Ашальчи Оки: Малы меда бурдыз сӧсырмылэм?

Удмурт Дунне
By Удмурт Дунне Апрель 10, 2018 10:25

А. Векшина Валерий пиеныз. 1935-тӥ ар.

Нырысетӥ удмурт нылкышно кылбурчи Ашальчи Оки (Акилина Векшина) вордскиз 1898-тӥ арын 4-тӥ апреле Грак ёросысь Порым гуртын. Кузебай Герд верамъя, солэн кылбуръёсыз пазьгиськемын, сяськаос выллем. Со вакытэ ик ассэ но «трахоматозной бусыысь сяськаен» нималляз.

Куараез ӵогӟиз

Репрессиос туж зол шератӥзы соку-соку гинэ вордскыны кутскись интеллигенцилэсь радъёссэ. 1932-тӥ арын 10-тӥ мае пытсамын Удмурт научно-исследовательской институтлэн кивалтӥсез Я. Ильин, Ижысь ВТУЗ-ысь (вылӥ технической учебной заведение) удмурт кылъя дышетӥсь П. Горохов. 15-тӥ мае ӝегатэмын литераторъёс К. Герд но К. Яковлев. 2 ар ӵоже эшшо 22 удмуртъёсты пытсэт сьӧры келязы. 1937-тӥ арын СОФИН ужъя 4-зэ ыбизы, К. Гердэз но.

Революцилы пумит мынэ но Удмуртиез но мукет автономиосты СССР-ысь поттонлы дурбасьтэ шуыса, арестовать каризы Ашальчи Окиез но. Мон сярысь следовательёс ӧз юалляське, кысказы Герд пумысен, бӧрысь тодаз вайылӥз кылбурчи. 3 толэзь ортчыса, лэзизы, но нош ик ӝегатӥзы, нош ик лэзизы… Толэзьёсын-толэзьёсын арестлэсь кышкаса улон, ӵыжы-выжыос понна куалекъян…

Лулы мынам

Возь выл бубли ке но —

Марлы меда

Бурдыз сӧсырмылэм?

Сюлмы мынам

Чебер кырезь ке но —

Марлы меда

Сиез тӥяськылэм?

Мылкыд мынам

Зарни манет ке но —

Марлы меда

Жильы борды со думылэм?

Бордаз думылэм жильыослэсь Ашальчи Оки мозмытскыны ӧз быгаты ни. Кылбурчилэн жильыртӥсь ошмес кадь кужмо куараез чалмиз кема аръёслы.

Калык пӧлын

Но возьдаськись удмурт нылкышно пушкын ватӥськемын вылэм юн кужым, жаляны быгатӥсь сюлэм. Таӵе сямыз туж иназ луиз, шуг-секытъёсты вормыны юрттӥз син эмъясь врачлы Лина Векшиналы.

Пичи дыръяз Лина трос пол адӟылӥз, кызьы урам кузя кичи-вачи пичи пиос сьӧры кураськыса ветло сукыръёс, борддор пала берытскыса, пересьёс пуко, пиналъёс пеймыт сэрегъёсысь уг потало, малы ке шуоно синъёссы югытлэсь кышкало.

Трахома… Та паласькись висёнэз куд-ог ёросъёсын синӥшкон шуылӥзы. Со синтэм кельтылӥз Уралын, Сибирьын, Уйпалан улӥсьёсты. Воспаление бервылын маке быдӟа вурысъёс кыльылӥзы. Синкабак кырыжалляз яке синкӧльы борды бурмылӥз. Синдыж (плёнка) пожаськылӥз, кӧсалляз но, адями адӟемысь тёпак дугдылӥз. Вятской губерниын трахома зол вӧлмемын вал Глазов но Сарапул уездъёсын. Солы муг луизы начар, пырултэм улон, эмъясьёс ӧй вал, кызьы висёнлэсь утиськоно, валэктӥсь ӧз шедьылы.

1928-тӥ арын Казань университетлэсь медициная факультетсэ йылпумъяса, Лина Векшина куриське Вотской автономной областьлэн пыдлось сэрегаз — Юкаменске черкогуртэ. Уждун солы тупато 135 манет.

Вашкала гуртэ Л. Векшина вуиз май толэзе. А. Вознесенская докторен ӵош калыкез больницае ӧтчаны кутскизы. Но крестьян калык турын-куарен сяна эмъяськыны дышемын ӧй вал. Пересьёс егитъёсты алылӥзы: удмуртъёс висись синмын вордско ини, кызьы сое бурмытод на.

Егит окулист Лина Григорьевна ачиз потӥз калыке: коркась корка ветлылӥз, анайёслы вордскем кылынызы валэктылӥз, кызьы нылпиоссэс будэтоно, пумен синъёсазы эмъюм тыриз. Удмурт кылын вераське шуыса, калык кылзӥськыны кутскиз, больницае ветлыны пичиен-пичиен дышиз.

Врачъёс ужаны кутскылӥзы 5 часын ӵукна. Огез висисьёсты учкылӥз, мукетыз пичияк операциос лэсьтылӥз, медсестраос стационарын эмъяллязы. Лякыт егит врач сярысь котырак гуртъёсын тодӥзы. Нуналаз 150 но адями лыктэ вал эскериськыны!

1928-тӥ арын ик Линалэн ӟуч кылэ берыктэм кылбуръёсыныз «О чём поёт вотячка» книгаез потӥз. Чуръёссэ ӟуч лыдӟись доры вуттӥз Кузебай Герд. Со Москваысен Юкаменске гожтэтъёс ысъялляз, Л. Векшинаез серекъяса «трахоматозной бусыосысь сяська» шуылӥз.

Юкаменскын А. Векшина пумитаз вуоно картсэ — егит агроном Иван Карачёв Киров котырысь лыктэмын вал. 1930-тӥ арын 20-тӥ апреле соослэн вордскиз Валерий пизы. Та аръёсы трахома зол сьӧсьяське вал Алнаш котырын. Соин ик егит семья Алнаш черкогуртэ улыны выжиз.

Но ӝоген кутскизы репрессиос. Удмурт литература бырон калэ вуиз. 1937-тӥ арын кыкетӥзэ арест улысь мозмемез бӧрсьы Л. Векшина куштӥз вань рукописьёссэ, йылпумъямтэ кылбуръёссэ. Кыӵе умой, мынам медицинае коть вань шуыса, вералляз со.

1939-тӥ арын егит врач мынӥз Одессае, тодмо офтальмологлэн В. Филатовлэн 3 толэзьем курсъёсаз. Отын со дышиз синкӧльыез вандылыса операция лэсьтыны.

Ӟеч хирург

Но трахомаен нюръяськонэз шӧдтэк шорысь уретӥз война. Солэн нырысетӥ нуналъёсаз ик Можгаын кылдытӥзы 571 номеро походно-полевой госпиталь. Л. Векшина куриськиз отчы. С. Зубарев но К. Куликов «Дорогами победы» книгаязы толэзен-нуналэн гожтыса кельтӥзы солэсь ож сюрессэ. Соя тодмо: августэ ик ини Л. Векшина фронтын вал — Тверь областьысь Торопец городын. Госпитальлэн валтӥсь хирургез Б. Мультановский операциос лэсьяз, Л. Векшина солы юрттӥськиз. Сӧсырмем солдатъёсты пуштылэмъёс улысь поттылӥз. 1941-тӥ арын августэ гинэ госпитальын 3 сюрс 485 солдатлы операция лэсьтӥзы.

Отӥяз госпиталь армиен ӵош чигназ, сӧсырмемъёс тросгес но тросгес луизы, сӥзьыл пал бордазы итӥськизы кынтӥськемъёс. Ар ӵоже Л. Векшина ӟеч хирург луиз. Кӧня ке сю операция лэсьтӥз. Ӝоген косон вуиз: Л. Векшинаез 1038-тӥ эвакогоспитале выжтоно. Б. Мультановскийлэн туж уг поты вал ӟеч специалистэз лэземез, но амалыз ӧй вал — приказ. Лина Григорьевна сӧсырмем синкӧльы вылын операция лэсьяны кутскиз. Киыз сокем воляз — нокин ӧз оскылы, войналэсь азьвыл скальпелез кияз ӵем кутылыса ӧз вутты шуыса.

1945-тӥ арын 19-тӥ мае удмурт врачлы, вормонэн дораз бертыкуз, таӵе характеристика сётӥзы: медицина службаысь капитан Лина Григорьевна Векшина туж ӟеч окулист луэ, син висёнъёсты чаль тодма, синкӧльыез вандылыса эмъя… Векшина эш — ужез яратӥсь, пумозяз вуттӥсь, кыл кутыны быгатӥсь адями, но куд-ог дыръя кужымезлы, быгатонэзлы уггес оскы. Политикаез вала, улонын туж огшоры, востэм, жалясь, висисьёсты сюлмысь учке, сое гажало эмъясьёс но, сӧсырмем солдатъёс но… Вылӥе ӝутскыны луонлыкъёсыз бадӟымесь…

Валтӥсь врач

Алнашын 5 ар ӵоже уж лачак люкаськем. Трахома азьвыл сямен ик кекатыса возе калыкез. Соин ик азьвыл военной врач басьтӥське та висёнэз эмъянъя диспансер кылдытон борды. 1947-тӥ арын сое усьтӥзы Алнаш, Бемыж, Грак ёросъёсысь калык понна. Валтӥсь враче юнматӥзы Лина Григорьевна Векшинаез. Мар бордысен кутсконо? Трахомаез эмъяны быгатӥсь медсестраосты дасян бордысен! Татын ини Лина Григорьевна ассэ усто дышетӥсь, организатор сямен возьматӥз. Солэн киосыз пыр потэм эмъясьёс бӧрысь тодазы вайылӥзы: со милям кыкетӥ анаймы кадь вал. Алнашын ӧй вал Лина Григорьевнаез тодӥсьтэм семья: со доры эмъяськыны гинэ ӧз ветлылэ, огшоры визь-кенеш курыны но.

1958-тӥ арын Лина Векшинаез пусйизы «Знак Почёта» орденэн, та арын ик луиз Удмурт АССР-ысь дано врач. Милям Шор кун архивамы утисько на солэн «За победу над Германией в Великой Отечественной войне 1941-1945 гг.» но «За взятие Берлина» медальёсызлэн документъёссы.

1960-тӥ арын 21-тӥ январе Алнаш районысь Депутатъёслэн Кенешазы шуизы: районын трахомаез вормимы. Секыт висисьёслы операция лэсьтэмын. Нылпиос но егитъёс пӧлын выль черламъёс ӧвӧл. Та вал Л. Векшиналэн но эшшо огез вормонэз.

Ирина Зайцева,

Шор кун архивын ужась

Туспуктэмъёс утисько Шор кун архивын

Удмурт Дунне
By Удмурт Дунне Апрель 10, 2018 10:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*