гуэз учко, — кеськиз Лира, интыысьтыз тэтчыса.

— Уд, — гань-гань вазиз Лиралэн атаез.

— Малы? — горд виштыосын пӧсектӥз ныл. — Мынам скрипкаоссэс адӟеме потэ. Отын инструментъёссэс тупатъяло!

— Пичи ныл кадь эн выры. Интыяд пукемед ик уг луы!

Калык каллен ваське партере. Залысь ог куиньмой люкетэз пуконъёс бушесь на. Лиралы балконысен ошиськем йыръёс тунсыко потӥзы.

— Учкы ай, Марина, — серектӥз со, — вылӥысь пиос шорамы учко… Жаль, ми ноку но балконын ӧм пукылэ.

— Тон шузимид-а, мар-а? Тау шу, котьку но азяз пукиськом. Туннэ гинэ татын, угось билетъёс кузьым чотын вал, озьы-а, папа? Мынам вылӥысен синмы но уз адӟы, — Марина очкизэ поттӥз.

— Мукет дыръя таӵе интыосы медам ик сюре, — йырыныз шонтӥз мамазы. — Мон дышемын азьпалан пукыны.

— Нош вань ук бинокльёс. Папа, малы асьмелэн бинокльмы ӧвӧл?

— Эшшо мар. Артистъёслэсь кытӥзэс адӟемед потэ?

— Мон берлань учкысал. Калык пӧлы.

Атаез куӵыктӥз. Лира эшшо огпол учкиз на ошиськем пиос шоры но лулӟиз. Туннэ со аслыз чебер уг поты. Дэремез кузь, буртчин. Туж бадӟым но пересь каре сое. Йырсиез берлань сынамын, пуштрес идиотской сяськаен тэчемын. Чыртыяз марӟан весь. Ваньмыз не в тему.

— Мама, одно ик шат театре тазьы дӥсяськыса ветлоно?

— Мон тонэ татчы кесяськем джинсаеныд уг лэзьы. Эн ик сапта семьямылэсь данзэ.

— Сапта… Данмес… кыӵе ке.

— Дугды. Адямиос кыло.

— Тодмоосмы ӧвӧл ук.

— Та театр. Татын котькин тодэ милемыз. Кӧня пол тыныд верано, Лира?

— Яра-а, мон балконэ ӝутско?

— Эшшо мар, — йырзэ берыктытэк, вазиз атаез.

— Марина!

— А-а! — Марина катанчи шоры синзэ дэмӟытэм ни.

— Нош тынад ноку но ӧй вал-а сыӵе шӧдонэд: пукиськод тон улӥяз, нош вылӥын, балкон дурын, кин ке тонэ чакласа сылэ. Мыным котьку потэ вал, кин ке отысен… Али но тани озьы: кин ке выламы усёз кадь… Чир! кеськыса ик — но зал шоры! Лакен ӝутэм кыӵе ке чебер йырси вылэ, кинлэн ке лабрес хризантемаосыз вылэ. Син азяд пуктӥськод-а, сыӵе скандал — нош опера азьланьтӥське. Кырӟасьёс гуньдо, но ариоссэс нуйто.

— Нокин но ноку но ми вылэ усьыны уз быгаты.

— Быгатоз!

— Уз!

— Нош кудӟемын ке?

— Кудӟемъёс операе уг ветло.

— Нош со татын ке ини кудӟиз?

— Кызьы — татын?

— Ну, шуом, вал кыӵе ке артист. Нош сое валтӥсь роле ӧз пуктэ. Туннэ премьера. Со лыктэ учкыны тушмонзэ, уг чида но юэ. Собере ассэ быдтэ — балконысен куштӥськыса.

— Артист — вылӥ культураен адӟем карымон адями. Соин таӵеез луыны уз быгаты.

— Татын мон тонэн чик но соглаш ӧвӧл. Артист — секыт улонлэн вотэсаз нюръяськись мурт. Вот мон лыдӟи вал…

— Тырмоз вераськыны, — вушйиз атайзы.

Кыкетӥзэ чингыли чузъяськиз. Атайзы синзэ кытчы ке ӧс пала берыктӥз.

— Вадим Андреевич, кышноеныз, — ымпумыныз пальпотыса, вазиз со. Анайзы мынектӥз.

— Марина, — сипыртӥз Лира. — Нош вылӥысь кин ке усиз ик ке?

— Уз усьы нокин но. Перила люкетэ.

— Перила… Бен, но мылкыд карись со вылтӥ тэтчоз, тодӥськод-а. Ӵапак асьмеос вылэ усёз, асьмемыз паньгатыса. Мама, ку кутскоз ини опера? Малы сокем вазь лыктӥм?

— Театре бере кыльыны уг яра.

— Нош Вадим Андреевич али гинэ пыриз. Тӥни Софья Владиславовна но!

— Кытын Софья? — кунэрскиз анайзы. — Сергей, учкы, Софьяос азьпала пуксё.

Атайзы гань-гань нуй-тӥськиз.

— Киыныд шонты Софьяедлы. Мед адӟоз, ми но татын шуыса.

— Антрактысен вераськом…

— Мон солы, ми татын шуыса, дораз бызьылыса, вераны быгатӥсько!

— Лира!

Куиньназы ик шораз урод учкизы.

— Ну… асьтэос тодӥськоды. Вис но вань. Дас вить минут кыстӥське. Оскем потэ, мон татын пукыны кулэ ӧвӧл быдэс антракт ӵоже…

Лира ӧз ни вераськы. Ӝоген чингыли жингыртӥз куинетӥзэ. Калык пумен тымиськиз. Катанчи ялан бабе на. Чидантэм! Тылэз напчытӥзы ни — со секытомиз, лябӟиз, пеймытаз, но пумозяз кысыны озьы ке но ӧз дыртэ.

Лира воксё но уг малпа вал туннэ театре мыныны. Сое ӝыт Максим возьма вал: вуж школа юртсылэн сигаз тубаны. Соос Максимен ярато школазылэн садаз, конгырес ӟус вылын, пукыны. Максим Лираез возьманъяз телефонэн шудэ. Собере тодмо пырсъемез кылэ но синзэ ӝутэ. Нылаш сое кемалась чакласа улэ ни. Максим Лираез китӥз кутэ но, кытчы ке поръяны мыно. Куддыръя сторож доры куное. Куддыръя стадионын роликен ширъяны. Куддыръя кынтэм (мороженой) басьто, сое нюлыса ветло.

Тани тыл кысӥз. Соин валче быдэс зал шокыштӥз кадь. Тыл пылатӥз сценаез. Увертюра гудыртэ. Гудыртэ Лиралэн сумкаяз. Нырысь вуӵыртӥз, вуӵыртӥз, собере сётӥз ук тодмо «гуды-рингтон»!

«Тышкан люкет!» — малпаз Лира ас понназ куалектыса. Нокин ӧз кылы кадь?! Яке кылымтэ улсы кариськизы? Урмыса зӥбылӥз сумка пыдсысьтыз телефонлэсь кнопкаоссэ. Так, анаез синмыныз ньылыны дась. Али ик кыс, кыч коӵыш! Лира телефонэзлэсь куаразэ кысӥз. Куанер Максим… Мар меда кулэ солы? Мӧзме, дыр.

Аслаз но Лиралэн сюлэм вылаз контрабас усиз кадь. Сценаез усьтӥзы: кыӵе ке кышноос бызьыло, экто. Огез воргорон юн чебер выре: азьлань султӥз но пыдыныз выртэ. Максим озьы ӧй турттэмъяськысал. Со огшоры, визьмо но валась. Пиослы воксё но тазьы пыдынызы выртыны чебер ӧвӧл… Максим али огназ пуке, дыр. Максимлэсь СМС вуиз: «Ку антракт? Жингырты!» Атаез Лиралэсь сумказэ талаз: номыр вазьыны ӧйлась.

Лира учкиз-учкиз но — синъёсыз ӵоктаськизы. Озьы луиз гинэ, мугорыз капчиен интыысьтыз лопырскиз но вылӥе, балконэ, лобӟиз. Перилае кечырскыса, Лира операез учкись пиос пӧлы шлёп! пуксиз. Соос театрын нырысьсэ вылӥллям. Синъёссы ӝуало. Лиралы соосын пукыны кельшиз. Чидатэк со кӧня ке пол кечырскылӥз но улӥысь калыкез эскериз. Юнме гинэ адямиос кожало, йыр вылазы номыр уз усьы шуыса. Вот кутоз но усёз!

Ария пумын Лира, вань дартсэ люкаса, балконысь бекмыльскиз но улӥе зӥрскиз. Польк! — усиз Мариналэн йыртышказ, тылобурдо кыед кадь. Марина паймиз, но вожпотэмзэ ӧз возьматы.

— Лира, антрактозь но возьмамед уг луы, — чурыт вазиз анаез. — Та ария — мынам яратоно гуре.

— Тон лучше Вадим Андреевич вылэ усь вал, — валэктӥз атаез. — Шонертэм усиськод. Амплитудаед пичи.

— Ярам, со дышетске гинэ, Сергей, — небыт уретӥз анаез. — Тодӥськод на-а, егит дыръямы тон монэ сыӵе кыдёке уськытъяны быгатылӥд! Рекордэд — куинетӥ рад.

— Куинетӥ радэ мугорыд гинэ усьылӥз, нош парикед — нырысетӥ радэн сцена вискы.

— Озьы, мон яратӥсько вал егит дыръям парик нуллыны…

— Мон но — париктэ нуллыны, — пальпотӥз атаез.

Лира ноку но сыӵе шудо ӧй вал.

Жаль, ваньзэ сӧриз антрактэз ялӥсь чингыли куара.

 

Удмурт Дунне
By Удмурт Дунне Апрель 17, 2018 17:29
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*