Черк календарь Христос улӟыса султӥз! Та кылъёс быдэс дуннее вӧлмозы

Удмурт Дунне
By Удмурт Дунне Апрель 7, 2018 08:33

Быдӟымнал яке Паска — бадӟымлэсь но бадӟым праздник. Малы ке шуоно ачиз Инмар аслэсьтыз яратоно пизэ сётӥз, асьмеос мед утиськомы шуыса.

Иерусалимысь Троицкой собор.

Озьы Со оскон сётӥз, асьмелэн та улонмы уг быры шуыса. Инмар аслаз эксэйлыказ мед басьтоз шуыса, вӧсяськиськомы ук асьмеос. Сыӵе оскон ӧй ке луысал, вӧсяськонлэн но пайдаез ӧй луысал.

Паска азьын берпуметӥ арнязэ «страстной» шуо: асьмеос черкын вӧсяськиськомы но буре вайиськомы Иисус Христослэсь адями кадь курадӟемзэ. Шуиськомы ук: Инмар но Со, Адями но Со. Огшоры адями кадь ик Со курадӟиз, озьы ик Солы вӧсь но вал, асьмеос утиськыны мед быгатомы шуыса, озьы ик курадӟыны кылдӥз. Ваньзэ сое арня ӵоже асьмеос нуналысь нуналэ тодамы вайиськомы. Иисус Христослэсь курадӟемзэ малпаса, огшоры адями сюлмаське, кайгыре, малы ке шуоно Святой гожъямъёсъя тодӥськомы, адямиез кадь сое туж ултӥязы. Черкын со дыре вӧсяськыкузы, тросэзлэн синкылиоссы пото, пушсы тыре, адӟиське, адямиос куректо шуыса. Син азьтӥмы выльысь ортчо кадь со учыръёс.

Адями вазенгес дасяськыны кутске Паскалы: визян дыръя сьӧлыкъёссэ куштон сярысь сюлмаське, ассэ ачиз умойгес карыны выре. Ачид бордын трос ужаса-тыршыса, праздникез пумитаны мылкыд эшшо но капчи луэ. Оскись адями со нуналэ одно ик тырше лыктыны черке. Тросэз курегпуз буяло, кузятэмлэсь паска пӧрало. Нош кин уг быгаты черке уйин лыктыны, со буям курегпуззэ вӧсяны арнянуналэ ӵукна вае, калыкен ӵош шумпотон басьтыны тырше. Со сярысь тодэ вайыса гинэ но, мылкыд пуштыртӥське, капчи луэ.

Со шумпотон одӥг нуналскын гинэ уг быры — кутске Югыт арня. Соку вӧсяськон мукет сяменгес радъяське ини: шумпотыса асьмеос Киросэн черк котыртӥ ветлӥськомы. Адями озьы аслэсьтыз умой мылкыдзэ кузьма кадь мукетъёслы. Гырлы куара кылӥське, куное ветлӥськомы. Инмар асьмелы сётӥз собыдӟа шумпотон, ваньмызлы умой мед луоз шуыса — сыӵе мылкыдын ик улӥськомы асьмеос.

Маиз паймымон на эшшо: котькуд аре Паска пӧртэм нуналэ тупа. Сое чаклало толэзьлэн воштӥськемезъя. Со сяна, со медаз тупа еврейёслэн Быдӟымналэнызы. Соин ик солэн аслаз лыдъянэз. Паскалэн нуналыз котькуд аре воштӥське бере, соин валче тросэзлэн черк праздникъёслэн но дырзы вошъяське — шуом, Тройчалэн. Отын номыр валэктонтэмез ӧвӧл, ваньмыз со Инмарлэн.

Паска нуналъёсы служба мыныку, ми тыршиськомы тросгес ӟеч кылъёс вераны, огмес огмы ӟечкыласькомы. Христос кулэмысь улӟыса султӥз шуыса, шумпотӥськомы. Сыӵе мылкыдын ик мед уломы асьмеос азьланяз но. Инмарез данъяны, Инмарен ӵош улыны мед быгатомы. Инмар асьмелы шуд, яратон, тодон-валан мед сётоз. Нош асьмеос Инмарлы матэгес кариськыны мед быгатомы.

Оштолэзе черк пусъе

7-тӥ оштолэзе — Дун-чылкыт Инмар Анайлы ӟеч ивор веран, Дӧдьыкуштон.
8-тӥ оштолэзе — Иисус Христослэн кулэмысь улӟыса султонэзлэн югыт-чылкыт нуналыз, Быдӟымнунал яке Паска.
9-тӥ оштолэзе — кутске Югыт арня (Светлая седмица).
10-тӥ оштолэзе — Инмар Анайлэн «Иверская» мудорезлы вӧсяськон.
13-тӥ оштолэзе — Инмар Анайлэн «Живоносный Источник» мудорезлы вӧсяськон.
17-тӥ оштолэзе — кулэмъёсты буре ваён нунал. Радоница.
22-тӥ оштолэзе — Дун-сьӧлыктэм миро нуллӥсь нылкышноосты буре ваён.
30-тӥ оштолэзе — преподобной Зосимаез буре ваён.

Удмурт Дунне
By Удмурт Дунне Апрель 7, 2018 08:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*