Дарали Лели. Гефест. Верос

Удмурт Дунне
By Удмурт Дунне Апрель 13, 2018 16:30

Вӧзаз кыллись ку сумкаез каллен маялляса, Гефест мыньпотыса учке Володя шоры. Гефестлэн выросъёсыз ӧчкарисесь, кильтроесь. Лап-лап пуке диван вылаз, сьӧд сумкаез пачкатӥз но ялан веша, зӥбылэ, вылтӥз чиньыосыныз нуллэ. Сумка аслаз ӧвӧл — Володялэн. Гефест журналистка шоры гань-гань, вылтӥзгес учке. Йырсиез солэн пештырес, нап-ӵуж, ангесозяз. Тыбырыз шкап кадь, пельпумыз сэрего. Вылаз паськыт дэра дэрем дӥсямын. Чиньыяз бадӟым азвесь зундэсэз чилекъя. Со чиньы — Володялэн пичи сумкаез вылын.

Володя — егит ныл. Чебер, визьмо. Кузь баблес йырсиё но питырес бамо. Гефест Семёнович доры со интервью басьтыны лыктӥз. Гефест — суредаськись. Борддоръёс вылын ужъёсыз ошылэмын, ваньзы соос яркытэсь но чибориёесь. Гефест — тодмо адями. Солэн юбилей — куамын вить арес тырмиз. Юон дыр кариз: котырес ӝӧк, выль адӟытон, банкет. Ӵапак банкетын Володя но Гефест тодматскизы. Володя ымаз ненег оливка понӥз. Гефест матэктӥз но озьы ик ки улаз сюрем оливкаез кушаз. Володя шукыё шампанской ӟузиз. Гефест — бӧрсяз. Лӧптыса пальпотэ! Володя чорыген нянь юдэс куртчиз. Гефест амал шедьтӥз: нянь вылэ понӥз кӧй юдэс (чорыгез со уг яраты). Володя мынектӥз, виноград капыртӥз. Гефест виноград пуры доры сузьтӥськиз но сое бокалаз пызьыртӥз. Володя паймиз но курдаз. Кыӵе кужмо но йӧспӧртэм та Гефест Семёнович Гуров: авангард сямо воргорон!

Соку ик Володя — Володина Анна Дмитриевна — малпаз, та ӟугырес сямо муртэз нимысьтыз вераськытоно шуыса. Нылмурт ужа радиоын, соин ик бордаз котьку диктофонэз ветлэ. Гефест Семёнович ӧтиз кунозэ мастерскояз. Володя диктофонзэ кияз кутӥз, пичи сьӧд вольыт сумказэ диван вылэ понӥз. Ачиз но со туж вольыт тусо, кельышлы, ваньмыз солэн мусо, ӝикыт. Дӥсяське эсэпсэ валаса, сьӧд но тӧдьы буёлъёсты сура. Уг буяськы — куддыр гинэ синлысъёссэ тушен пужмеръятэ но синпумъёсаз векчи гож суреда.

Гефест — сяськаё сумбырес дэремен но сурон сапеген. Валамон, интервью тунсыко луыны кулэ.

— Ӟечбуресь. Тӥледлы кӧня ке юан сётыны луоз-а? Мон удмурт радиоысь корреспондент, Володина Анна, — вазиськиз ныл, пызьыртэм виноград шоры учкыса.

— Озьы-а? — гурлаз Гуров. — Ярам, сётэ. Мон ведь ноку но пумит ӧвӧл, мыным кин ке мар ке сётэ ке!

Володя виноградэн гуньдэ вал ини. «Вот пересь шӧй! Оломар вераське».

— Мар бен… Тӥ пичи дырысеныды суредаськонэн выриськоды?

— Бинисько шортме дас кык аресэн… — нёртӥз Гефест но, киоссэ кусказ тырыса, зӥр-зӥр берганы кутскиз. Бергаса ик мастерскояз нуиз: ойдо, пе.

— Мусо… — пальыштӥз Володя. — Но та туж ик трос информация уг сёты. Тӥ эн малпалэ. Ӧчкаремды уз луы. Мон диктофонме ӝуатӥ — кырӟам нергедэс эфире сёто.

— Свят, свят, свят! — кеськиз тушо. Диван вылэ пограз.

— Тӥ нимысьтыз Ижын но Екатеринбургын дышетскемын, — азьланьтӥз Володя. — Кӧня ке вералэ вал студент вакытты сярысь.

— Эктом али, эктом али, эктон дырды та дыръя…

Володя кӧдэктӥз.

— Вождэс эн вае, мон укыр визьмо юанъёс уг сётӥськы. Зэмзэ ке, мон тӥледыз уг валаськы. Но тӥ аспӧртэм адями. Калык тӥледыз, ымзэ усьтыса, кылзысал. Но тӥ монэ уд кылӥське… Вераськемды уг поты ке, мон кужмысь уг кариськы.

— Ма тӥ, ма тӥ, мусо Володенька! Кыӵе лек кылъёс вордскем нуналам!

— Мон воксё но уг медӥськы вал лек луыны. Кызьы тӥ монэ нимады? Пиосмуртэз сямен?

— Тӥляд логикады пиосмуртской. Нош тӥ туж чебер. Яратэ асьтэды…

Гефестлэн ымыз пальпотэ, нош сема тысь кадь сюбег синъёсыз вӧяса кельто. Озьы ке но куалектоно солэн малпанъёсызлэсь. Возьытэ усёно.

— Мон асме но, ас ужме но гажасько но вылӥ дунъясько. Тӥ профессионал — буёлъёс пӧлын, мон — кылъёс пӧлын.

Гефест номыр уг вазьы. Володя юзыр-кезьыр луиз. Та воргоронэн вераськон уг лякиськы. Коть караул кесяськы! Та йӧнтэм маке исаське гинэ.

— Мон тӥледлы юан сётӥ вал, Гефест Семёнович. Эн нуйтэ, курисько. Батарейкаос пуксё.

— Батарейкады пуксе?

— Диктофонын.

— Эх, дыдӥе, кыӵе бен тӥ профессионал: интервью басьтыны потӥды, нош батарейкады ӝоген чоньдоз.

— Ах, журналистъёслэн сыӵе амалзы вань!.. — чабкиськиз Володя. — Куддыр дыртытоно луэ куд-ог дыг… дыртӥсьтэм муртъёсты.

— А-а… Эх, эктыса лэзём али но вераса лэзём али! Ма, тӥ ӧд оске шат, мон дышетскон дыръям арган улсы пыдме гинэ лёгаса улӥ шуыса? Тани возьмато! — пиосмурт тэтчиз.

Шӧдтэк шорысь Гефест ныллы гондыр тусо йӧтӥз. Зоопаркысь моко. Шонерак ке, адямиосты шулдыртӥсь но со дыре ачиз мӧзмись лусьтро лул… Дышем сямъя гульымзэ кеся, одӥг урдэс вылысьтыз мукетаз бекмылляське, нош синмаз — кытын ке туж мур, адсконтэм пеймытын — йыромон. Эриктэм луон.

«Оло, со озьы улонэн пачкатымтэ луэмзэ возьматыны выре? Аслыз шулдыр чибориё дунне кылдытӥз, котыраз сыӵе ик сурон бамъёсты люказ, пересь хиппи… Ваньмыз та астэ ческытатон гинэ».

— Тӥледлы кельшиз-а та юбилей ӝытты? Тӥ шудо-а? Тӥляд семьяды — со суредъёсты, озьы-а, Гефест?

Володя чалмиз но Гефестэз чакланы кутскиз. Азяз поръясь пиосмуртэз со валаны кутскиз, лэся. Гефест соин шудэ. Асэныз но шудэ, котырысь адямиосын но. Пушказ солэн мукет… Ваньмыз воштӥськыны быгатысал — суредась зэмос малпанъёссэ шараясал ке. Нош Гефест куара поттӥз:

— Ко-ко-ко-ко… Ко-ко-ко! Ко-ко-ри-ко! Ко-ко-ри-ко!

Володя диктофонзэ кысӥз. Со Гефест шоры ӟеч синмын учкиз но мыняз:

— Тау. Вождэс эн вае дырдэс быдтэме понна.

Куд-ог адямиосты валаны уг луы. Кулэ но ӧвӧл, дыр.

Удмурт Дунне
By Удмурт Дунне Апрель 13, 2018 16:30