1000 адямилы 1 клуб. Малы ворсасько культурая юртъёс?

Удмурт Дунне
By Удмурт Дунне Апрель 24, 2018 11:00

Газетлэн редакцияз жингыртӥсь луиз: Шаркан ёросысь Гондырвай гуртысьтымы, пе, клубез ворсазы. Юрттэ вал югдурез воштыны!

Шаркан ёросысь Гондырвай гуртысь клуб дырын-дырын гинэ ужалля.

Пайдауг ваё, пе

Шаркан ёростӥ кылем арын гужем ик вераськонъёс ветло вал ни, пичи гуртъёсысь клубъёсты, оло, пытсано шуыса: учконо, пе, кыӵе-мар ужа клуб, умой-а, урод-а юртэз, трос-а калыкез гуртын. Вераськон потаз одӥг муниципал кылдытэтлы одӥг клуб кельтон сярысь но. Сыӵе, пе, дэмлан (рекомендация) дорамы вуиз, шуиз вал соку ай Шаркан ёросысь культурая управлениен кивалтӥсь Елена Хардина. Но та борды со ватсаз: тыршом кызьы ке утьыны клубъёсты. Та вераськон берегес ик кивалтӥсь ужысьтыз кошкиз. Но тани выль ивор: Шаркан ёросын туэ гинэ пытсаськем 10 (!) клуб. Огез соос пӧлысь — Гондырвайын.

— Выль ар праздникъёс бере клубмес пытсазы, — вера пенсионер Рудольф Софронов. — Клубмы ужа вал, аппаратурамы гинэ ке шат уродгес. Пересьёсмы «Инвожо» ансамбле ветло, ёросамы ансамбльёслэн ӵошатсконазы 2-тӥ инты басьтэммы вань, мон ачим концертлы быдэ сцена вылэ арганэн шудыны потай. Клубын пенсия но сётъяло вал. Табере мӧйыос, пӧлазы 80, 90 аресъемъёсыз но вань, пенсия басьтыны 2 иськеме гараже тубало.

— Выль ар ортчытӥмы на, ёлка пуктӥмы, собере — 9-тӥ январе — лыктӥзы но клубмес пытсазы, — шуэ Гондырвай клублэн кивалтӥсез Николай Матвеев. — Приказ, шуизы, пумит кызьы мынод? Гурт калыкмы куаретылӥз ик бен. Шарканысь культурая управление шуиз: та юрт милям, колхозлэн балансаз ӧвӧл. Колхозды но сельсоветты ас вылаз та клубдэс басьтӥзы ке, возём. Со сяна, мон уг тодӥськы, кытысь соос таӵе лыдпусъёсты басьтӥллям, Москва, пе, лэзиз: 1000 адямилы, пе, одӥг клубен окме. Нош милям Карсашур сельсоветамы оглом 860 адями люкаське, Гондырваямы ог 200 пала улӥсез, Чужегово гуртын тросгес — 300 пала. Озьы 3 гуртлы одӥг клуб кылиз — Карсашурын.

— Но отчы ветлонэз ог 5 иськем, — шуэ Рудольф Софронов.

— Калык ассэ воксё но кушкем медаз кожа шуыса, арняяз 2 пол, пе, клубез усьяно ик, пятницае но субботае, куке егитъёс гуртазы берто, — веранзэ азьланьтэ Николай Матвеев. — Шарканысь автоклуб 2 пол ветлылӥз ни. Но клубез ум эстӥське бере, адямиос 8-10 градусын кынмыса пукизы. Кызьы таӵеен концерт яралоз?

Али Николай Аркадьевич ужа Карсашур клубын. Нош Гондырвайысь клубез пытсамзы берегес ик 30 градус кезьыт кариськиз. Батарейкаос пилиськылӥзы. Та пумысен Рудольф Софронов ёрос Прокуратурае вазиськем.

— Клубъёсмы пытсаськизы ке но, соос дырын-дырын усьяськыло, гуртоос доры Шаркан ёросысь автоклуб поталля, — шуэ Шаркан ёросысь культурая управлениен кивалтӥсь Елена Рудницкая. — Зэм, милемлы вуиз дэмлан, отын гожтэмын: 1000 адямилы 1 клуб луыны кулэ, сое лыдэ басьтытэк, кӧня гурт пыре муниципал кылдытэтэ. Со сяна, учкиськомы на, кызьы клуб ужа, кӧня адями отчы ветлэ, кӧня тыриськонъёсыз солэн люкасько но мукет. Ойдолэ синъёсмес усьтом! Тросэз клубъёсмы барыш уг потто, нош эстӥськон, тыл понна тыриськонъёссы бадӟымесь, со понна ми кыл кутӥськомы ук. Тани Гондырвае Шаркан автоклуб концертэн потаз. Клубын 100 пуксён инты, но потӥз 15-20 адями, нош Вӧйдыре воксё 13 адями сяна ӧз вуы. Зэмзэ верано ке, ми одӥгзэ но йӧн-йӧн ужась клубез, ӟеч юртэз ӧм пытсалэ, вужмемъёссэ гинэ: кытын ке укноосты вошъяно, кытын ке липетсы вия…

Усьтӥськисьёсыз но вань

Кылем арын август толэзе Россиысь Культурая министерство эскерыны косэм улосвылъёсысь вань клубъёсты. Тупало-а соос туала куронъёслы? Кызьы ужало? Октябре юнматэмын «методической рекомендациос» — дэмланъёс, иське. Та документъя азьланяз ужано ке, шаерамы, пе, 42 «шулдыртӥсь» интыос мултэсэсь. Озьы тӥни: азьвыл соос гуртъёсын кулэ вал, усьтӥськизы бере, нош али — мултэсэсь.

Нош оглом верано ке, та дырлы Удмурт Элькунын 642 культурая юртъёс, 620-ез соос пӧлысь интыяськемын гуртъёсын но черкогуртъёсын. Туэ та лыдпус шӧдскымон ичиёмоз, вылды, шоро-куспо гуртъёс гинэ но клубтэк кыльыны быгатозы. Уго кылем арын 4 клуб гинэ ворсаськиз ке, туэ, кызьы возьматэ улон, та лыдпус шӧдскымон тросгес луоз. Но кин клубез пытсан понна кыл кутэ?

Культурая юртъёслэсь ужамзэс чакла ёрос администрация, озьыен, соосты усьтон-ворсан но — администрацилэн йырвисёнэз. Но мукет ласянь, соослы вылӥысен дэмланъёс вуо ук, нош дэмламез ёросъёс ӵемысь косэмен сурало кадь. Зэм, туала вакытэ юртъёсты возьыны дуно усе: эстон, югдытон понна коньдон тыроно. Тужгес но — соос куашкан калэ вуэмын ке. Нош таӵеосыз шаерамы арлы быдэ тросгес но тросгес луо. Кылем арын гинэ «Огъя Россия» партилэн федерал программаезъя шаерамы вуиз уксё клубъёсты тупатъяны. Та уж азьланьтэмын луоз туэ но. Кызьы ивортэ Культурая но туризмъя министерство, туэ чакламын тупатъяны 30 клубъёсты, данакезлэсь воштозы липетсэ, укнооссэ, кытысь ке — ву но шуныт вайись гумыосты но мукет. 13 клубъёсы басьтэмын луозы крезьгуро инструментъёс но техника.

Шаерысьтымы культурая но туризмъя министр Владимир Соловьёв шуиз вал, клуб ворсаське ке, соку ик куаш поттӥськом, нош усьтӥськисьёсыз сярысь кыл но ум вераське. Умой ук, кылем арын Вавож, Кизнер ёросъёсын усьтэмын выль юртъёс, Кез ёросын 2 коркаос тупатъямын но культуралы сётэмын вал, нош Вотка ёросын клублы пӧрмиз магазин. Но, мукет ласянь, ар кутсконын ик одӥг ёросын гинэ ворсаське 10 клуб!

Оскеммы потэ, клубез ворсаку, одно ик гурт калыклэсь малпанзэ лыдэ басьтозы шуыса. Культурая юртъёс соос понна ужало ук. Нош али шуо: приказ!

Мария Векшина

Удмурт Дунне
By Удмурт Дунне Апрель 24, 2018 11:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*